VOV4.Êđê- Mlan hđeh êdam êra thŭn 2022 mâo akŏ “hlăk thŭn mda thâo mbruă”. Mbĭt hŏng ala čar, phung hđeh êdam êra alŭ wăl Krĭng Lăn Dap Kngư dôk mâo lu bruă ngă klă klơ̆ng, mđing truh kơ nah gŭ.

“Mlan phung êdam êra” thŭn anei mâo Bruă êdam êra čar Dak Lak mkŏ mjing knăm trŭn ngă bruă ti să Drai Bhăng, kdriêk Čư̆ Kuin. Ti knăm pŏk ngă, bruă êdam êra čar Dak Lak mđup brei hdră kuič mngač êlan ƀuôn sang ti să Ea Tiêu leh anăn hdră “Gru bi hmô 3 jăk” ti sang hră gưl 3 Y Jut. Brei čan 150 êklăk prăk čiăng msir mgaih bruă mă kơ phung êdam êra kdriêk Čư̆ Kuin, Mđup brei 1 boh sang klei khăp leh anăn mđup brei 40 hnư mnơ̆ng, grăp hnư mâo 300 êbâo prăk, 20 boh êdeh wai jơ̆ng kơ dŭm gŏ sang dleh dlan leh anăn phung hđeh sang hră ƀun hriăm thâo. Bruă êdam êra kdriêk Čư̆ Kuin ăt ba jao 1 boh sang klei khăp kơ gŏ êsei ƀun, 1 gru hmô tač hlăp kơ phung hđeh leh anăn mphŭn rŭ mdơ̆ng 1 tač pah boh.

Mđup brei hră êdam êra leh anăn Anăn knăl êdam êra kơ phung êdam êra mrâo ti Kon Tum

Amai H Giang Niê, Khua dlăng bruă êdam êra čar Dak Lak brei thâo, hŏng hdră kñăm mjing ai êwa bi lông ktưn kdrưh kơăm, kkuh drông dŭm bruă kđi čar prŏng hlăm thŭn, hlăm klei găl hmaĭ kyua klei ruă tưp, phung mda asei Dak Lak kčah leh dŭm hnơ̆ng čuăn klă klơ̆ng mguôp hŏng boh sĭt ti alŭ wăl, mbruă pŏk ngă dŭm bruă ngă čiăng bi leh hdră kñăm kčah leh anăn rơ̆ng êđăp ênang gang mkhư̆ klei ruă tưp.

 “Akŏ mlan phung êdam êra thŭn anei jing “phung mda asei thâo mbruă”, mta phŭn mbruă mâo lu mta, hlăm anăn mâo klei mbruă mkŏ mjing bruă ngă, boh nik hlăm hdră mdrơ̆ng mbruă hŏng klei ruă tưp leh anăn mkŏ mjing tŭ jing klei bi kƀĭn phung êdam êra wưng thŭn 2022-2027. Hŏng dŭm gưl bruă êdam êra brei bi hgŭm, hrăm mbĭt sa ai tiê iêô mkrum djăp klei găl čiăng đru kơ êpul êdam êra leh anăn phung êdam êra hlăm kluôm čar leh anăn gĭr hĭn hlăm bruă hlue ngă tŭ jing 11 hnơ̆ng kčah mơ̆ng mlan êdam êra leh anăn dŭm hnơ̆ng kčah thŭn 2022.”

 Hlăm mlan phung êdam êra, phung mda asei čar Dak Lak gĭr bi leh 5 km kuič mngač êlan ƀuôn sang, ksiêm mkă, mbha êa drao amâo mă prăk kơ 2 êbâo gưl mnuih ƀuôn sang; pŏk ngă ƀiă êdi 10 anôk bi kƀĭn, tač hlăp kơ phung hđeh ti să dleh dlan, mkŏ mjing 5 boh sang klei khăp, sang bi đru, sang čhiăm băk hrah. Lŏ dơ̆ng hrăm mbĭt hŏng phung êdam êra čŏng ngă bruă, iêô jak mkŏ mjing 1-2 êpul hgŭm bruă, êpul bi hgŭm đru dŭm bruă phung êdam êra mphŭn čô kơ bruă hlăm čar.

 Ti wăl krah Plei Kần, kdriêk Knông lăn Ngọc Hồi, bruă êdam êra čar Kon Tum ăt mkŏ mjing leh Knăm pŏk ngă mlan êdam êra leh anăn bruă “Mlan 3 knông lăn – Knông lăn čar kwar kâo”. Hlăm knăm pŏk ngă mtam, bruă êdam êra čar Kon Tum ăt mđup brei leh 20 kdô mnơ̆ng đru kơ gŏ sang phung knuă druh, mđup brei hră êdam êra leh anăn anăn knăl êdam êra kơ 50 čô êdam êra mrâo, hưn mtâo 20 čô êdam êra êdah kdlưn kơ gưl bruă Đảng ksiêm dlăng mbŏ bi mŭt hlăm Đảng...

