VOV4.Êđê - Phŭn bruă mdrao mgŭn tĭng srăng mkăp “Hộ chiếu vaccine” mphŭn mơ̆ng hruê 15/4 kơ anăp čiăng mjing klei găl kơ mnuih ƀuôn sang nao kơ ala tač êngao. Anei jing klei hưn ti Anôk bi kƀĭn online mâo Phŭn bruă mdrao mgŭn mkŏ mjing kơ bruă hluê ngă hră mkăp “Hộ chiếu vaccine” lehanăn bi mklă bruă tlŏ vaccine Covid 19. Tĭng truh hruê 1/4, kluôm ala tlŏ leh êbeh 200 êklăk hnơ̆ng vaccine gang mkhư̆ Covid 19. Hnơ̆ng luôm vaccine kơ mnuih mơ̆ng 18 thŭn kơ dlông tlŏ aruăt tal 1 mâo 100%, aruăt tal 2 mâo 99% lehanăn ênoh mnuih tlŏ leh aruăt tal 3 mâo hlăm brô 50%. Hŏng mnuih mơ̆ng 12 truh 17 thŭn, tlŏ aruăt tal 1 mâo 99% lehanăn aruăt tal 2 mâo 94%. Phŭn bruă mdrao mgŭn lehanăn dŭm alŭ wăl dôk mprăp lŏ tlŏ aruăt mñă wĭt kơ phung hđeh mơ̆ng 5 truh kơ gŭ 12 thŭn. Hlăm wưng anei, dŭm anôk tlŏ mgang hlăm kluôm ala dôk mprăp djăp mta klei čiăng mkăp “Hộ chiếu vaccine” kơ mnuih ƀuôn sang tĭng mphŭn hluê ngă mơ̆ng hruê 15/04 ti anăp. “Hộ chiếu vaccine” srăng dưi hưn mdah ti mta ứng dụng Sổ Sức khỏe điện tử, PC-Covid amâo dah ksiêm dlăng hlăm mbah hâo hưn điện tử mơ̆ng Phŭn bruă mdrao mgŭn./. 

H’Nêč pô mblang