VOV4.Êđê - Tlam mbruê 22/4, k’iăng Khua knŭk kna Vũ Đức Đam gĭt gai leh klei kƀĭn kơ bruă mprăk mkŏ mjing klei bi lông mjuăt ktang asei mlei Ngŏ Dhŭng Asi gưl tal 31 (lŏ pia Sea Games 31). Hluê si êpul mkŏ mjing, truh kơ ară anei, dŭm mta bruă mprăp kơ Sea Games 31 jing leh sơăi, mprăp kơ klei bi lông mjuăt ktang asei mlei prŏng hĭn hlăm alŭ wăl. Êpul mkŏ mjing Sea Games 31 bi klă leh anăn gĭt gai dŭm hdră êlan rơ̆ng klei êđăp ênang, bruă mdrao mgŭn leh anăn ksiêm dlăng doping, gang mkhư̆ klei ruă tưp Covid-19, bruă đru leh anăn bruă yang ƀuôn, êlan klông, mtô mjuăt phung čŏng ngă bruă, mprăp pŏk kčưm leh anăn bi ruê̆…

K’iăng Khua knŭk kna Vũ Đức Đam gĭt gai čiăng ruh mgaih dŭm klei dleh kpăk hlăm bruă mprăp kơ Sea Games 31. Klă klơ̆ng jing bruă mprăp kơ knăm pŏk kčưm, bi ruê̆, mkăp brei êdeh dŭ mdiăng đru kơ dŭm êpul mjuăt ktang asei mlei. K’iăng Khua knŭk kna mtă kơ dŭm phŭn, dhar bruă, alŭ wăl lŏ dơ̆ng bi mguôp kjăp, mâo boh tŭ dưn čiăng mgaih msir mtam dŭm klei dleh dlan hluê si djŏ klei dưi, boh nik jing dŭm hră mơar knŭk kna, mjêč bi leh dŭm bruă klam dưi jao leh, mkŏ mjing jăk, tŭ jing Sea Games 31.

Y-Ƀel pô mblang