Gưl êa lip lêč prŏng leh êgao ngă êngăp leh truh 34 boh ƀuôn hgŭm hlăm čar Daklak, hlăm anăn kjham hĭn êdi jing dŭm alŭ wăl Đông Hòa, Hòa Xuân, Hòa Thịnh, Hòa Mỹ… leh êa dơ̆ng hrŏ mâo mnuih ƀuôn sang, lĭng kahan, kahan ksiêm, dŭm êpul êya alŭ wăl pral bi mdoh, mghaih msir boh mơ̆ng klei êa ngă, lŏ kơrŭ wĭt klei hdĭp mda, hwai mdoh lăn lŭ, mdjiê kman, hwai djah. Tui si ênoh mâo yap mrâo hĭn mơ̆ng knơ̆ng bruă sang čô êa čar, brei thâo: Kluôm čar mâo 55 čô mnuih djiê, 10 čô mnuih luič êbeh    150.000 boh sang êngăp êlam hlăm êa, êbeh 120 boh sang klưh jhai rai. Ênoh luič liê jih jang êbeh 5.500 êklai prăk. Khua bruă Đảng čar Lương Nguyễn Minh Triết lač, êa hrŏ leh jih hlăm alŭ wăl nah ngŏ čar, bruă Đảng čar tiŏ nao leh bruă đru kơ mnuih ƀuôn sang, bi hgŭm hŏng dŭm bruă dru dŏng, lehanăn bi mdoh wăl hdĭp mda, tal êlâo hlăm dŭm boh sang hră, sang êa drao pioh lŏ mă bruă kơ mnuih ƀuôn sang.

Tlam hruê 23/11, ti kdrŭn Quy Nhơn, dŭm pluh čô knuă druh, kahan êa Lĭng kahan răng mgang knông lăn mrô 2 lehanăn Kđông kahan răng mgang ƀăng jang knông lăn kdrŭn Quy NHơn mjêč mă 120 ton braih mơ̆ng Knơ̆ng bruă kriê pioh ala čar mkăp kơ mnuih ƀuôn sang Gia Lai hmăi mơ̆ng klei êa lip lêč.

Mbĭt hŏng wưng anei, ti să Ngô Mây lehanăn Cát Khánh, 20 čô knuă druh, mnuih mă bruă Kđông kahan răng mgang knông lăn Cát Khánh bi hgŭm hŏng bruă knŭk kna alŭ wăl dŭ mdiăng, mbha mnơ̆ng mơ̆ng 15 boh êdeh mdiăng truh kơ alŭ Chánh Hữu, Chánh Định, Chánh Hội lehanăn Vân Trim, rơ̆ng djŏ mnuih. Hlăm gưl êa lip lêč êgao, dŭm pluh êbâo čô knuă druh, lĭng kahan krĭng 5, Quân đoàn 34 lehanăn Knơ̆ng gĭt gai lĭng kahan čar Gia Lai ba nao leh kdrăp mnơ̆ng bi hgŭm hŏng kahan ksiêm, bruă knŭk kna alŭ wăl mkŏ mjing hdră đru dŏng, mbĕ dŭm êtuh êbâo čô đuê̆ mơ̆ng krĭng huĭ hyưt, đru dŭm pluhg êbâo čô hlăm wưng adiê hjan êa lip lêč mâo ktang phĭt.

Mlam mmăt mbrue 23/11, kahan ƀuôn ƀuôn hgŭm D’Ran, čar Lâm Đồng lŏ dơ̆ng đru kơ mnuih ƀuôn sang mbĕ đuĕ kơ anôk êđăp ênang, lehanăn dŭ mđuĕ ngăn dŏ mơ̆ng anôk dơ̆ng klưh hroh.

Êlâo anăn, hlăk 3h hrue anăn mơh, bruă sang čư̆ êa ƀuôn hgŭm D’Ran ƀuh ti dlông čư̆ Ba Lá Xanh, alŭ Lạc Thiện 2 mâo gru kđang prŏng hŏng boh taih êbeh 300 m, boh prŏng 20–50 cm, mâo leh anôk kdluh truh 1 m ktuê kping čư̆, anăp srăng klưh hroh prŏng, ngă kơ dŭm met kip lăn boh tâo srăng kluh hlăm alŭ wăl mnuih ƀuôn sang hdĭp. leh hmư̆ klei hưn anei, bruă sang čư̆ êa mtrŭt mjhar mtam dŭm pluh gŏ sang mnuih ƀuôn sang pral mđrăm mbĭt hŏng bruă sang čư̆ êa mbĕ đuĕ kơ anôk êđăp ênang, dŭ jih mnơ̆gn mnuă, ngăn dŏ kñăm bi hrŏ klei luič liê kơ mnuih lehanăn ngăn dŏ./.