Hŏng mnuih ƀuôn sang djăp djuê ana ti să Ayun, kdriêk Čư̆ Sê, čar Gia Lai, Khua gĭt gai Đảng Nguyễn Phú Trọng amâo mâo djŏ knŏng jing sa čô khua kiă kriê jao jih klei hdĭp pô kơ lăn čar, kơ mnuih ƀuôn sang, lehanăn jing leh mnuih ba hriê klei trei mđao kơ mnuih ƀuôn sang. Hlăm sa gưl nao mă bruă ti čar Gia Lai hlăk mlan 4/2017, Khua gĭt gai Đảng Nguyễn Phú Trọng nao čuă leh să Ayun – să boh să dleh dlan êdi ti kdriêk Chư Sê.

Mđing hmư̆ klei blŭ lehanăn ai tiê mnuih ƀuôn sang, čiăng bi mâo êa jua kơ bruă pla mjing, khua gĭt gai kiă kriê mtam kơ alŭ wăl pral mkra knơ̆ng mbông êa Plei Keo. Dua thŭn êdei kơ anăn, knơ̆ng mbông êa Plei Keo mâo bi leh, dưi mđoh êa mơ̆ng hnoh krông Ayun truh kơ kdrăn lŏ lehanăn đang hma mnuih ƀuôn sang mâo klei trei mđao. Mâo leh knơ̆ng mbông êa Plei Keo, mnuih ƀuôn sang să Ayun dưi rah pla leh êbeh 300 ha mdiê lŏ dua yan, hơĭt klei hdĭp mda. Khua mduôn Đinh Miơch, ti ƀuôn Achông, mpŭ mni êdi mnơ̆ng khua gĭt gai mđup brei leh kơ mnuih ƀuôn sang msĕ snăn:

“Mnuih ƀuôn sang bŏ hŏng klei mơak leh mâo Khua gĭt gai Đảng   Nguyễn Phú Trọng kiă kriê, ba hriê leh kơ mnuih ƀuôn sang dưi mâo knơ̆ng mbông êa, brei kơ mnuih ƀuôn sang mâo klei hdĭp. Hmei hdơr anano kơ ai tiê prŏng prĭn mơ̆ng A wa kah leh hŏng mnuih ƀuôn sang Ayun ară anei lehanăn kơ êdei anăp”.

Êbeh 10 thŭn êlâo, hlăm hruê 17/3/2014, Khua gĭt gai Đảng Nguyễn Phú Trọng leh anăn Êpul mă bruă gưl dlông nao čhưn hŏng dŭm djuê ana să Hồng Hạ, kdriêk A Lưới, čar Thừa Thiên Huế, ksiêm dlăng boh klei mkŏ mjing krĭng ƀuôn sang mrâo, bi mlih ana mkra mjing mnơ̆ng rông, msir klei ư̆ êpa, bi hrŏ klei ƀun knap. Blŭ hrăm hŏng Bruă sang čư̆ êa leh anăn mnuih ƀuôn sang tinei, Khua gĭt gai Đảng mtă kơ Bruă Đảng, mnuih ƀuôn sang hlăm să lŏ dơ̆ng mđĭ lar knhuah gru jhŏng ktang, mkŏ mkra ƀuôn sang ƀrư̆ kjăp ktang, mdrŏng sah, amâo tŭ klei ƀun ƀin.

Hồ Viết Lương,  Khua Knơ̆ng bruă Sang čư̆ êa să Hồng Hạ lŏ hdơr: Hruê anăn, wăt bruă sang čư̆ êa alŭ wăl, mnuih ƀuôn sang hlăm să hmư̆ Khua gĭt gai Đảng hriê čhưn mơak mñai sơăi:

“Mnuih ƀuôn sang leh anăn kâo pô hdơr hĭn klei Khua gĭt gai Đảng lač jing mnuih ƀuôn sang Hồng Hạ mđĭ kyar knhuah gru jhŏng ktang, bi hgŭm mkŏ mkra ƀuôn sang jăk mơak trei mđao. Khua gĭt gai Đảng djiê leh, mnuih ƀuôn sang ênguôt snăk. Hruê mbruê ti sang Gươl Khua gĭt gai mđup brei, mnuih ƀuôn sang nao kih mdoh, bi tuôm bi hdơr kơ Khua gĭt gai Đảng leh anăn amâo dưi wơr ôh ai tiê ñu”

Hmư̆ hing kơ khua gĭt gai Đảng Nguyễn Phú Trọng djiê, mnuih ƀuôn sang djuê ana Khmer hlăm krĭng dap mnai krông Cửu Long bŏ hŏng klei ênguôt hnĭng. Hlăm klei yal dliê pô, Thạch Sinh, tsa čô hlăm êpul khua kiă kriê sang yang Lò Gạch ti să Lương Hòa, kdriêk Châu Thành, čar Trà Vinh amâo mâo mdei bi mni kơ khua gĭt gai Đảng jing leh mnuih mđing êdi kơ klei hdĭp mnuih ƀuôn sang djăp djuê ana, hlăm anăn mâo djuê ana Khmer.  Hlăm klei ñu jing khua gĭt gai Đảng, awa Nguyễn Phú Trọng mâo leh lu hdră êlan čiăng mđĭ klei hdĭp mnuih ƀuôn sang, bi hrŏ êwang bi kpleh plah wah dŭm djuê ana, plah wah dŭm krĭng kwar mdê mdê. Mơ̆ng anăn mơh krĭng mnuih djuê ƀiă mâo leh klei bi mlih hĭn mkă hŏng êlâo dih. Thạch Sinh lač: 

“leh hmư̆ hing kơ khua gĭt gai Đảng Nguyễn Phú Trọng djiê, kâo jing sa čô mnuih djuê ana Khmer, hdĭp hlăm lăn čar Việt Nam kâo bŏ hŏng klei ênguôt kơ ñu. Hlăm 3 wưng ñu păn ngă khua gĭt gai Đảng, kâo ƀuh ñu mđing nanao kơ klei hdĭp mnuih ƀuôn sang djăp djuê ana. Lehanăn ñu jing mnuih kut kat bi kdơ̆ng hŏng klei ƀơ̆ng ngăn čiăng kơ đảng lehanăn phung knuă druh dưi mâo klei kpă ênuah, kâo ƀuh ênguôt hnĭng kơ ñu. Kâo čang hmăng mgi dih, phung khua kiă kriê lŏ čuê hdră êlan mơ̆ng awa Nguyễn Phú Trọng đru bi răng mgang, mđĭ kyar djă djuê ana, đru kơ mnuih ƀuôn sang dưi mâo klei đĭ kyar”./.