Hruê anei (25/7), Anôk dlăng bruă Đảng gưl dlông Đảng Cộng sản Việt Nam, Bruă kƀĭn ala Ala čar yang ƀuôn ngă phŭn Việt Nam, Khua lăn čar Ala čar yang ƀuôn ngă phŭn Việt Nam, Knŭk kna Ala čar yang ƀuôn ngă phŭn Việt Nam, Khua bruă mặt trận čar kwar Việt Nam leh anăn gŏ sang mkŏ mjing knăm čang ênuh Khua gĭt gai Đảng, Khua gĭt gai bruă Đảng kahan gưl dlông Nguyễn Phú Trọng.Knăm čang ênuh Khua gĭt gai Đảng Nguyễn Phú Trọng dưi mkŏ mjing hŏng klei bhiăn čang ênuh gưl ala čar. Anôk bruă čang ênuh mâo 35 čô kyua Khua lăn čar Tô Lâm ngă khua.

Anôk bruă mkŏ mjing čang ênuh mâo 27 čô, mâo Khua hlăm bruă kđi čar, Khua hlăm Anôk dlăng bruă Đảng Lương Cường ngă Khua Anôk bruă. Knăm čang Khua gĭt gai Đảng Nguyễn Phú Trọng dưi mkŏ mjing ti Sang čang ênuh ala čar mrô 5 Trần Thánh Tông, ƀuôn prŏng Hà Nội, mphŭn mơ̆ng 7h agauh truh 10 mmông tlam 25/7/2024 leh anăn mơ̆ng 7 mmông aguah truh 1 mmông tlam 26/7/2024. Knăm bi hdơr Khua gĭt gai Đảng Nguyễn Phú Trọng dưi mkŏ mjing hlăm wưng anei ti Anôk bi kƀĭn Thống Nhất, ƀuôn prŏng Hồ Chí Minh leh anăn ti ƀuôn sang Đông Hội, kdriêk Đông Anh, ƀuôn prŏng Hà Nội. 

Hlue si klei hâo hưn klă sĭt, Anôk mkŏ mjing knăm čang ênuh srăng mjing klei găl kơ mnuih ƀuôn sang nao čang Khua gĭt gai Đảng Nguyễn Phú Trọng. Êlâo kơ nao čang, mnuih ƀuôn sang ba hră kak asei mâo chip điện tử amâodah đĭng blŭ thâo mĭn dưm VNeID hnơ̆ng 2 čiăng ksiêm dlăng mrô QR. Kahan ksiêm ƀuôn prŏng Hà Nội dăp leh klei găl čiăng êdi ti grăp anôk dưm masin ksiêm dlăng mrô QR kơ mnuih ƀuôn sang găl ênưih tơdah nao čang Khua gĭt gai Đảng Nguyễn Phú Trọng.

Gŏ sang Khua gĭt gai Đảng Nguyễn Phú Trọng mni lač jăk kơ jih jang mnuih ƀuôn sang kluôm ala leh anăn ƀĭng găp kluôm rŏng lăn mơĭt leh asăp bi juh hŏng Khua gĭt gai Đảng Nguyễn Phú Trọng djiê.

Sang mđung asăp blŭ Việt Nam (VOV) mđung mmông anăn mtam knăm čang ênuh Khua gĭt gai Đảng Nguyễn Phú Trọng leh anăn hdră mđung mdê hjăn "Khua gĭt gai Đảng Nguyễn Phú Trọng: Mnuih mơ̆ng yang ƀuôn, Mnuih mơ̆ng hƀuê ênuk” mơ̆ng 6h50 mnĭt truh 9h15 mnĭt hruê 25/7/2024 hlăm hdră mđung asăp VOV1, VOV2, VOV3; mđung rup hlăm mmông anăn mtam hlăm hdră mđung rup VTC1, VOVTV; mđung hlăm Hră klei mrâo điện tử VOV, VTC News leh anăn dŭm hdră mđung hlăm hla pŏk web ala ƀuôn.