 Gưl anei Êpul êdam êra leh anăn Êpul hgŭm phung mniê kahan ksiêm mđup brei 10 gru hmô mđĭ kyar bruă duh mkra mâo 1000 drei mnŭ mboh lu kơ 10 gŏ sang knŭk kna dlăng ba, gŏ sang mâo klei hdĭp dleh dlan, phung đaŏ hlăm krĭng mnuih djuê ƀiă. Mđup brei 3 boh maĭ tĭng, 200 hnư mnơ̆ng (hdruôm mơar, giê čih) leh anăn mkŏ mjing hdră “Êa doh kơ adei” ti sang hră Gưl 1 să Pờ Y, kdriêk Ngọc Hôì, čar Kon Tum. Mđup brei 6 kdrăp maĭ tĭng, 200 hnư mnơ̆ng (hdruôm mơar, giê čih) kơ 2 anôk hriăm ti ƀuôn Phu Cưa leh anăn 16 kdrăp maĭ tĭng kơ 8 anôk bruă kahan ksiêm ti čar Attapư, ala čar Lao.

Bruă êdam êra čar Dak Lak pŏk ngă dŭm hdră bruă êdam êra

 Ti Gia lai, mlan êdam êra thŭn anei mâo bruă êdam êra čar Gia Lai mkŏ mjing mphŭn pŏk ti să Ia Trôk, kdriêk Ia Pa. Ti knăm pŏk ngă, bruă êdam êra čar Gia Lai mđup brei 135 hnư mnơ̆ng kơ phung hđeh sang hră, mđup brei 1 gru hmô “anôk dlăng hră, bi tuôm leh anăn bi kƀĭn Đội” mâo ênoh 50 êklăk prăk mđup brei rup krah bi hmô 2 boh sang “chiăm băk hrah” kơ 2 čô hđeh mâo klei hdĭp dleh dlan. Êngao anăn, anôk bruă ăt mkŏ mjing hlue ngă lu hdră ngă bruă kơ êpul êya msĕ si: Myơr êbeh 400 anôk bruă đru kơ mnuih knap mñai, đru hrue ai mă bruă, mkra êlan klông ƀuôn sang, mkŏ mjing sang bi đru. Ayŏng Đỗ Duy Nam, K’iăng Khua bruă êdam êra čar Gia Lai brei thâo, dŭm bruă ngă mlan êdam êra thŭn 2022 dưi pŏk ngă êlam mơ̆ng nah gŭ, bi êdah klei jih ai tiê mơ̆ng phung êdam êra, rơ̆ng dŭm bruă ngă mâo klei tŭ dưn jăk.

 “Anôk dlăng bruă êdam êra čar ăt mâo leh hdră mtrŭn dŭm bruă ngă, dŭm hdră ngă bruă snăn gĭt gai kơ alŭ wăl hlue si bruă ngă, hlue si hdră mâo, kdrêč bruă čiăng rơ̆ng ênoh mnuih mă bruă, pral hlăm bruă tiŏ nao phung knuă druh êdam êra đru hgŭm. Si bĕ ngă čiăng kơ hdră ngă bruă anăn rơ̆ng hnơ̆ng pral leh anăn hnơ̆ng jăk, boh nik dŭm bruă hâo hưn mtô mblang kkuh drông mlan phung êdam êra leh anăn boh nik kkuh drông Klei bi kƀĭn phung êdam êra dŭm gưl.”

 Hŏng akŏ “Phung mda asei thâo mbruă”, mlan êdam êra thŭn anei mâo Êpul êdam êra gưl dlông CS HCM mkŏ mjing knăm pŏk ngă ti ƀuôn prŏng phŭn Hà Nội. Tinei dôk mkŏ mjing klei rang mdah mbruă “phung êdam êra thâo mbruă”, mphŭn mkŏ mjing dŭm hdră mă bruă, msĕ si Sang čhiăm băk hrah leh anăn mđup brei mnơ̆ng kơ phung hđeh hriăm hră mâo klei hdĭp dleh dlan, hưn mdah 16 êpul mlih mrâo mbruă… Ăt hlăm mlan êdam êra thŭn anei, Êpul êdam êra CS HCM srăng mkŏ mjing hdră bi blŭ hrăm plah wah Khua dlăng bruă Đảng hlăm êpul êdam êra gưl dlông hŏng phung êdam êra, hdră “mlan 3 knông lăn”, mđup brei klei pah mni 10 čô mda asei Việt Nam êdah kdlưn thŭn 2021 leh anăn hdră bi hdơr 91 thŭn Hruê mkŏ mjing Êpul êdam êra CS HCM, mđup brei Klei pah mni Lý Tự Trọng 2022.

Pô mblang: H’Zawut Ƀuôn Yă