Cao Thị Nỷ, ti alŭ Suối Cá, să Khánh Trung, kdriêk Khánh Vĩnh mrâo dŭ mnơ̆ng mnuă nao dôk ti sang mrâo bi hrô kơ sang mdhă đưm. Ung mô̆ Nỷ amâo mâo lăn pla mjing, nao hiu mă bruă mưn hluê yan, anak điêt ruă duam, jing gŏ sang ƀun ti să Khánh Trung. Mơ̆ng thŭn 2023, sa đảng viên jing knuă druh phŭn ti să Khánh Trung mâo Anôk bruă Đảng să jao nao đru kơ gŏ sang Nỷ kpưn đĭ, tlaih mơ̆ng klei ƀun knap. Nỷ mâo đảng viên anei mjing klei găl nao hriăm adŭ mtô kơ klei tŭk knă mnơ̆ng ƀơ̆ng, mâo đru 60 êklăk prăk mdơ̆ng sang mrâo. Leh hriăm bruă, nao čhĭ mnơ̆ng, Nỷ dưi hưn mthâo nao ngă bruă tŭk knă ti sa boh sang hră hlăm sang, boh sang prŏng, mrâo, siam 40m2 dưi rŭ mdơ̆ng đru kơ ñu hơĭt ai tiê mă bruă. Cao Thị Nỷ brei thâo:

 “Ung mô̆ kâo mâo klei hdĭp dleh dlan, gĭr mă bruă rông ba anak điêt ruă duam mơh, leh kơnăn lŏ ba ĕ nao blač mdrao dơ̆ng. Anôk bruă mặt trận să đru leh sang dôk kơ kâo, dưi hriăm bruă mđĭ klei thâo čiăng čhĭ mnơ̆ng ƀơ̆ng. Mâo leh sang, mâo bruă, hmei srăng gĭr tlaih kơ ƀun.

Bruă Đảng să Khánh Trung, kdriêk Khánh Vĩnh, čar Khánh Hòa mâo êbeh 100 čô đảng viên, amâo mâo đảng viên ƀun. Să anei mâo giăm 90% mnuih ƀuôn sang djuê ƀiă, klei hdĭp adôk lu klei dleh dlan. Bruă Đảng să iêu mtrŭt leh jih anôk bruă kđi čar hgŭm kngan đru kơ dŭm gŏ sang ƀun, giăm ƀun. Grăp thŭn, bruă Đảng să mâo Hdră mtrŭn jao kơ phung đảng viên nao đru gŏ sang ƀun tlaih kơ klei ƀun knap. Mơ̆ng hdră ksiêm dlăng, bi mklă hnơ̆ng čuăn ƀun, bruă Đảng să jao kơ grăp čô đảng viên bruă ngă klă klơ̆ng. Cao Thị Thanh, Khua bruă Đảng să Khánh Trung, kdriêk Khánh Vĩnh, čar Khánh Hòa brei thâo, thŭn 2024, să mâo êbeh 90 gŏ sang tlaih kơ ƀun, hlăm anăn phung đảng viên iêu mguôp dưi mkra lehanăn msir lăm 11 boh sang dôk êjai đru kơ mnuih ƀuôn sang.

“Grăp čô đảng viên brei mâo ƀiă êdi 1 gru hmô đru kơ gŏ sang ƀun, snăn kơh dưi bi leh bruă klam. Boh sĭt, mơ̆ng keh Mặt trận čar kwar amâo djŏ knŏng đru kơ jih jang gŏ sang ƀun kluôm kdriêk ôh, ƀiădah brei ksiêm dlăng klă klơ̆ng. Kyua anăn, phung đảng viên lŏ iêu mkrum mguôp klei đru kơ mnuih ƀuôn sang. Đảng viên mâo klei găl hlăm hdră duh mkra, hdră mnêč ngă bruă kreh nao truh kơ dŭm gŏ sang ƀun, ktrâo lač kơ hdră rông mnơ̆ng, pla mjing. Đa đa blei mañ mjeh mnơ̆ng rông čiăng mjut mjing rông mnơ̆ng, iêu mtrŭt klei đru dưi mkăp brei mjeh ŭn, bê, êmô, ba wĭt leh boh tŭ dưn jăk.

