Knŏng hŏng klei ngă ênưih hlăm đĭng blŭ thâo mĭn, wăt tơdah dôk ti sang amâodah ti đang kphê, Y Minh Niê, ti ƀuôn H’Đing, să Ea Tul, čar Dak Lak ăt ênưih tĭng tla prăk hbâo pruê, êa drao krih kơ ana pla mjing amâodah hră tla prăk êa. Hlue si Y Minh, hŏng kdrăp knơ̆ng prăk dưi dưm hlăm đĭng blŭ thâo mĭn, knŏng čiăng mkŏ internet snăn amâo djŏ knŏng dưi tĭng tla găl ênưih ôh ƀiădah lŏ dưi ba yua lu hdră bruă ngăn prăk hŏng ênoh bi liê ƀiă, boh nik amâo liê prăk ôh.

“Êlâo dih ka mâo app snăn pô nao ti knơ̆ng prăk, êdei anei snăn mơĭt hlăm đĭng blŭ thâo mĭn ênưih hĭn. Mâo app knơ̆ng prăk pô dưi mkiêt mkriêm hruê mmông leh anăn amâo guôn nao tinăn ôh, ti sang ăt dưi mơĭt prăk mơh”.

Bi hŏng Nguyễn Thị Mỹ,  khua anôk bruă mbia blei mnơ̆ng pioh rŭ mdơ̆ng, hdră bruă hlăp mbŭl ti alŭ 5, să Ea Tul, kyua mâo kdrăp knơ̆ng prăk mrô, bruă tĭng tla găl ênưih hĭn, ksiêm dlăng tĭng tla klă mngač, boh nik amâo guôn ba prăk hla ôh ƀiădah dưi tĭng tla hlăm knơ̆ng prăk leh anăn dlăng anăn msĕ si sa kdô prăk điêt. Mỹ ăt jing pô mưng čan prăk mơ̆ng knơ̆ng prăk hŏng êbeh 4 êklai prăk.

“Čan prăk 10 thŭn leh, Agribank đru mjing klei găl čiăng mđĭ kyar bruă duh mkra. Hră mơar snăn găl ênưih, pral, khuăt, brei čan pral hlăm anăn prăk. Êlâo dih  ba prăk mnga ti anôk čan, bi ară anei knŏng mơĭt hlăm kdrăp đĭng blŭ, sitômô hruê 30 ba prăk mnga snăn hlăm brô hruê 25 kâo mơĭt leh”.

Amâo djŏ knŏng phung čan hliê ôh, dŭm êpul hgŭm bruă, anôk bruă duh mkra lŏ hma ăt dưi dưn mơ̆ng dŭm hdră bruă mrô. Bruă bi  hgŭm plah wah knơ̆ng prăk hŏng anôk bruă jia, mŭt kbiă hlăm ala čar, hjiê prăk đru kơ anôk bruă duh mkra ngă bruă ngăn prăk pral, klă mngač leh anăn mkiêt mkriêm prăk bi liê. Amai Triệu Thị Hạnh, êpul hgŭm bruă lŏ hma leh anăn hdră bruă Bình Minh, să Čư̆ Mgar brei thâo:

“Hlăm bruă tĭng yap hmei ƀuh app anei găl ênưih snăk, hmei amâo guôn nao ti knơ̆ng prăk ôh ƀiădah dưi ngă jih jang bruă hlăm app anei, dôk ti knơ̆ng bruă ăt dưi ngă mơh”.

Bi mklă mlih mrô jing bruă klam phŭn čiăng mđĭ klei dưi bi ktưn, dŭm knơ̆ng prăk ti čar Dak Lak dôk mđĭ ktang ktrâo lač mnuih ƀuôn sang, anôk bruă duh mkra yua  hdră mrô, mbĭt anăn ba yua hră mơar kơ phung yua hŏng bruă mrô ala čar kơ mnuih ƀuôn sang. Huỳnh Công Sự,  K’iăng Khua Knơ̆ng prăk Agribank ti Čư̆ Mgar, brei thâo:

“Agribank ti Čư̆ Mgar hâo hưn kơ phung yua ngă bruă brei čan leh anăn hrui mă nư hŏng kdrăp E-banking, đru kơ phung yua mkiêt mkriêm prăk bi liê, hruê mmông, pral hlăm bruă tĭng tla prăk čan. Hŏng knơ̆ng prăk snăn mkiêt mkriêm ênoh bi liê kơ hră mơar, hdră găn êrô bi mklă leh anăn dŭm ênoh bi liê mkăn, mđĭ boh tŭ ngă bruă, đru kơ knơ̆ng prăk hrui mă djŏ leh anăn ênŭm, hmao wưng”.

 Mbĭt hŏng bruă ba kdrăp mrô ba yua, dŭm anôk bruă knơ̆ng prăk lŏ mđing mtô kơ hdră mrô kơ knuă druh, bi hgŭm hŏng dŭm anôk bruă djŏ tuôm čiăng mkŏ mjing bruă mrô hrăm mbĭt ti alŭ wăl. Vũ Mai Sa, K’iăng Khua Agribank Dưr Dak Lak brei thâo:

“Hmei  gĭr pŏk ngă mnơ̆ng dhơ̆ng hdră bruă mrâo mrang, mprăp kdrăp mnơ̆ng mđĭ bruă yua CDM/ATM truh ti dŭm alŭ wăl krĭng ƀuôn sang, krĭng taih kbưi. Ba yua ênoh mrô phung čan, rup bi mklă ƀô̆ mta djŏ hŏng ênoh mrô ala čar kơ mnuih ƀuôn sang. Bi mlih gru hmô, hdră mă bruă jing anôk čŏng ngă bruă leh anăn yua mnơ̆ng dhơ̆ng, hdră bruă hlăm dŭm hdră mrô, phung čan amâo kčah ôh  kơ anôk, wưng mă bruă”.

Bi mlih mrô dôk jing boh kdrŭt yuôm bhăn čiăng kơ bruă knơ̆ng prăk Dak Lak pŏk hnơ̆ng kluôm bruă ngăn prăk, đru kơ mnuih ƀuôn sang krĭng ƀuôn sang dưi čan prăk, tĭng tla leh anăn kriê dlăng ngăn prăk găl ênưih hĭn. Amâo djŏ knŏng truh kơ kngan mnuih ƀuôn sang ôh, Knơ̆ng prăk yua bruă mrô lŏ hrăm mbĭt hŏng ƀĭng lŏ hma ba yua bruă mkra mjing mrâo mrang, đru hlue ngă klei kñăm mlih mrô ala čar, mđĭ kyar bruă duh mkra mrô truh kơ ƀuôn sang.