Êlan dơ̆ng êran pral Quy Nhơn - Pleiku mâo boh taih 125 km, găn 16 să, ƀuôn hgŭm; dưi mkra mjing hnơ̆ng 4 grông êdeh, hnơ̆ng êran 100km/mmông, hŏng hnơ̆ng bi liê giăm 44 êbâo êklai prăk. Anei jing hdră bruă mâo bruă sang čư̆ êa leh anăn mnuih ƀuôn sang čar Gia Lai čang hmăng srăng mjing boh kdrŭt mkra mđĭ mkŏ êlan klông, mđĭ bruă mnia blei leh anăn mđĭ kyar bruă duh mkra- ala ƀuôn alŭ wăl. Kyua klei yuôm bhăn anăn, hdră pŏk ngă mâo klei mnuih ƀuôn sang hlăm krĭng hmăi djŏ sa ai.

Lu gŏ êsei mâo lăn hlăm klei hrui mă pral bi hgŭm, hnưm jao anôk ala čiăng kơ hdră bruă dưi pŏk ngă găl ênưih. Bruă sang čư̆ êa dŭm să, ƀuôn hgŭm mâo êlan dơ̆ng êran pral Quy Nhơn - Pleiku găn ăt dôk gĭr pŏk ngă bruă ruh mgaih anôk ala čiăng hnưm ba jao kơ anôk bruă rŭ mdơ̆ng. Čiăng pŏk ngă Êlan dơ̆ng êran pral Quy Nhơn - Pleiku brei ruh mgaih anôk ala êbeh 942 ha, hŏng ênoh bi liê tla hnô, đru brei đăo tĭng êbeh 4.700 êklai prăk.