Ti ƀuôn Bi, să knông lăn Ia O, čar Gia Lai, grăp ƀuôn êlan jing anôk mgang mơ̆ng bruă  jih jang mnuih ƀuôn sang răng mgang klei êđăp ênang. Dưi mâo klei anei jing hlăm jih lu thŭn, mduôn Ksor Bơng jing pô kuč mngač bruă klam hlăm mnuih ƀuôn sang. Ñu khăng lač: knông lăn êđăp ênang kơh ƀuôn sang srăng êđăp ênang; mnuih ƀuôn sang brei thâo răng kriê lăn ƀuôn sang, brei hlue ngă hdră bhiăn, amâo hmư̆ klei phung jhat mplư leh anăn gĭr mă bruă knuă čiăng kơ klei hdĭp jăk hĭn. Wăt tơdah êbeh 70 thŭn leh, êbat êmưt leh, ƀiădah bruă klam ñu hlăm êpul êya ka dưi hrŏ ôh.

Hlăm dŭm thŭn êgao, mduôn Bơng “nao hlăm djăp ƀuôn êlan, grăp boh sang”, bi tuôm hŏng 23 gŏ êsei mâo pưk hma giăm knông lăn čiăng hâo hưn amâo ksĭng mmiă lăn, amâo ngă soh hŏng klei bhiăn knông lăn, amâo đru mgang amâodah đru kơ klei čhĭ mnia soh hŏng hdră bhiăn. Grăp gưl hiu suang dlăng, ñu lŏ hrăm mbĭt hŏng êpul kahan găn čư̆ boh tâo, găn êa hnoh khuôt. Mduôn Bơng brei thâo:

“Akŏ mlan, knhal jih mlan bi kƀĭn hâo hưn kơ mnuih ƀuôn sang, kƀĭn hlăm bruă knông lăn si ngă čiăng răng kriê knông lăn êđăp ênang, amâo brei mâo klei amâo thâo bi djŏ ngă luč klei êđăp ênang kđi čar hlăm ala ƀuôn. Hlăm wưng êgao mnuih ƀuôn sang hlue ngă jăk.  Pô giăm hŏng  kahan răng mgang knông lăn, bi mguôp hŏng mnuih ƀuôn sang bi kƀĭn hâo hưn kơ mnuih ƀuôn snag hmư̆, đăo knang leh anăn hlue ngă jăk đru kơ klei êđăp ênang dưi rơ̆ng hlăm wưng êgao.”

Amâo djŏ knŏng đru răng kriê knông lăn, mduôn Bơng lŏ jing pô bi grăng, bi mguôp êpul êya. 8 thŭn kăp mtô, 20 thŭn ngă Khua dlăng bruă Đảng, Khua Knơ̆ng bruă sang čư̆ êa să leh anăn Khua phung khua thŭn… Klei thâo anăn đru kơ ñu ênưih mâo mnuih ƀuôn sang khăp. Mduôn Bơng brei thâo, ară anei klei hdĭo dŭm ƀuôn sang knông lăn ƀrư̆ jăk hĭn. Mnuih ƀuôn sang msĕ si blei leh ênŭm kdrăp hâo hưn mđing hmư̆,  kăp dlăng, bi blŭ hrăm, mkŏ internet kyua anăn tui hriăm lu mta mơ̆ng ala ƀuôn. Mnuih ƀuôn sang ăt ênưih mkŏ hŏng knuă druh, bi trông klei mĭn, klei čiăng, msir klei gun kpăk hlăm klei hdĭp leh anăn mkra mjing. Ară anei, mnuih ƀuôn sang thâo klei duh ƀơ̆ng, kriăng mă bruă knuă, klei hdĭp đĭ kyar, klei amâo thâo bi djŏ hrŏ leh lu, kyua anăn mnuih ƀuôn sang ênưih mâo klei sa ai.

“Wăt tơdah êlâo dih kơ bruă duh mkra leh anăn anôk dôk mnuih ƀuôn sang tuôm lu klei dleh dlan, ƀiădah wưng giăm anei mâo Đảng leh anăn Knŭk kna mđing dlăng hâo hưn kơ mnuih ƀuôn sang, boh nik phung knuă druh ti alŭ wăl, hâo hưn kơ mnuih ƀuôn sang ngă pưk hma, pla ana boh kroh, ana sui thŭn msĕ si kñŭl, ksu, kphê… dŭm thŭn giăm anei hrui pĕ mâo lu. Kâo ƀuh mnuih ƀuôn sang đĭ kyar kơ bruă duh mkra ala ƀuôn, kâo mơak kyua mnuih ƀuôn sang amâo lŏ êpa ôh, êlâo dih ƀơ̆ng hbei dliê, ară anei mnuih ƀuôn sang đĭ kyar leh.”

