Dak Lak jing alŭ wăl luč liê kjham hĭn hlăm gưl êa lip mrâo êgao, hŏng klei ksiêm yap tal êlâo brei ƀuh kluôm čar mâo 55 čô djiê, 10 čô luč ka thâo ƀuh, êbeh 150.000 boh sang mnuih ƀuôn sang êngăp êlam, luč liê đăo tĭng êbeh 5.500 êklai prăk.

Ară anei êa hrŏ leh ti jih jang dŭm să, ƀuôn hgŭm nah ngŏ čar, mjing klei găl kơ dŭm êpul mjêč đru kơ mnuih ƀuôn sang. Khua dlăng bruă đảng čar Lương Nguyễn Minh Triết mtă ktrâo lač kơ jih jang êpul đru kơ mnuih knap mñai mbha mnơ̆ng čiăng êdi djŏ anôk, djŏ mnuih, hrăm mbĭt nao kih mdoh wăl hdĭp mda, boh nik ti sang hră, anôk bruă mdrao mgŭn čiăng hnưm kơrŭ wĭt bruă đru kơ mnuih ƀuôn sang. Knơ̆ng bruă lŏ hma leh anăn wăl hdĭp mda, kahan ksiêm čar leh anăn Anôk bruă gĭt gai lĭng kahan čar ba nao leh êpul đru kơ mnuih ƀuôn sang hrui mƀĭn djah djâo, mkra anôk bruă nah gŭ, gĭr hnưm ba klei hdĭp lŏ wĭt msĕ aguah tlam.

Khua Bruă sang čư̆ êa čar Dak Lak Tạ Tuấn Anh mrâo nao truh ti dŭm anôk hmăi kjham čiăng ksiêm dlăng klei đru dŏng leh anăn mgaih msir boh jhat klei êa lêč mơ̆ng Knơ̆ng gĭt gai lĭng kahan čar ngă bruă. Ară anei dŭm êtuh čô knuă druh, lĭng kahan mơ̆ng Trung đoàn 584 leh anăn Trung đoàn 888 dôk đru kơ mnuih ƀuôn sang huai êmiêt lăn lŭ, dăp mnơ̆ng dhơ̆ng, mkra wĭt sang hră, anôk mdrao mgŭn, ngă hdră Kpur pui lĭng kahan - mnuih ƀuôn sang čiăng rơ̆ng mâo djăp mnơ̆ng ƀơ̆ng huă, bi hơĭt klei hdĭp mnuih ƀuôn sang krĭng êa lêč.

Khua Bruă sang čư̆ êa čar mñă kơ dŭm anôk bruă lŏ dơ̆ng nao mbĭt hŏng alŭ wăl, amâo brei mnuih ƀuôn sang ư̆ êpa, mbĭt anăn mñă kơ dŭm knơ̆ng, dhar bruă bi mguôp kjăp hŏng lĭng kahan hlăm bruă bi doh wăl hdĭp mda, bi doh hnoh êa, tĭng mkă klei hmăi leh anăn đru krŭ wĭt bruă mkra mjing, čiăng pral bi hơĭt klei hdĭp, rơ̆ng kơ klei suaih pral leh anăn hdră duh ƀơ̆ng kơ mnuih ƀuôn sang leh klei truh yan adiê.

Ti Gia Lai leh anăn Khánh Hòa, bruă gang mkhư̆ klei ruă tưp leh gưl êa lip dưi pŏk ngă mjêč kñăm răng mgang klei suaih pral êpul êya. Knơ̆ng bruă mdrao mgŭn grăp čar tiŏ nao leh dŭm pluh čô knuă druh, phung mă bruă nao ti dŭm să êngăp êlam čiăng mdjiê kman, msir mgaih phŭn êa yua, ktrâo atăt mnuih ƀuôn sang hrui mƀĭn djah djâo, mkhư̆ klei tưp lar klei ruă.

Êlâo anăn, Phŭn bruă mdrao mgŭn ba nao leh giăm 10 ton êa drao mdiê kman hlăm êa leh anăn dŭm êbâo hruh êa drao kơ gŏ sang đru ti Khánh Hòa, Gia Lai, Dak Lak mdrơ̆ng leh gưl êa lip. Bruă mdrao mgŭn mtă kơ mnuih ƀuôn sang amâo yua ôh êa ka msir mgaih, mđĭ bi doh pưk sang, war êning, mbĭt anăn bi hgŭm hŏng anôk bruă djŏ tuôm ktuê dlăng leh anăn ƀuh hnưm klei bi knăl amâo jăk.