- Mơ̆ng klei mĭn H Juel leh anăn gŏ sang pŏk Knơ̆ng bruă Leng Gung thơ̆ng kơ hưn mthâo leh anăn mnia blei dŭm mnơ̆ng dhơ̆ng mơ̆ng dhar kreh mnuih Mnông čar Dak Nông?

H Juel: Sui hŏng anei 10 thŭn, hlăk kâo mrâo dôk ung, kâo ƀuh mnuih ƀuôn sang adôk djă pioh lu klei bhiăn djuê ana, boh nik knăm ngă yang, bi hlăm knăm ngă yang snăn amâo kƀah ôh čeh kpiê. Mơ̆ng anăn kâo hriăm mơ̆ng kmha mtô klei knă kpiê leh anăn mkra kpei djuê ana pô, tal êlâo knŏng knuă 1,2 čeh kơ gŏ sang mnăm amâodah yua hlăm knăm ngă yang hlăm gŏ sang, leh anăn ƀrư̆ ƀrư̆ knă lu hĭn amâo djŏ knŏng yua hlăm knăm mơak hlăm ƀuôn sang ôh ƀiădah lŏ hưn mthâo klei hưn mdah kpiê čeh knă hlue si klei mdê hjăn mnuih Mnông hŏng phung tue djăp anôk leh anăn ară anei kpiê čeh kâo dưi ba čhĭ kơ lu mnuih. Êngao anăn, kâo khăp kơ kdrăơ djuê ana pô, gru đêč hlăm kdrăp pơ̆k mñam mâo 1 klei yăl dliê, klei yuôm mdê mdê hlăm klei hdĭp grăp hruê, rup gru đêč msĕ si asăr giêt, asăr plei, kgă, čim čap hlô mnơ̆ng, rup mnuih siam snăk. Kyua anăn kâo mâo klei mĭn hưn mthâo kơ grăp čô kơ klei jăk siam dhar kreh djuê ana pô, mơ̆ng anăn Knơ̆ng bruă Leng Gung dưi mkŏ mjing hlăm thŭn 2022.

- Ya klei mdê hlăm bruă mnia blei mnơ̆ng dhơ̆ng kơ dhar kreh hĭng mnơ̆ng mkăn leh anăn ya klei brei pô mđing hlăm bruă anăn?

H Juel:  Mnia mblei mnơ̆ng dhơ̆ng djuê ana msĕ si kpiê čeh, kdrăp djuê ana, dŭm mta mnơ̆ng hrĭ mñam, mnơ̆ng kriê pioh mơ̆ng kdrăp pơ̆k mñam, alê mơô… mâo lu klei mdê leh anăn dleh dlan hĭn mkă hŏng bruă mnia blei mnơ̆ng dhơ̆ng mkăn, kyua dŭm mta mnơ̆ng dhơ̆ng anei dleh mâo lu tuê khăp, kyua anăn čiăng mâo phung khăp, mkra lu mta mnơ̆ng dhơ̆ng mơ̆ng mnơ̆ng pơ̆k mñam msĕ si kdô, klei kă ƀuk, mnơ̆ng dhơ̆ng kriê piih mâo lu mnuih khăp leh anăn ba klei jăk siam djuê ana pô mâo lu mnuih thâo.

- Dŭm mta mnơ̆ng dhơ̆ng djuê ana, alê mơô amâodah kpiê čeh… mơ̆ng H’Juel mkăp mâo phung blei khăp mơ̆? Si ngă anôk ba čhĭ ară anei, bruă mnia blei dleh dlan mơ̆?

H Juel: Kpiê čeh ăt msĕ msĕ si mnơ̆ng hrĭ mñam, kdrăp pơ̆k mñam mơ̆ng knơ̆ng bruă hmei ară anei mâo leh lu mnuih thâo leh anăn akâo blei… amâo djŏ knŏng mâo lu tuê čiăng hlăm čar Dak Nông ôh ƀiădah lŏ mâo lu phung ti ƀuôn prŏng Hồ Chí Minh, Hà Nội akâo blei, ară anei bruă mnia blei ăt găl ênưih mơh.

- Dưi lač bruă mnia blei gŏ sang Ih dôk dưi ba čhĭ mnơ̆ng dhơ̆ng mơ̆ng dhar kreh djuê ana. Bruă mnia blei anei klă sĭt ăt dôk đru mguôp mjing bruă mă, mđĭ prăk hrui wĭt kơ mnuih ƀuôn sang ti buôn sang pô mơ̆?

H Juel: Kâo mơak snăk kyua mnơ̆ng dhơ̆ng djuê ana pô mâo lu mnuih thâo, leh anăn đru kơ phung thâo mbruă hrĭ mñam, kdrăp čut hơô, bruă knă kpiê čeh mâo thiăm prăk hrui wĭt hlăm klei hdĭp, ba bruă djuê ana pô lŏ hdĭp hlăm klei hdĭp mrâo mrang čiăng kơ lu mnuih thâo kơ klei jăk siam M’nông Preh, Prâng, Nong...truh hŏng lu mnuih hĭn.

- Ih pô jing sa čô čih klei mrâo, mđung asăp leh anăn hŏng gŏ sang kriê dlăng knơ̆ng bruă, dua bruă anei mâo bi đru mbĭt mơ̆?

H Juel:  Hŏng bruă jing pô čih klei mrâo, mđung asăp klei MNông leh anăn kriê dlăng knơ̆ng bruă Leng Gung snăn ăt găl ênưih mơh… Tơdah mđung rup kâo čŭt kdrăp djuê ana mơ̆ng Knơ̆ng bruă Leng Gung mkra mjing anăn hưn mdah mnơ̆ng dhơ̆ng leh anăn mtô mblang djă pioh klei dhar kreh djuê ana pô mơh. Leh anăn ăt mơ̆ng bruă čih klei mrâo, mđung asăp anăn knăl kpiê čeh kâo dưi čhĭ lu hĭn leh anăn lu mnuih akâo blei. Kâo ƀuh anei jing 1 klei myun leh anăn găl ênưih hŏng kâo.

-H Juel mâo mơ̆ ya hdră kčah bruă knuă pô, boh nik jing bruă răng kriê, mđĭ lar ênoh yuôm dhar kreh? Mâo ya klei ih čiăng mơĭt kơ phung mda asei, mnuih ƀuôn sang pô?

H Juel:  Kâo čiăng bi leh 1 boh sang dlông djuê ana Mnông čiăng mâo anôk hưn mdah, răng kriê dhar kreh mnơ̆ng dhơ̆ng djuê ana pô. Êngao anăn kâo mĭn tĭng bi mguôp hŏng knơ̆ng bruă hiu čhưn ênguê ti alŭ wăl leh anăn êngao čar čiăng hưn mdah thiăm mnơ̆ng dhơ̆ng mnuih M’nông Preh, Prâng, Nong...ti čar Dak Nông. Kâo čang hmăng phung mda asei Mnông gĭr răng kriê klei jăk siam djuê ana pô, amâo brei luč ram ôh.

- Lač jăk kơ ih lu!