Dŭm thŭn êgao, lu đảng viên mnuih djuê ƀiă ti čar Khánh Hòa mđĭ lar leh bruă klam ba akŏ, jing gru mngač hlăm hdră mă bruă, mđĭ klei đua klam “Đảng viên nao êlâo, ƀuôn sang hluê êdei”. Hlăm anăn, lu đảng viên mđĭ lar leh ai tiê đua klam, ba akŏ hlăm hdră mđĭ kyar bruă duh mkra, msir klei ư̆ êpa, bi hrŏ klei ƀun knap, mkŏ mkra klei hdĭp kreh dhar, rơ̆ng kjăp klei êđăp ênang ala ƀuôn. Trần Thị Việt, mnuih mâo kơhưm, 69 thŭn, Khua bruă Đảng alŭ Hòn Dù, să Khánh Nam, kdriêk Khánh Vĩnh brei thâo, lu thŭn êlâo, gŏ sang ñu ba akŏ hlăm bruă ba kbâo, mdiê lŏ, rông anak čô hriăm hră mơar tŭ jing. Mbĭt anăn, gŏ sang ñu ăt jing gru mngač hlăm êpul êya msĕ si hluê ngă kjăp hdră mtrŭn ênoh mnuih, amâo bi dôk ung mô̆ mơ̆ng mda, đru kơ gŏ sang dleh dlan gĭr ktưn kpưn đĭ.

“Jing mnuih mâo kơhưm hlăm êpul êya, đru kơ mnuih ƀuôn sang kyua anăn lač mnuih ƀuôn sang hmư̆ jih mơh. Mnuih ƀuôn sang ƀuh mŭt đảng dưi nao mjĕ mjuk, hơ̆k mơak, gĭr ktưn hĭn. Diñu lač dưi mŭt đảng jing klei ktưn hưn, dưi thâo kơ klei haoa hưn čiăng duh ƀơ̆ng, mđĭ kyar bruă duh mkra gŏ sang, tlaih kơ ƀun, rông ba anak čô jăk ênang.

Mơ̆ng akŏ wưng păn bruă truh kơ jih thŭn 2024, bruă Đảng kdriêk Khánh Sơn, čar Khánh Hòa bi mŭt leh 353 čô đảng viên, êgao hnơ̆ng čuăn mơ̆ng Hdră mtrŭn Klei bi kƀĭn bruă Đảng kdriêk kčah mtrŭn, mđĭ ênoh đảng viên hlăm kluôm kdriêk truh êbeh 1.600 đảng viên. Hlăm anăn, đảng viên jing mnuih djuê ƀiă giăm 50%.  Bùi Hoài Nam, khua bruă Đảng kdriêk Khánh Sơn brei thâo, lu phung khua mduôn, mnuih mâo kơhưm mnuih djuê ƀiă jing đảng viên. Jih diñu dưi mđĭ lar klei ba anăp, jing gru mngač hluê ngă jăk dŭm hdră êlan mtrŭn mơ̆ng Đảng, hdră bhiăn mơ̆ng Knŭk kna msĕ si mđĭ kyar bruă duh mkra, msir klei ư̆ êpa, bi hrŏ klei ƀun knap.

Đảng viên jing phung khua mduôn, khua ƀuôn mâo klei blŭ yuôm bhăn êdi, ba mtruh dŭm hdră êlan mtrŭn mơ̆ng Đảng, bi đru mđĭ kyar bruă duh mkra, đru tlaih kơ ƀun. Mnuih ƀuôn sang hlăm êpul êya ƀuh klă bruă klam mơ̆ng đảng viên, mơ̆ng anăn, mâo klei gĭr, čiăng mŭt hlăm Đảng, lŏ dơ̆ng duh myơr, kpưn đĭ kơ mdrŏng ti krĭng lăn ƀuôn sang Khánh Sơn./.