VOV4.Êđê Hruê mbruê 19/8, ti čar Ninh Thuận, Phŭn bruă tuh tia mkŏ mjing klei kƀĭn trông dhar bruă tuh tia 15 čar, ƀuôn prŏng alŭ wăl krĭng kwar krah – krĭng Lăn Dăp Kngư gưl tal 8. Hruê mmông êgao, 15 čar, ƀuôn prŏng ti alŭ wăl krĭng kwar krah – krĭng Lăn Dăp Kngư dưi mâo lu boh tŭ kdlưn hĭn hlăm lu mta bruă. Boh nik, thŭn 2021, mâo 2 alŭ wăl dôk hlăm Top 5 čar, ƀuôn prŏng mâo hnơ̆ng đĭ kyar GRDP kdlưn hĭn hlăm kluôm ala jing Gia Lai 9,71%; Ninh Thuận 9% (kluôm ala đĭ 2,58%).

Êngao kơ dŭm boh tŭ dưn dưi mâo, klei mkra mjing bruă tuh tia, mnia mblei mơ̆ng dŭm alŭ wăl ăt dôk mâo dŭm klei dleh kpăk, boh nik jing hlăm klei bhiăn ala čar, hdră êlan leh anăn bruă mkŏ mjing klei bi mguôp krĭng, mkŏ wăl đĭ kyar. Čiăng mgaih msir dŭm klei anăn, klei kƀĭn kñăm bi trông, kah mbha klei thâo kñăm ruh mgaih dŭm klei dleh dlan, kpăk gun djŏ tuôm hŏng bruă kriê dlăng mơ̆ng knŭk kna kơ dŭm alŭ wăl, hluê anăn dưi mâo dŭm hdră êlan mtrŭt mđĭ klei mkra mjing, mnia mblei, mkŏ mjing klei bi mguôp, klei đru hlăm bruă mđĭ kyar bruă tuh tia grăp čar, ƀuôn prŏng leh anăn kluôm alŭ wăl.

Y-Bel pô mblang