VOV4.Êđê- Ƀri gưl nao čhưn klă klơ̆ng ti Việt Nam mơ̆ng Khua Hạ viện India Om Birla, tlam hruê 19/4, Anôk bruă êlan phiơr Vietjet mkŏ mjing leh Knăm hưn mthâo dŭm gưl phiơr mrâo truh ti India, mâo Hà Nội – Mumbai, ƀuôn prŏng Hồ Chí Minh- Mumbai, Phú Quốc - New Delhi lehanăn Phú Quốc - Mumbai, kruăk hdră lŏ krŭ wĭt lehanăn lŏ pŏk hdră mă bruă mơ̆ng anôk bruă êlan phiơr ti ala čar 1 êklai 400 êklăk čô mnuih ƀuôn sang anei.

Hdră anei dưi hưn mthâo hŏng klei nao hgŭm mơ̆ng Khua anôk bruă kƀĭn ala Vương Đình Huệ, Khua Hạ viện India Om Birla, K’iăng khua knŭk kna Lê Minh Khái. Dŭm gưl phiơr mơ̆ng ƀuôn prŏng Hồ Chí Minh lehanăn Hà Nội truh ti Mumbai srăng dưi mphŭn kčưm mơ̆ng hruê 2/6 lehanăn 3/6, hŏng hnơ̆ng 4 gưl phiơr wĭt nao grăp hruê kăm. Ktuê êlan phiơr Phú Quốc - Mumbai hŏng hnơ̆ng 4 gưl phiơr wĭt nao grăp hruê kăm lehanăn êlan phiơr Phú Quốc – New Delhi hŏng hnơ̆ng 3 gưl phiơr wĭt nao grăp hruê kăm, mphŭn kčưm mơ̆ng hruê 8/9 lehanăn 9/9.

                                                   Pô mblang: H’Nêč Êñuôl