VOV4.Êđê- Aguah hruê 10/6, ti ƀuôn prŏng Ƀuôn Ama Thuôt, čar Dak Lak mkŏ mjing leh Knăm kuôl kă klei bi hgŭm bruă mkŏ mjing Klei bi kƀĭn trông mlih mrâo krĭng Lăn dap kngư. Anei jing 1 hlăm dŭm klei mĭn mrâo mơ̆ng Knŭk kna Australia hlăm hdră bi hgŭm plah wah Phŭn bruă hŏng tač êngao lehanăn Mnia mblei Australia, Êpul bruă ksiêm hriăm kreh knhâo lehanăn tuh tia mkra mjing êpul đĭ kyar mƀĭt (CSIRO) lehanăn Phŭn bruă Kreh knhâo – kdrăp mrâo Việt Nam. Êma čar, Dak Lak, Dak Nông, Gia Lai, Kon Tum lehanăn Lâm Đồng mbĭt hŏng CSIRO bi mklă leh Klei kuôl kă hgŭm bruă mơ̆ng Klei bi kƀĭn trông mlih mrâo krĭng Lăn dap kngư.

Mta kñăm mơ̆ng klei kƀĭn trông jing mtrŭt mđĭ hdră mlih mrâo čiăng đru đĭ kyar h’ĭt kjăp, bi knar plah wah anôk bruă lŏ hma lehanăn bruă mkra mjing mnơ̆ng lŏ hma ti alŭ wăl. Hlăm 3 thŭn, dŭm tĭng srăng pŏk mlar lehanăn mđĭ hĭn klei găl dưi bi mjĕ klei hâo hưn lehanăn hưn dŭm boh tŭ dưn klei mlih mrâo mjing klei găl hlăm lehanăn êngao dŭm klei kƀĭn trông; Mtrŭt mđĭ bruă hưn mdah dŭm klei mĭn mrâo, hrăm mbĭt duh bi liê lehanăn mkra dŭm hdră bi hgŭm bruă, ksiêm hriăm kñăm mđĭ hĭn klei găl bi ktưn dŭm mta mnơ̆ng dhơ̆ng ba čhĭ kơ ala tač êngao hlăm bruă lŏ hma lehanăn mkra mjing mơ̆ng mơ̆ng bruă lŏ hma hlăm krĭng…

                                                    Pô mblang: H’Nêč Êñuôl