Hlăm dua blư̆ hriê čuă lehanăn mă bruă ti čar Kon Tum hlăk thŭn 2011 lehanăn thŭn 2017, Khua gĭt gai Đảng Nguyễn Phú Trọng pioh nanao mmông nao čuă dlăng klei hdĭp mda mnuih ƀuôn sang djăp djuê ana. Hŏng knhuah êdu êun, thâo jĕ giăm, mâo ai tiê mđing hmư̆ klei blŭ mơ̆ng mnuih ƀuôn sang, mâo klei mtă mtăn kơ mnuih ƀuôn sang, mjing leh ai tiê jăk êdi hŏng mnuih ƀuôn sang ti Kon Tum amâo dưi wơr ôh. A Bát, ti alŭ Kon Rờ Bàng 2, să Vinh Quang, ƀuôn prŏng Kon Tum, lač:

 “Thŭn 2017 mnuih ƀuôn sang mâo bi tuôm leh hŏng A wa Nguyễn Phú Trọng tinei, Khua mduôn mđup brei kơ A wa sa blah ao djuê ana pô. A wa khua gĭt gai Đảng hriê kkuh čhưn êmuh kñă hŏng mnuih ƀuôn sang, ñu êyuh kngan hŏng grăp čô mnuih, mtă mtăn kơ mnuih ƀuôn sang gĭr ktĭr duah ƀơ̆ng, amâo mâo duah hmư̆ klei phung mplư mtrŭt mčhủ. Hmư̆ klei A wa Nguyễn Phú Trọng mtă snăn mnuih ƀuôn sang ti ƀuôn Kon Rờ Bàng mâo klei thâo bi mguôp, bi đru dlăng ba hdơ̆ng găp, ară anei ƀuôn sang pô mâo leh klei đĭ kyar jăk. Leh hmư̆ hing kơ A wa leh đuĕ nao hmei bŏ hŏng klei ênguôt, jih jang ênguôt sơăi, jih jang bi čŏk hiă”.

Jing mnuih mâo kơhưm hlăm êpul êya anak Êđê lu blư̆ hgŭm hlăm bruă dhar kreh djuê ana ti ƀuôn prŏng phŭn Hà Nội, Pô mbruă êdah êdi Ama H’Loan, ti ƀuôn Akŏ Dhông, ƀuôn prŏng Ƀuôn Ama Thuôt, čar Dak Lak brei thâo, Khua gĭt gai Đảng Nguyễn Phú Trọng jing khua gĭt gai jĕ giăm, mđing hmư̆ ai tiê klei mĭn mnuih ƀuôn sang.

Kyua dŭm hdră êlan djŏ klă mơ̆ng Gưl dlông hŏng klei gĭt gai mơ̆ng Khua gĭt gai Đảng, krĭng čư̆ čhiăng, knông lăn, krĭng mnuih djuê ƀiă bi mlih leh, đĭ kyar. Khua mduôn Ama H’Loan brei thâo:

“Mă ai tiê ênguôt hơưi anăn pô găn jih klei dleh dlan tui hlue klei Đảng, Knŭk kna gĭt gai, hlăm anăn mâo klei blŭ mơ̆ng Khua gĭt gai Đảng Nguyễn Phú Trọng. Hjăn kâo dôk hdĭp, brei mñă kơ mnuih ƀuôn sang, anak čô, gĭr ktưn mkŏ mjing Lăn Dap Kngư mdrŏng sah, đru mkŏ mjing lăn čar pô mdrŏng sah hĭn, jăk siam hĭn.”

Leh hmư̆ hing Khua gĭt gai Nguyễn Phú Trọng djiê, mnuih ƀuôn sang dŭm djuê aba ti să Quảng Tâm, kdriêk Tuy Đức, čar Đắk Nông bŏ hŏng klei ênguôt. Lŏ hdơr kơ klei Khua gĭt gai mtă, ñu mđĭ ai mnuih ƀuôn sang hlăk ñu hriê čuă mnuih ƀuôn sang Quảng Tâm mơ̆ng 12 thŭn êlâo, mnuih ƀuôn sang hlăm ƀuôn mâo leh klei thâo bi mguôp, sa ai tiê đăo knang tui hlue Đảng, Knŭk kna, sa ai tiê rŭ mdơ̆ng ƀuôn sang bi mdrŏng sah jăk siam.

Điểu Ngót, djuê ana M’Nông, Khua bruă êdam êra cộng sản Hồ Chí Minh să Quảng Tâm, kdriêk Tuy Đức, čar Dak Nông, lač:

 “Leh hmư̆ hing kơ khua gĭt gai Đảng djiê, jih jang phung mda asei hlăm să mâo sơaĭ klei ênguôt hnĭng kơ sa čô pô thâo kđi prŏng, thâo kiă kriê, thâo jĕ giăm hŏng mnuih ƀuôn sang, boh nik hŏng phung hđeh mda asei ti krĭng taih kbưi. Hmei phung hđeh mda asei čih pioh nanao klei ñu mtă, brei mâo nanao ai tiê thâo bi mguôp, sa ai tiê tui hlue klei Đảng, Knŭk kna kiă kriê. Hmei gĭr ktĭr ksiêm hriăm, duh ƀơ̆ng mđĭ kya klei hdĭp mda, rŭ mdơ̆ng ƀuôn sang pô, lăn čar knư̆ hrue knư̆ mdrŏng sah jăk siam.”