Kyua klei khua mduôn bi hmô, ƀuôn Bi mkŏ mjing leh êpul čŏng kriê dlăng êlan knông lăn, gơ̆ng knông lăn, bi hgŭm kjăp hŏng Kđông kahan răng mgang knông lăn Ia O mkŏ mjing hiu suang dlăng grăp gưl. Lu thŭn êgao, alŭ wăl amâo mâo ôh klei găn knông lăn, amâo mtô klei đăo soh hŏng hdră bhiăn, amâo mâo ngă soh hŏng hdră bhiăn luč klei êđăp ênang. Thượng úy Rơ Lan Tân,  Khua Êpul mtrŭt mjhar mnuih ƀuôn sang, Kđông kahan răng mgang knông lăn Ia O bi mklă:

 “Mđĭ lar bruă klam khua mduôn leh anăn phung mâo kơhưm ti alŭ wăl yuôm bhăn snăk. Hmei bi mklă grăp čô mnuih ƀuôn sang jing gơ̆ng hdĭp ti krĭng knông lăn. Tơdah mnuih ƀuôn sang dưi mđĭ lar bruă klam, bi kƀĭn mnuih ƀuôn sang bi hgŭm hŏng êpul kahan răng mgang knông lăn srăng mjing sa ai ktang kjăp răng mgang krĭng wăl knông lăn.”

Să knông lăn Ia O mâo êbeh 2.700 gŏ êsei, 11 êbâo čô mnuih ƀuôn sang, êbeh 68% jing mnuih djuê ƀiă, truh ară anei mâo djăp hnơ̆ng čuăn krĭng ƀuôn sang mrâo hŏng 19/19 hnơ̆ng kčah. 100% êlan mlir să mâo tuh bêtông; giăm 90% êlan phŭn hlăm ƀuôn sang mâo tuh bê tông; 87% boh sang mnuih ƀuôn sang djăp hnơ̆ng čuăn hlue si Phŭn bruă rŭ mdơ̆ng. Hlue si Nguyễn Xuân Tuấn, K’iăng Khua Knơ̆ng bruă sang čư̆ êa să Ia O, dŭm boh tŭ anăn mâo bruă klam đru mguôp prŏng snăk mơ̆ng khua mduôn Ksor Bơng:

 “Ti krĭng knông lăn bruă klam mnuih ƀuôn sang yuôm bhăn, hlăm anăn mâo khua mduôn leh anăn boh nik mduôn Ksor Bơng ti ƀuôn Bi. Mơ̆ng phung khua mduôn  leh anăn phung mâo kơhưm hlăm ƀuôn hŏng dŭm anôk bruă hlăm ƀuôn bi hgŭm hâo hưn čiăng ngă hdră êlan mơ̆ng Đảng leh anăn hdră bhiăn knŭk kna ti alŭ wăl hlăm wưng êgao. Hlăm wưng kơ anăp lŏ dơ̆ng mđĭ lar ai tiê anăn, mđĭ kơhưm khua mduôn hlăm krĭng mnuih djuê ƀiă čiăng hŏng bruă Đảng, bruă sang čư̆ êa alŭ wăl pŏk ngă jăk bruă mđĭ kyar bruă duh mkra ala ƀuôn, rơ̆ng êđăp ênang ti alŭ wăl.”

Thŭn 2024, mduôn Ksor Bơng ktưn hưn mâo klei mni hlăm hdră “Anôk knang kơ ƀuôn sang” sa klei čih yap năng djŏ kơ klei đru mguôp hơĭt kjăp leh anăn hgăm. Ƀiădah klei bi mni prŏng hĭn hŏng ñu ăt jing klei mnuih ƀuôn sang mơak leh ƀuh đang kñŭl bi mnga, êdam  êra hđeh êlăk êran hlăm êlan bê rông hrô kơ êlan lăn hlăk êlâo dih… klei bi knăl klă mngač kơ sang krĭng knông lăn bi mlih grăp hruê.