Čih yap ti ƀuôn hgŭm Bồng Sơn, čar Gia Lai – sa hlăm dŭm alŭ wăl pŏk ngă hnưm dŭm krĭng mkŏ anôk dôk mrâo mkăp kơ Hdră bruă êlan treng êran pral krĭng Dưr – Dhŭng, brei ƀuh klei ngă bruă mđrăm mbĭt mơ̆ng bruă knŭk kna lehanăn klei sa ai mơ̆ng mnuih ƀuôn sang. Leh dưi mtô mblang, mtrŭt mjhar leh hdră hrui mă lăn, lu gŏ sang ti krĭng Thiết Đính Nam pral bi hgŭm, ba jao anôk ala. Gŏ sang Trần Thị Thu jing sa hlăm dŭm gŏ sang hnưm ba jao êbeh 1.000m2 lăn lŏ lehanăn mơak dưi tŭ mă prăk čiu hnô.

              "Ară anei knŭk kna hrui mă lăn čiăng ngă bruă tŭ dưn kơ mnuih ƀuôn sang pô, pô tŭ ư mơh, grăp čô mơak, ư ai sơaĭ”

               Klei sa ai amâo djŏ knŏng čŏng čiăng mâo, ƀiădah kbiă hriê mơ̆ng hdră ngă jăk, djŏ guôp mơ̆ng bruă knŭk kna alŭ wăl. Mơ̆ng bruă bi kƀĭn ƀuôn, mtô, hlak mblang kơ hdră mtrŭn…jih jang dưi pŏk ngă mđrăm mbĭt, klă mngač. Lê Văn Phúc, Khua krĭng Thiết Đính Nam, ƀuôn hgŭm Bồng Sơnbrei thâo, hlăk mnuih ƀuôn sang thâo klă kơ hdră êlan mtrŭn snăn bruă pŏk ngă srăng ba wĭt lu klei jăk găl hĭn.

               “Ƀuôn hgŭm mđing dlăng, krĭng ăt mkŏ mjing hdră mtô mblang, mâo hdră kčah lehanăn bi kƀĭn ƀuôn. Mnuih ƀuôn sang sa ai hlăm bruă mkŏ anôk dôk mrâo mkăp kơ hdră êlan treng Dưr – Dhŭng. Jih jang gŏ sang dôk hlăm krĭng msir mghaih anôk ala dưi tŭ mă prăk čiu hnô ênŭm, dlăng kluôm jih jang sa ai sơaĭ.

               Ai tiê sa ai ăt dưi mđĭ lar ti ƀuôn hgŭm Hoài Nhơn Bắc – anôk mâo dŭm êtuh gŏ sang hmăi djŏ mơ̆ng hdră bruă. Gŏ sang Nguyễn Văn Phán, krĭng Hy Văn jao leh 2 kdrăn lŏ hŏng ênhă 1.500 m2, ư ai hŏng hdră êlan mơ̆ng Knŭk kna.

               “Gŏ sang kâo ăt msĕ hŏng mnuih ƀuôn sang ti krĭng Hy Văn anei sa ai hŏng hdră mtrŭn čiăng msir mghaih anôk ala, čuăl mkă krĭng anei. Mnuih ƀuôn sang mơak êdi kyua hdră êlan mđĭ kyar bruă duh mkra – ala ƀuôn mơ̆ng alŭ wăl, jih jang bi sa ai sơaĭ.

               Čiăng dưi mâo klei sa ai anăn, dŭm gưl bruă knŭk kna čar Gia Lai pral pŏk ngă lu hdră msir mđrăm mbĭt, mơ̆ng hdră čuăl mkă lăn truh kơ bruă mkŏ anôk dôk mrâo čiăng ksiêm dlăng, čiu hnô lehanăn đru kơ mnuih ƀuôn sang. Trần Minh Lâm – kơiăng khua Anôk bruă snag čư̆ êa ƀuôn hgŭm Hoài Nhơn Bắc brei thâo, hdră mtô mblang dưi bi mklă jing bruă phŭn truh kơ hbĭl dưi bi leh tŭ dưn hdră čiu hnô, msir mghaih anôk ala.

               “Hmei lŏ dơ̆ng mtô mblang čiăng kơ mnuih ƀuôn sang thâo klă kơ hdră bruă phŭn mơ̆ng ala čar kñăm mjing klei sa ai mơ̆ng mnuih ƀuôn sang hlăm hdră mkra ktuê êlan treng êran pral. Mta phŭn čiăng mtô mblang čiăng kơ mnuih ƀuôn sang sa ai čiăng kơ hdră čiu hnô anôk ala dưi jăk găl lehanăn hnưm ba jao lăn ala čiăng hluê ngă hdră bruă.

               Hlăm kluôm čar Gia Lai, hdră Êlan treng êran pral Dưr – Dhŭng nao găn 18 să, ƀuôn hgŭm, hmăi kơ giăm 4.000 gŏ sang, hŏng ênoh msir mghaih anôk ala giăm 6.800 êklai prăk. Truh kơ ară anei, čar Gia Lai bi leh hdră čuăl mkă 38 krĭng anôk dôk mrâo, rơ̆ng anôk dôk hơĭt kjăp kơ mnuih ƀuôn sang hmăi djŏ. Hluê si Nguyễn Tự Công Hoàng, Kơiăng khua knơ̆ng bruă sang čư̆ êa čar Gia Lai, čiăng rơ̆ng wưng hluê ngă, čar rơ̆ng kjăp hdră ksiêm dlăng hluê wưng, pral mkăp mnuih mă bruă, čiu hnô djŏ guôp kơ mnuih ƀuôn sang.

               Hlăm wưng ti anăp, alŭ wăl brei ngă bruă mjêč hĭn. Bi mklă ti krĭng brei mđing msir mghaih êlâo čiăng mâo anôk ala kơ hdră ngă bruă. Mtă kơ dŭm alŭ wăl amâo guôn ksiêm dlăng jih 100%  lehkơnăn kơh bi mklă ênoh ƀiădah brei ksiêm dlăng tianôk bi mklă ênoh tinăn, tĭng tla prăk tinăn lehanăn hlŏng jao anôk ala mâo mnuih ƀuôn sang tŭ mă leh prăk čiu hnô”.

               Hŏng klei hgŭm ngă bruă mđrăm mbĭt mơ̆ng jih anôk bruă kđi čar boh nik jing klei sa ai mơ̆ng mnuih ƀuôn sang, hdră msir mghaih anôk ala mơ̆ng hdră êlan treng Dưr – Dhŭng ti Gia Lai dôk ba wĭt boh tŭ jăk siam. Anei jing tur knơ̆ng yuôm bhăn čiăng kơ hdră phŭn mơ̆ng ala čar hnưm dưi pŏk ngă, mjing boh kdrŭt đĭ kyar mrâo kơ krĭng Lăn dap kngư lehanăn kluôm ala čar./.