Y-Luyện Niê Kdăm, Pô bi ala bruă kƀĭn ala gưl 10, khua kiă kriê hđăp bruă Đảng čar Dak Lak yăl dliê, jing pô mâo lu klei mlih ktang phĭt, dŭm mta bruă mơ̆ng Khua gĭt gai Đảng Nguyễn Phú Trọng mâo mnuih ƀuôn sang đăo knang, mnuih ƀuôn sang khăp êdi:

 “Luč ñu jing luč sa čô anak êdah êdi mơ̆ng Đảng, mơ̆ng knŭk kna leh anăn mnuih ƀuôn sang. Khua gĭt gai Đảng hriê čuă leh čar Dak Lak, ñu uêñ mĭn kơ mnuih ƀuôn sang mnuih djuê ƀiă, uêñ mĭn kơ klei hdĭp mda, anăn jing klei uêñ mĭn hĭn”.

Hdơr klei mtă mtăng mơ̆ng Khua gĭt gai Đảng Nguyễn Phú Trọng hlăm Klei kƀĭn trông phung bi ala kluôm ala bruă Êdam êra Cộng Sản Hồ Chí Minh gưl tal 12, amai H’Hương Ƀuôn Krông, khua bruă Đoàn ƀuôn prŏng Ƀuôn Ama Thuôt čar Dak Lak mă anăn jing boh kdrŭt čiăng mjuăt bi hriăm pô. Boh nik jing nao êlâo hlăm bruă hriăm kơ knhuah hdĭp cách mạng, nao êlâo hlăm klei hriăm, mjuăt pô, klei mă bruă knuă, klei mbruă, nao êlâo hluê ngă bruă klam kđi čar:

          “Anăn jing boh kdrŭt čiăng kơ kâo lŏ dơ̆ng hriăm leh anăn hluê ngă gru mngač Hồ Chí Minh leh anăn Khua gĭt gai Đảng Nguyễn Phú Trọng. Hriăm kơ ñu kơ klei mjĕ giăm, thâo êlam, klei mkiêt mkriêm, kpă, ênuah. Lŏ dơ̆ng hriăm kơ klei mĭn hdĭp, amâo mâo uêñ kơ klei dleh dlan, gĭt ktưn čiăng mkŏ mjing klei jhŏng bruă kđi čar kjăp, mâo ai tiê dôh, klei mĭn mngač tač, mâo klei hmăng hmưi hĭn”.

Hlăm gưl nao čuă, mă bruă ti čar Kon Tum hlăk mlan 4/2011, Khua gĭt gai Đảng, Khua Bruă Kƀĭn Ala Nguyễn Phú Trọng mâo leh mmông nao čuă mnuih ƀuôn sang djuê ana Bahnar ti ƀuôn Đăk Mŭt, să Đăk Mar, kdriêk Đăk Hà. Tinei, Khua gĭt gai Đảng Nguyễn Phú Trọng ksiêm dlăng kơ klei hdĭp, mđing hmư̆ klei čiăng, klei hmăng hmưi mơ̆ng mnuih ƀuôn sang leh anăn mtă mtăn brei bi lar klei bi mguôp, mbruă hlăm klei mă bruă knuă.

Leh 13 thŭn Khua gĭt gai Đảng, Khua Bruă Kƀĭn Ala Nguyễn Phú Trọng hriê čuă, ară anei mâo klei mlih hlăm klei mă bruă knuă leh anăn hlăm klei hdĭp mơ̆ng mnuih ƀuôn sang ti ƀuôn Đăk Mŭt, să Đăk Mar, kdriêk Đăk Hà, čar Kon Tum. Êjai khua gĭt gai Đảng hriê čuă, A Khiếu dôk jing khua ƀuôn, kyuanăn ñu hdơr klă klei blŭ hrăm mơ̆ng Khua gĭt gai Đảng hŏng mnuih ƀuôn sang.

 “Khua gĭt gai Đảng mă mtă kơ mnuih ƀuôn sang bi mguôp, bi đru hdơ̆ng pô, hrăm mbĭt mđĭ kyar klei hdĭp mda gŏ sang. Ară anei grăp sang hlăm ƀuôn bi hrăm mbĭt ngă bruă jăk, mâo ana kphê kriê dlăng djŏ hdră mnêč, kphê mâo boh. Hmư̆ hing khua gĭt gai Đảng djiê, mnuih ƀuôn sang mâo klei ênguôt leh anăn mâo mmông hdơr kơ Awa, bi êdah ai tiê hdơr kơ khua gĭt gai Đảng mtô leh kơ mnuih ƀuôn sang mă bruă knuă. Mnuih ƀuôn sang hmăng kơ Awa dưi mdei êđăp ênang”.

Lê Xuân Hưng, Khua dlăng bruă Đảng să Đăk Mar brei thâo, 13 mlih mrâo, alŭ Đăk Mút dưi mkŏ mkra krĭng ƀuôn sang mrâo. Lu thŭn đrông mâo mă hră pah mni hlăm lu mta bruă. Gưl hriê čuă mơ̆ng Khua Bruă Kƀĭn Ala, Khua gĭt gai Đảng Nguyễn Phú Trọng êjai anăn jing klei mđĭ ai yuôm bhăn đru kơ phung knuă druh, đảng viên mbĭt hŏng mnuih ƀuôn sang hlăm să bi mguôp bi leh dŭm mta kñăm mâo leh.

