VOV4.Êđê- Greng k’kiêng thŭn 1966, ti ƀuôn krŭ kdơ̆ng Stơr, să Tơ Tung, kdriêk Kbang, čar Gia Lai. Hlăm ai tiê, klei mĭn ñu, hlăk thŭn 1975, dưi sua wĭt klei êngiê kơ krĭng kwar Dhŭng, hluh hlir ala čar, mnuih ƀuôn sang lŏ suăi êmăn ƀiă bŏ hŏng klei gĭr ktưn lŏ wĭt mkŏ mjing ƀuôn sang. Ară anei klei hdĭp mnuih ƀuôn sang ti ƀuôn krŭ kdơ̆ng Stơr mâo leh lu klei mlih mrâo, ƀiădah ñu ăt yăl dliê nanao hŏng anak čô pô kơ hruê mmông găn klei dleh dlan, suăi êmăn, čiăng kơ anak čô thâo mpŭ kơ klei hdĭp ară anei leh anăn mpŭ hĭn kơ klei yuôm bhăn mơ̆ng klei êđăp ênang. Greng yăl dliê:

“Thŭn 1975, ala čar hluh hlir, jih jang dŭm djuê ana Bahnar, Sơdang, Jrai, leh anăn dŭm djuê ana mkăn mơ̆ak mñai. Jih jang phung hđeh dưi nao sang hră mơar, phung prŏng thâo čoh bruă ngă hma, pla ana ƀơ̆ng boh, klei hdĭp lu klei mlih jăk mkă hŏng ênŭk bi blah. Tơdah amâo mâo Đảng, knŭk kna, klei hdĭp ăt kăn mâo msĕ ară anei lei. Kyua Đảng, knŭk kna ară anei mnuih ƀuôn sang mâo klei hdĭp trei mđao, yâo mơak, lu gŏ sang tloh blei êdeh p’phut, êdeh kai đru kơ klei ngă bruă.

Klei bi hdơr kơ hruê mtlaih êngiê kluôm kwar Dhŭng, hluh lir ala čar jing mnĭt mmông amâo dưi wơr bĭt ôh hŏng Rơ Ô B’hung ti ƀuôn Gung Gốp, să Ia Rmok, kdriêk Krông Pa. Rơ Ô B’hung yăl dliê: Dăl hlăm ênuk bi blah, mnuih ƀuôn sang djuê ana Jarai dôk hlăm dliê, hlăm čư̆, pưk sang amâo mâo, huă ƀơ̆ng dleh dlan mơh. Leh ala čar dưi mtlaih êngiê, mnuih ƀuôn sang ƀrư̆ msir klei ư̆ êpa, ƀun knap, phung hđeh dưi nao sang hră, êlan klông găn êrô prŏng siam... anăn jing klei đru mguôp prŏng prĭn mơ̆ng Đảng lehanăn Knŭk kna, mnuih ƀuôn sang amâo wơr bĭt ôh klei anei. Rơ Ô B’hung lŏ bi hdơr: 

Lŏ hdơr thŭn 1975, leh lăn čar mtlaih êngiê, mnuih ƀuôn sang hdĭp hlăm ênuk gưl êlâo dleh knap êdi, leh jih ênuk anei klei hdĭp dul ƀiă, đĭ kyar hĭn. Kyua mâo Đảng lehanăn knŭk kna mđing dlăng anăn phung hđeh dưi nao sang hră, bruă duh mkra đĭ kyar ƀiă, djăp ƀuôn sang mâo kdrăn lŏ hma, thâo pla mnơ̆ng dhơ̆ng, thâo čhĭ mnia. Êngao anăn, dŭm gŏ sang dleh dlan snăn knŭk kna lŏ brei prăk duh bi liê. Hŏng ai tiê hgŭm mguôp djuê ana, mnuih ƀuôn sang thâo đru hdơ̆ng găp, tui ksiêm hluê ngă msĕ hŏng adei Yuăn, mơ̆ng anăn, ƀuôn sang ƀrư̆ hruê ƀrư̆ đĭ kyar jăk siam”.

