Lŏ hdơr kơ klei mơak dŭm hruê hlăm ai êwa kluôm lăn čar bi hdơr 78 thŭn hruê mkŏ mjing lăn čar hruê 2/9/2023, ung mô̆ Hoàng Minh Lý, 79 thŭn, ti alŭ 8, să knông lăn Ea Bŭng, kriêk Ea Sup ăt dôk hdơr nanao. Wưng anei, dua čô ung mô̆ mâo Kđông kahan ƀăng jang knông lăn Dak Ruê mbĭt hŏng đa đa phung mâo ai tiê kmah mđup brei sang hơuh mđao knông lăn” mâo ênoh 80 êklăk prăk. Ñu yăl dliê, truh ti thŭn mduôn khua lŏ tuôm hŏng klei ruă duam, dưi mâo sa boh sang dôk jing klei hmăng hmưi jih klei hdĭp:

 “Kâo mơak êdi, mơak kyua mâo phung lĭng kahan knông lăn iêo mthưr phung mâo ai tiê kmah đru kơ gŏ sang kâo, rŭ mjing kơ kâo sa boh sang dôk hơuh mđao krĭng knông lăn. Leh rŭ mdơ̆ng sang, kâo amâo mâo lŏ uêñ kơ sang ƀrôč, angĭn thŭt. Kâo mâo sang dôk jăk srăng dưi bi hơĭt klei suaih pral leh anăn bi kdung thŭn hdĭp”.

Ea Bŭng jing sa hlăm 3 să knông lăn ti kdriêk Ea Sup. Hlăm să mâo 1.053 gŏ sang hŏng êbeh 4.100 čô mnuih ƀuôn sang, hlăm 8 djuê ana hdĭp mda. Klei êđăp ênang hlăm alŭ wăl dưi rơ̆ng kjăp, klei hdĭp mnuih ƀuôn sang dưi mđĭ hĭn. Trần Thanh Thản, khua dhar bruă mặt trận să Ea Bŭng brei thâo, mâo boh tŭ dưn msĕ ară anei kyua mâo klei đru mơ̆ng êpul lĭng kahan ƀăng jang knông lăn Dak Ruê:

 “Grăp thŭn phung lĭng kahan pŏk dŭm gưl mtrŭt mjhar bruă răng mgang klei êđăp ênang krĭng knông lăn, hluê ngă bruă mtô kơ mnuih ƀuôn sang đru kơ mnuih ƀuôn sang pla mdiê lŏ hnơ̆ng tŭ jăk, hdră rông êmô mjeh. Mbĭt anăn, hlăm dŭm knăm mơak, Tết grăp thŭn mâo klei čuă êmuh, mđup brei mnơ̆ng kơ gŏ sang ƀun ƀin, gŏ sang knŭk kna dlăng ba, mđĭ ai diñu mơak yan mnga drông Tết mâo klei hơuh mđao.”

Kđông kahan ƀăng jang knông lăn Dak Ruê ară anei dôk răng kriê hlăm brô 8 km êlan knông lăn leh anăn gơ̆ng knông lăn mrô 42 ti să Ea Bŭng, kdriêk Ea Sup, čar Dak Lak, bi knông hŏng čar Muldulkiri, Campuchia. Thượng tá Phạm Đức Khá, khua bruă kđi čar kđông kahan ƀăng jang knông lăn Dak Ruê brei thâo, dŭm thŭn êgao, mbĭt hŏng bruă klam răng mgang klei dưi kiă kriê knông lăn ala čar, phung knuă druh, lĭng kahan lŏ mkŏ mjing kjăp klei đăo knang hlăm ai tiê mnuih ƀuôn sang.

Hŏng hdră “Kđông kahan jing sang, knông lăn jing ƀuôn, mnuih ƀuôn sang dŭm djuê ana jing ayŏng adei”, anôk bruă hluê ngă tŭ dưn bruă đru bi hơĭt klei hdĭp yang ƀuôn hŏng dŭm hdră msĕ si: Rông ba amĭ Việt Nam jhŏng ktang, anak rông kđông kahan knông lăn, đru adei nao sang hră, hruê mơak klŏ điŏ mtah, rŭ mjing sang hơuh mđao krĭng knông lăn, đru mđĭ kyar bruă duh mkra, bi hrŏ ƀun lăm klei ư̆ êpa. Mbĭt hŏng anăn, anôk bruă lŏ đru kơ nah gŭ, đru kơ bruă Đảng nah gŭ, bruă sang čư êa alŭ wăl hlăm bruă mkŏ mkra krĭng ƀuôn sang mrâo, đru kčĕ mkŏ mjing bruă Đảng nah gŭ kjăp kluôm dhuôm, hluê ngă tŭ dưn dŭm hdră êlan mơ̆ng Đảng, knŭk kna. Thượng tá Phạm Đức Khá brei thâo:

          “Ară anei hmei mâo 16 čô đảng viên hlăm êpul ngă bruă mbĭt hlăm 6 alŭ ƀuôn, leh anăn 16 čô dưi jao bruă klam đru kơ dŭm gŏ sang ƀun krĭng knông lăn. Hŏng êpul êya anei, hmei jêñ jêñ gĭt gai čiăng thâo klă dŭm anôk bruă Đảng nah gŭ čiăng hluê ngă dŭm hdră trŭn mơ̆ng alŭ wăl, si srăng ngă čiăng nao klă hŏng boh sĭt. Hluê anăn, đru kčĕ kơ gưl bruă Đảng nah gŭ dŭm gưl mbĭt hŏng alŭ wăl mkŏ mjing să ƀrư̆ hruê ƀrư̆ kjăp, mnuih ƀuôn sang ti alŭ wăl ƀrư̆ hruê ƀrư̆ mâo klei hdĭp yâo mơak hĭn.”

Klei đru mơ̆ng êpul lĭng kahan knông lăn đru leh kơ Ea Bŭng jing sa knông lăn tal êlâo ti čar Dak Lak truh hnơ̆ng krĭng ƀuôn sang mrâo ti thŭn 2021. Klei hdĭp ƀrư̆ hruê ƀrư̆ đĭ, mnuih ƀuôn sang hur har mbĭt hŏng êpul lĭng kahan knông lăn răng mgang klei êđăp ênang, răng mgang kjăp klei dưi kiă kriê, klei êđăp ênang krĭng knông lăn./.