 “Truh ti thŭn 2014, să Đăk Mar hmei jing să krĭng ƀuôn sang mrâo. Mơ̆ng anăn truh kơ ară anei hluê ngă klei mtă mơ̆ng Khua gĭt gai Đảng Nguyễn Phú Trọng, mnuih ƀuôn sang, phung knuă druh, đảng viên ngă bruă mđĭ kyar bruă duh mkra, dhar kreh, boh nik jing mkŏ wĭt ana pla mjing, mnơ̆ng rông. Truh kơ ară anei hmao mâo hnư hrui wĭt kah knar grăp čô jing 56 êklăk prăk. Thŭn 2022, să Đăk Mâo jing mâo ênŭm hnơ̆ng čuăn krĭng ƀuôn sang mrâo mđĭ hnơ̆ng leh anăn hmei dôk mkŏ mjing să krĭng ƀuôn sang mrâo mrâo bi hmô ti thŭn 2025”.

Hŏng mnuih ƀuôn sang dŭm djuê ana ti să Ayun, kdriêk Čư̆ Sê, čar Gia Lai, Khua gĭt gai Đảng Nguyễn Phú Trọng amâo djŏ knŏng jing khua gĭt gai jih klei hdĭp kyua lăn čar, kyua mnuih ƀuôn sang, ƀiădah lŏ jing pô brei kơ mnuih ƀuôn sang klei hdĭp trei mđao. Gưl nao ngă bruă ti čar Gia Lai hlăm mlan 4/2017, Khua gĭt gai Đảng Nguyễn Phú Trọng nao čuă să Ayun – jing sa să dleh dlan êdi ti kdriêk Čư̆ Sê. Mđing hmư̆ klei čăng, klei hmăng hmưi mơ̆ng mnuih ƀuôn sang čiăng mâo knơ̆ng kdơ̆ng êa đru ngă bruă lŏ hma. Khua gĭt gai Đảng gĭt gai alŭ wăl pral rŭ mjing knơ̆ng kdơ̆ng êa Pleikeo. Dua thŭn êdei, knơ̆ng kdơ̆ng êa dưi ngă leh, leh anăn mđoh êa êđăp mơ̆ng krông Ayun truh kơ kdrăn lŏ Pleikeo, ba wĭt klei trei mđao kơ mnuih ƀuôn sang. A Nhur, 73 thŭn, ti ƀuôn Achông, să Ayun brei thâo:

 “Êjai Khua gĭt gai Đảng Nguyễn Phú Trọng hriê čuă, kâo hơ̆k mơak êdi, kâo mĭn drei srăng mâo êa. Ară anei êa krông Ayun truh ti hang, đĭ dlông čư̆, êlâo dih si thâo mâo. Hơ̆k mơak êdi, sa thŭn 2 3 blư̆ pla mdiê lŏ, mnuih ƀuôn sang amâo mâo lŏ ư̆ êpa ôh”.

Mâo knơ̆ng kdơ̆ng êa Pleikeo, mnuih ƀuôn sang ti să Ayun buh pla êbeh 300 ha mdiê lŏ 2 wưng, bi hơĭt klei hdĭp. Khua mduôn Đinh Miơch, ti ƀuôn Achông, mpŭ êdi kơ hnư mnơ̆ng anei mơ̆ng Khua gĭt gai Đảng Nguyễn Phú Trọng hŏng mnuih ƀuôn sang Ayun.

“Mnuih ƀuôn sang hơ̆k mơak sơnăk êjai Khua gĭt gai Đảng Nguyễn Phú Trọng gĭt gai brei kơ ƀuôn sang mâo knơ̆ng êa, klei hdĭp mnuih ƀuôn sang đĭ hĭn. Hruê anei kâo srăng hdơr nanao kơ klei đru mơ̆ng Awa kơ mnuih ƀuôn sang Ayun hlăm hruê anei leh anăn êdei anăp”.

Mơ̆ng dŭm gưl nao ngă bruă, thâo klă boh sĭt, mđing hmư̆ klei blŭ mguôp, klei hmăng hmưi mơ̆ng mnuih ƀuôn sang dŭm djuê ana krĭng Lăn Dap Kngư, Khua gĭt gai Đảng Nguyễn Phú Trọng gĭt gai leh bruă sang čư êa alŭ wăl ngă dŭm hdră êlan đru kơ krĭng mnuih djuê ƀiă krĭng Lăn Dap Kngư. Mơ̆ng anăn đru kơ mnuih ƀuôn sang dŭm djuê ana tinei ƀrư̆ hruê ƀrư̆ trei mđao, yâo mơak. Mnuih ƀuôn sang lač jăk kơ Khua gĭt gai Đảng Nguyễn Phú Trọng lu sơnăk!