Hrue 14/7/2016, Khua gĭt gai Đảng Nguyễn Phú Trọng nao čuă leh să Bản Bo, kdriêk Tam Đường, čar Lai Châu. Klei ñu blŭ blŭ lehanăn mđĭ ai, jing leh boh kdrŭt lŏ thiăm ai ktang kơ mnuih ƀuôn sang, bruă sang čư̆ êa să Bản Bo kpưn đĭ tlaih mơ̆ng ƀun. Mâo klei mđĭ ai anăn mơ̆ng khua gĭt gai, bruă sang čư̆ êa lehanăn mnuih ƀuôn sang djăp djuê ana hlăm să Bản Bo mâo klei gĭr nanao kpưn đĭ tlaih mơ̆ng klei dleh dlan, tơl ară anei Bản Bo jing leh kdrăn đang čê mtah mda hlăm kdriêk Tam Đường, klei hdĭp mnuih ƀuôn sang mâo klei đĭ kyar. bruă Đảng, bruă sang čư̆ êa, lehanăn mnuih ƀuôn sang djăp djuê ana ti să Bản Bo djă pioh nanao klei Khua gĭt gai mtă, anăn jing ktuh êyuh mđĭ kyar klei hdĭp mda hŏng bruă pla mjing, mkŏ mkra krĭng ƀuôn sang mrâo, dưn yua jih klei ktang pô pla mjing ana boh kroh, rông mnơ̆ng, pla čê, bi mguôp hŏng bruă duh mkra mnia mblei, duah anôk čhĭ mnia lehanăn pŏk bruă hiu čhưn dhing iêo jak lu phung tue hriê čhưn./.

Ti krĭng knông lăn Tuy Đức, čar Dak Nông, hmư̆ hing Khua gĭt gai Đảng Nguyễn Phú Trọng djiê, knuă druh, đảng viên leh anăn dŭm djuê ana ênguôt hnĭng hŏng sa čô khua gĭt gai jih klei hdĭp kyua lăn čar, kyua mnuih ƀuôn sang. Điểu Khanh, mnuih djuê ana M’Nông, k’iăng khua bruă sang čư êa xă Quảng Trực brei thâo:

 “Mơ̆ng krĭng knông lăn taih kbưi, hmư̆ hing Khua gĭt gai Đảng Nguyễn Phú Trọng djiê, knuă druh, đảng viên leh anăn mnuih ƀuôn sang să Quảng Trực ênguôt hnĭng êdi kơ sa čô khua gĭt gai jih ai tiê kyua lăn čar, kyua mnuih ƀuôn sang, gru mngač kơ knhuah hdĭp cách mạng. Anei jing klei luč liê prŏng sơnăk hŏng Đảng, knŭk kna leh anăn mnuih ƀuôn sang, boh nik hlăm wưng ala čar drei dôk ngă ktang phĭt bruă mkŏ mjing Đảng, gang mkhư̆ klei ƀơ̆ng ngăn mâo leh gru kruăk knăl prŏng prĭn mơ̆ng Khua gĭt gai Đảng Nguyễn Phú Trọng. Knuă druh, đảng viên leh anăn mnuih ƀuôn sang dŭm djuê ana hlăm să ăt hdơr kơ klei mtă mơ̆ng Khua gĭt gai Đảng, srăng mâo nanao klei bi mguôp, đăo knang kơ klei gĭt gai mơ̆ng Đảng, knŭk kna, lŏ dơ̆ng mjuăt hriăm, gĭr mkŏ mjing krĭng knông lăn mdrŏng ktang”.

Ăt msĕ hŏng lu djuê ana djăp čar kwar kluôm ala, leh hmư̆ Khua gĭt gai Đảng Nguyễn Phú Trọng djiê, mnuih ƀuôn sang djuê ana Chăm ti čar Bình Thuận bi êdah klei ênguôt hnĭng. Lâm Tấn Bình, knuă druh leh wĭt mdei jing mnuih Chăm ti să Phan Hiệp, kdriêk Bắc Bình, čar Bình Thuận brei thâo, leh mđing hmư̆ lu klei blŭ mơ̆ng anôk bi kƀĭn, lu mta bruă prŏng kơ lăn čar ñu ƀuh yuôm bhăn êdi klei khua gĭt gai Đảng gĭt gai djŏ tuôm hŏng klei đăo, hŏng djuê ana, mơ̆ng anăn, bi êdah ai tiê thâo bi mguôp jih jang djuê ana hlăm klei mđĭ kyar klei hdĭp mda ala ƀuôn lăn čar ară anei:

 Leh hmư̆ hing kơ Awa khua gĭt gai Đảng Nguyễn Phú Trọng djiê, ai tiê kâo lehanăn jih jang mnuih ƀuôn sang djuê ana Chăm bŏ hŏng klei ênguôt. Awa Trọng djiê lui kơ tluôn jih jang djuê ana bi hnĭng ênguôt. Kyuadah sa klei hdĭp, jih ai tiê klei mĭn ñu duh myơr kơ lăn čar, mjing leh kơ lăn čar Việt Nam sah prŏng mdrŏng jing. Awa jing sa čô khua kiă kriê prŏng kơ Việt Nam, Ñu djiê leh, ƀiădah ăt dôk klei hing ang mơ̆ng ñu kčăi hlăm tar anôk.

Klei Khua gĭt gai Đảng Nguyễn Phú Trọng djiê jing sa klei ênguôt hnĭng amâo mâo knhal hŏng grăp gưl mnuih ƀuôn sang, hlăm anăn mâo phung čih mkra kưt mmuiñ kluôm lăn čar hlăm anăn mâo mnuih Khmer. Ayŏng Thạch Sroh ti să Đôn Châu, kdriêk Duyên Hải, čar Trà Vinh, jing sa čô hlăm Êpul hgŭm čih mkra kưt mmuiñ čar brei thâo, phung čih kač kdŏ muiñ Khmer hlăm wưng êgao mâo leh lu klei đru mguôp hlăm bruă răng mgang leh anăn mđĭ lar knhuah gru djuê ana. Hjăn ñu pô, hlăm wưng kơ anăp srăng lŏ dơ̆ng duh myơr kơ bruă dhar kreh. Kơ klei Khua gĭt gai Đảng Nguyễn Phú Trọng djiê leh, ayŏng Thạch Sroh bi êdah klei ênguôt hơưi:

 “Khua gĭt gai Đảng Nguyễn Phú Trọng êdah snăk, ñu mđing kơ dhar kreh djuê ana Việt Nam, boh nik mđing, mđĭ ai mnuih ƀuôn sang dŭm djuê ana răng kriê leh anăn mđĭ lar knhuah dhar kreh djuê ana pô. Ară anei, tơdah hmư̆ klei hâo hưn Khua gĭt gai Đảng djiê leh, kâo leh anăn mnuih ƀuôn sang Khmer ênguôt snăk, srăng hdơr kơ ai tiê ñu hŏng mnuih ƀuôn sang”.