Giăm 6000 êpul (hŏng 252.000 gưl čô mnuih), jing phung khua bi ala kơ Đảng, knŭk kna, dŭm phŭn dhar bruă, djăp alŭ wăl, êpul êya lĭng kahan, lehanăn phung bi ala mơ̆ng dŭm êpul bruă lehanăn ala čar mơ̆ng ala tač êngao, mnuih ƀuôn sang bi nao čang ênuh, mơĭt kwang mnga, mâo klei bi juh truh hŏng găp djuê khua gĭt gai Đảng Nguyễn Phú Trọng. Hŏng jih jang mnuih Khua gĭt gai Đảng jing sa čô pô duh myơr jih klei hdĭp kơ lăn čar, kơ mnuih ƀuôn sang kơ bruă rŭ mdơ̆ng lehanăn mđĭ kyar lăn čar. Lu mnuih bi lač, Khua gĭt gai Đảng Nguyễn Phú Trọng jing pô thâo kiă kriê lăn čar, jĕ giăm hŏng mnuih ƀuôn sang. Bi hŏng phung hđeh gưl mrâo anei jing anôk kơ klei tui hriăm, lehanăn hlue ngă. Hŏng jih jang bruă ngă, phung hđeh gưl mrâo brei mâo keli thâo bi ktưn, mjuăt hriăm hlue si knhuah khua gĭt gai čiăng jing sa čô mnuih jăk duh myơr lu kơ yang ƀuôn, kơ lăn čar.

Đoàn viên A Tống Tiến Quân, mơ̆ng bruă êdam êra čar Kon Tum lač, mlan 7 thŭn anei, mbĭt hŏng kluôm ala bi atăt mnguh mngăt khua gĭt gai Đảng Nguyễn Phú Trọng wĭt mdei, lehanăn bi hdơr kơ bruă prŏng prĭn ñu ngă leh, čiăng kơ asei pô tui hriăm:

 “Awa Nguyễn Phú Trọng jing leh sa klei bi hmô prŏng kơ phung hđeh mda asei čiăng dưi jing sa čô mnuih jăk, lehanăn anăp jing sa čô đảng viên mâo mta kñăm djŏ pioh mđĭ kyar lăn čar. Lač kơ jih bruă awa ngă leh, brei phung mda asei dlăng lehanăn tui hriăm pioh bi ktưn hlăm jih klei hdĭp pô”.

Jih klei hdĭp khua gĭt gai Đảng Nguyễn Phú Trọng ngă leh kyua mnuih ƀuôn sang, kyua lăn čar, sa čô pô thâo kđi, sa čô bŏ hŏng dhar kreh, hdĭp thâo jĕ giăm, êdu êun, ênuah ênô. Khădah Khua gĭt gai Đảng leh đuĕ nao, ƀiădah jih jang bruă ñu ngă leh dôk nanao hlăm ai tiê grăp čô mnuih Việt Nam lehanăn mâo mah jiăng ala tač êngao mpŭ./.