Hruê 14/8/2014, hlăm gưl nao mă bruă ti ƀuôn prŏng Cần Thơ, Khua gĭt gai Đảng Nguyễn Phú Trọng mbĭt hŏng êpul ngă bruă mơ̆ng gưl dlông mkăp leh mmông nao čuă, mă bruă hŏng bruă Đảng, knơ̆ng gĭt gai lĭng kahan alŭ wăl 9. Mnă klă kơhưm mơ̆ng wăl kahan jing anôk răng mgang hdră êlan yuôm bhăn, khua gĭt gai Đảng mñă hlăm wưng mrâo mâo klei mlih hmar, dleh ksiêm dlăng, amâo mâo brei mâo klei kjăt kƀla, rơ̆ng kơ klei kdơ̆ng mblah, đru kơ klei bi blah hlăm djăp boh klei, răng mgang kjăp wăl adiê, plao ksĭ, klei dưi kiă kriê lăn čar. Hluê ngă klei gĭt gai mơ̆ng Khua gĭt gai Đảng Nguyễn Phú Trọng, dŭm thŭn êgao, knuă druh, lĭng kahan alŭ wăl 9 bi lar ai tiê bi mguôp, hluê ngă hrăm mbĭt, tŭ dưn dŭm hdră êlan mkŏ mjing bruă Đảng alŭ wăl kjăp ktang kơ bruă kđi čar, klei mĭn, knhuah hdĭp, êpul êya leh anăn knuă druh.

Hlăk dôk hdĭp, hlăm lu bruă ngă, Khua gĭt gai Đảng Nguyễn Phú Trọng mâo nanao klei khăp êlam leh anăn klei mđing yuôm bhăn hŏng phung knuă druh, lĭng kahan êa yang ƀuôn Việt Nam leh anăn lĭng kahan Trường Sa. Klei bi blŭ hrăm mơ̆ng Khua gĭt gai Đảng hlăm gưl ñu nao čhưn ti Krĭng 4 Kahan êa hlăm hruê 5/5/2016, Khua gĭt gai Đảng êmuh hrăm klei hdĭp mda phung knuă druh, lĭng kahan leh anăn mnuih ƀuôn sang kdriêk plao ksĭ Trường Sa mđĭ ai hmei bi hgŭm, gĭr ktưn găn djăp klei dleh dlan čiăng bi leh jăk bruă klam Đảng, Knŭk kna jao. Khua gĭt gai Đảng đăo knang hlăm knhuah kđi čar, ai tiê bi kdơ̆ng, tŭ klei săn asei asei mơ̆ng phung knuă druh, lĭng kahan leh anăn phung knuă druh, lĭng kahan Krĭng 4 lač hjăn hlăm bruă klăm răng mgang klei dưi hlăm êa ksĭ, plao ksĭ mơ̆ng čar kwar. Thượng tá Nguyễn Văn Khương, Pô ngă bruă kđi čar ti plao ksĭ Song Tử Tây hdơr nanao kleii blŭ hing ang mơ̆ng Khua gĭt gai Đảng Nguyễn Phú Trọng. “Klei hing anh jing klei yuôm bhăn hĭn”.

 “Khua gĭt gai Đảng Nguyễn Phú Trọng jing pô bi hmô kơ knuih, kơ klei mĭn mnlang, kơ knhuah mă bruă, ƀiădah klei kâo hdơr hĭn leh anăn êlam hĭn anăn jing klei blŭ mơ̆ng Khua gĭt gai Đảng hlăm Klei bi kƀĭn kluôm ala dŭm anôk bruă hlăm Ala čar pŏk ngă hlue ngă Hdră mtrŭn 13 mơ̆ng Đảng (Hruê 15/9/2021/0. Anăn jing: “Anak mnuih knŏng sa blư̆ đuč, brei hdĭp tŭ dưn, čiăng đăm hƀlŏk ôh kyua bruă ngă amâo năng, amâo jăk. Prăk mah mâo lu kăn yuôm rei, djiê kăn dưi ba mbĭt mơh. Klei hing ang jing yuôm bhăn hĭn!”

 Hlăm gưl nao čuă, mă bruă ti čar Kon Tum hlăk mlan 4/2011, khua gĭt gai Đảng khua Bruă Kƀĭn Ala Nguyễn Phú Trọng mâo leh mmông nao čuă mnuih ƀuôn sang djuê ana Bahnar ti ƀuôn Đăk Mŭt, să Đăk Mar, kdriêk Đăk Hà. Tine, Khua gĭt gai Đảng Nguyễn Phú Trọng mđing hmư̆ kơ klei hdĭp, klei čiăng, klei hmăng mhưi leh anăn mtă mtă kơ mnuih ƀuôn sang bi lar ai tiê bi mguôp, bruă hlăm klei mă bruă knuă. Hdơr kơ klei mtă mtăn mơ̆ng khua gĭt gai Đảng, 13 thŭn êgao, 148 gŏ sang ti ƀuôn Đăk Mŭt dưi găn lu klei dleh dlan čiăng mđĭ kyar klei hdĭp mda, mkŏ mkra krĭng ƀuôn sang mrâo. Ayŏng A Nguyên, k’iăng khua bruă Đoàn să Đak Mar, khua ƀuôn Đăk Mŭt brei thâo:

 “Hdơr kơ klei mtă mơ̆ng Awa Trọng kâo pô bi mlih knhuah mĭn, hdră ngăn. Ngă djăp hdră kâo mkŏ mjing êpul bi mguôp phung êdam êra mđĭ kyar bruă duh mkra, čiăng mơ̆ng anăn phung êdam êra dưi ngă phŭn pô, ngă phŭn bruă duh mkra. Ară anei, Êpul bi mguôp mâo êbeh 15 čô bi hgŭm phung êdam êra mđĭ kyar bruă duh mkra leh anăn hlăm hgŭm hlăm bruă Đoàn, bruă êpul”.