VOV4.Êđê- Aguah 7/4, ti Ninh Thuận, dua čar Lâm Đồng leh anăn Ninh Thuận bi siñê Hdră bi hgŭm mđĭ kyar hiu čhưn ênguê wưng 2022-2025, hlăm anăn mâo klei mkŏ ƀuôn prŏng mnga Đà Lạt hŏng krĭng hiu čhưn ênguê Ninh Chữ. Hlăm hdră bi hgŭm mđĭ kyar hiu čhưn ênguê Ninh Thuận - Lâm Đồng wưng 2022-2025, 2 alŭ wăl bi trông, mguôp klei blŭ mkŏ mjing mnơ̆ng dhơ̆ng hiu čhưn ênguê mơ̆ng dŭm tĭng; mkŏ mjing leh anăn mđĭ kyar bi lu jơr dŭm mta mnơ̆ng dhơ̆ng hiu čhưn ênguê, mkŏ dŭm anôk hiu čhưn ênguê čiăng iêô jak tuê hiu čhưn. Ninh Thuận mâo klei găl hiu čhưn ênguê lu hŏng mnơ̆ng dhơ̆ng mdê hjăn mơ̆ng krĭng êa ksĭ, čư̆ čhiăng leh anăn dhar kreh mnuih djuê ana Chăm, Raglai. Bi Lâm Đồng snăn mâo klei găl kơ hiu čhưn ênguê mdê hjăn hŏng yan adiê êăt leh anăn klei găl mdei msăn. Mbĭt anăn, êlan mkŏ Ninh Thuận- Lâm Đồng ăt jing sa anôk hiu čhưn ênguê. Dua alŭ wăl srăng hnưm mkŏ mjing tuôr hiu čhưn ênguê “1 hdră nao 3 anôk truh” jing Đà Lạt – Phan Rang– Nha Trang, drông tuê ti tač êdeh phiơr Liên Khương leh anăn atăt tuê wĭt ti tač êdeh phiơr Cam Ranh, hŏng dŭm mnơ̆ng dhơ̆ng hiu čhưn ênguê jăk siam čiăng iêô jak leh anăn bi sui wưng tuê dôk jưh.

Pô mblang: H’Zawut Ƀuôn Yă