Hưn mdah ti anăp bruă Kƀĭn ala, k’iăng knŭk kna Lê Minh Khái brei thâo, dŭm mlan akŏ thŭn 2024, bruă duh mkra mâo klei hơĭt, klei prăk luč ênoh dưi ksiêm dlăng. Klei đĭ kyar GDP wưng tlâo mlan tal 1 thŭn 2024 mâo 5,66%, lu hĭn hlăm wưng thŭn 2020 – 2023. Yap truh jih thŭn 2023, mkăp brei leh hlăm brô 680.000 êklai prăk čiăng hluê ngă hdră êlan prăk mlan mrâo.

Bi kơ bruă klam, hdră êlan phŭn, k’iăng Khua knŭk kna lač klă 11 êpul hdră êlan srăng ngă hlăm wưng kơ anăp, hlăm anăn mđĭ tal êlâo, mtrŭt mđĭ klei đĭ kyar bruă duh mkra hnơ̆ng prŏng, bi mguôp kjăp, tŭ dưn, bi kna dŭm hdră êlan gĭt gai bruă duh mkra hnơ̆ng prŏng. Mbĭt hŏng anăn, lŏ dơ̆ng bi kluôm bruă knŭk kna ênuah ênô, khuăt, tŭ dưn, mlih mrâo bruă kriê dlăng phung mă bruă knŭk kna, mkŏ mjing êpul knuă druh, phung mă bruă knŭk kna ênuah ênô, mâo klei thâo, jing phung kpă ênô, klă sĭt jing mnuih mă bruă kơ mnuih ƀuôn sang, hluê ngă hdră êlan prăk mlan mrâo mơ̆ng hruê 1/7/2024.