Klei dưi hƀuê ênuk hruê 30/4/1975 dưi sua wĭt klei êngiê krĭng kwar Dhŭng, hluh hlir ala čar dôk kđăm nanao hlăm klei mĭn phung lĭng kahan leh anăn mnuih ƀuôn sang dŭm djuê ana čar Kon Tum. Jing boh kdrŭt mtrŭt mjhar dŭm gưl phung knuă druh, lĭng kahan yang ƀuôn leh anăn mnuih ƀuôn sang hlăm čar lŏ dơ̆ng ksiêm hriăm, gĭr ktưn kyua bruă mkŏ mjing leh anăn răng mgang ala čar. Năng hơ̆k mơak hĭn jing klei hdĭp mnuih ƀuôn sang jing mnuih djuê ƀiă wăt kơ dŭm krĭng taih kbưi ti čar Kon Tum ƀrư̆ hruê ƀrư̆ mâo klei hơĭt. A Thương, ti ƀuôn Măng Rương, să Văn Lem, kdriêk Đăk Tô, brei thâo:

“Leh hruê sua wĭt klei êngiê krĭng kwar Dhŭng, hluh hlir ala čar, kluôm ala nao leh hlăm ênuk hƀuê ênuk mrâo. Klei dưi Đăk Tô – Tân Cảnh thŭn 1972 đru mguôp hlăm klei dưi klei bi blah Dưr krĭng Lăn Dăp Kngư. Truh ti thŭn 1975 dưi sua wĭt klei êngiê krĭng kwar Dhŭng, hluh hlir ala čar. Kyua mâo klei đru mơ̆ng Đảng leh anăn knŭk kna, alŭ Dăk Xăn ară anei mâo leh pui mngač hlăm êlan, anak čô dưi nao sang hră mơar. Klei hdĭp mnuih ƀuôn sang mâo lu klei mlih, lu gŏ sang gĭr ktưn, kpưn đĭ kơ mdrŏng. Mnuih ƀuôn sang mđĭ kyar klei hdĭp mda hŏng klei čoh bruă ngă hma, pla mjing dŭm ana mâo ênoh yuôm msĕ si kphê, ksu, prăk ba wĭt ƀrư̆ hruê ƀrư̆ đĭ, klei hdĭp trei mđao, yâo mơak.

A Đà, ti ƀuôn Đăk Xanh, să Văn Lem kdriêk Đăk Tô thŭn anei 64 thŭn. Hruê hdră mblah tŭ dưi Đăk Tô - Tân Cảnh 24/4/1972, Đà 14 thŭn lehanăn hruê mtlaih êngiê kluôm kwar Dhŭng 30/4/1975 hluh lir lăn čar Đà 17 thŭn. Jing sa čô mnuih đĭ hriê kơ prŏng hlăm ênuk bi blah, ñu nao hgŭm hlăm hdră bruă yang ƀuôn đru msir mghaih klei truh mơ̆ng klei mblah ngă, Đà ƀuh klă klei truh jhat mơ̆ng klei bi blah, ai tiê jhŏng ktang săn asei wơr pô mơ̆ng phung kahan lehanăn mnuih ƀuôn sang drei kyua klei êđăp ênang lehanăn hnŭk êngiê djuê ana. Hlăm dŭm hruê mlan 4 hƀuê ênuk, A Đà mgei ai tiê lŏ hdơr:

“Ară anei, mnuih ƀuôn sang kdriêk Đăk Tô, să Văn Lem thâo ba yua leh kdrăp mrâo hlăm bruă duh mkra pla mjing. Kyua mâo kle imđing dlăng mơ̆ng kdriêk, čar, duh bi liê leh hdră mtrŭn đru kơ mnuih ƀuôn sang, ƀrư̆ msir klei ư̆ êpa, bi hrŏ klei ƀun knap, lu gŏ sang mâo klei hdĭp h’ĭt kjăp. Mâo Đảng, Knŭk kna mtô mblang, mtrŭt mjhar anăn mnuih ƀuôn sang thâo kơ hdră duh mkra, klei hdĭp đĭ kyar, anak čô dưi nao sang hră m’ar djăp ênŭm, êlan klông, pui kmlă, sang hră ăt mâo knŭk knamđing dlăng rŭ mkra, ară anei mnuih ƀuôn sang dôk hluê ngă jăk dŭm hnơ̆ng čuăn hlăm bruă mkŏ mkra krĭng ƀuôn sang mrâo./.