Ară anei kluôm ala mâo êbeh 86 êbâo êpul răng mgang klei êđăp ênang hŏng êbeh 276 êbâo čô. Leh 1 thŭn pŏk ngă Klei bhiăn êpul răng mgang klei êđăp ênang hlăm ƀuôn sang, boh tŭ êdah êdi jing boh klei êđăp ênang hlăm ƀuôn sang dưi krơ̆ng kjăp, phung ngă soh hrŏ; lu alŭ wăl čih yap boh klei êđăp ênang hlăm êlan klông hrŏ klă klơ̆ng, phung ngă soh dưi msưh kdŭn; hdră jih jang mnuih ƀuôn sang răng mgang klei êđăp ênang čar kwar ƀrư̆ klă sĭt, đru mkŏ mjing, mkra mđĭ klei êđăp ênang yang ƀuôn hŏng klei răng mgang klei êđăp ênang jih jang mnuih ƀuôn sang ƀrư̆ kjăp hĭn…

Mđup brei klei bi mklă bi mni kơ phung êdah êdi hlăm Klei bi kƀĭn, Khua knŭk kna Phạm Minh Chính hơêč hmưi leh anăn bi mklă klei đru mguôp yuôm bhăn mơ̆ng êpul hgŭm răng mgang klei êđăp ênang ti nah gŭ - êpul bi tuôm grăp hruê hŏng mnuih ƀuôn sang. Wăt tơdah snăn, Khua knŭk kna lač klă, hnơ̆ng đru grăp mlan kơ êpul anei ti đa đa anôk adôk bbiă; kdrăp mnơ̆ng đru adôk dleh dlan… Ñu mtă ksiêm hriăm kčĕ kơ êpul hgŭm răng mgang klei êđăp ênang nah gŭ. Phŭn bruă kahan ksiêm brei mđing uêñ mtô mjuăt, hriăm mjuăt mđĭ klei thâo săng hdră bhiăn, bruă knuă; lŏ dơ̆ng ksiêm dlăng, mđĭ pral bruă mprăp kdrăp mnơ̆ng kơ êpul čiăng ngă djŏ klei čiăng bruă klam.