Aguah 8/10, ti Anôk bruă Đảng gưl dlông, leh êbeh 2 hruê mă bruă hŏng klei mjêč, klă mngač, ngă phŭn mil pô, đua klam, Klei bi kƀĭn tal 13 Anôk kriê dlăng bruă Đảng gưl dlông tal 13 mjưh ruê̆. Blŭ hrăm ti knăm anei, Khua gĭt gai Đảng Tô Lâm lač klă, Klei bi kƀĭn tal 13 Anôk kriê dlăng bruă Đảng gưl dlông tal XIII ngă leh jih bruă mâo kčah jao.

Ti anôk bi kƀĭn, grăp bruă mâo mprăp ênŭm, bi trông klă klơ̆ng, msir mghaih jih mâo lu klei sa ai, hlăm anăn mâo lu bruă djŏ tuôm kơ klei tŭ jing mơ̆ng Klei bi kƀĭn phung bi ala bruă Đảng kluôm ala čar tal XIV, mđing truh kơ mta kñăm mđĭ kyar pral, hơĭt kjăp, truh kơ bruă mkra mđĭ klei hdĭp mnuih ƀuôn sang. Klei bi kƀĭn tal anei mđing bi trông klă mngač, kreh knhâo lehanăn mâo lu klei sa ai hlăm dŭm hdră êlan mtrŭn yuôm bhăn. Hlăm anăn, Anôk kriê dlăng bruă Gưl dlông bi mklă leh dŭm mta hră mơar ba mdah kơ Klei bi kƀĭn tal XIV mơ̆ng Đảng, tŭ ư hưn mthâo phung khua hlăm Anôk kriê dlăng bruă Gưl dlông lehanăn Dhar bruă ksiêm dlăng Gưl dlông tal XIV; brei klei blŭ kơ wưng, mta phŭn, hdră ngă, klei bhiăn mă bruă lehanăn ruah khua hlăm Klei bi kƀĭn bruă Đảng kluôm ala čar tal XIV hŏng hdră djŏ klei bhiăn, mlih mrâo, kreh knhâo, tŭ dưn, klă sĭt./.