Hjan prŏng êa lêč ngă jhat rai 5 kdrêč êlan kčŭn čư̆ Prenn, 3 kdrêč êlan hlăm êlan dơ̆ng čar, lehanăn lu kdrêč êlan mkăn hlăm čar Lâm Đồng, hŏng ênoh bi liê tĭng jih jang hlăm brô 361 êklai prăk. Ti kčŭn čư̆ Mimosa, Êpul kiă kriê êlan klông mơ̆ng bruă mrô 85 hlăk pŏk êjai êlan găn êrô, tĭng truh kơ hrue 29/11/2025; bruă čiăng mkra kban găn dlông troh êlan mâo boh prŏng 9m mâo leh klei tŭ ư srăng mkra mjing mơ̆ng hrue 10/12, tĭng srăng bi leh hlăm wăng mơ̆ng 3 - 4 mlan êdei.

Ti kčŭn čư̆ D’ran, anôk klưh mâo hwai mkăm leh lăn boh tâo, bi mđoh êlan čiăng bi leh êlâo kơ hrue 10/12 tinăp; kčŭn čư̆ Gia Bắc lŏ bi hluh leh mơh êlan. Ti anôk bi kƀĭn, Nguyễn Hồng Hải, K’iăng khua knơ̆ng bruă sang čư̆ êa čar Lâm Đồng bi klă leh bruă kiă kriê, răng mgang kjăp êlan klông leh dưi lŏ mkŏ mơ̆ng klei jhat rai, boh nik ti kčŭn čư̆ Prenn - jing mbha phŭn đĭ kơ Đà Lạt. Ñu mâo klei mtă kơ knơ̆ng bruă rŭ mkra, lehanăn êpul bruă kiă kriê êlan klông čar lŏ dơ̆ng kiă kriê kjăp, mkra wĭt êlan jhat bi leh êlâo kơ Tết anăp anei, rơ̆ng kơ klei êrô êbat hlăm klei êđăp ênang./.