Hlăm dŭm hruê êgao, hmư̆ hing mnuih ƀuôn sang dŭm čar kwar Dưr tŭ klei kjham kyua êa lip lêč mơ̆ng angĭn êbŭ mrô 3, amai Nguyễn Hồng Tố Diễm, ti ƀuôn prŏng Pleiku, čar Gia Lai mprăp leh mnơ̆ng ƀơ̆ng leh anăn êa mnăm čiăng đru kơ mnuih ƀuôn sang krĭng êa lip. Dŭm mta mnơ̆ng mâo amai ba ti anôk bi kƀĭn, dăp khuăt guôn êdeh mdiăng ba.

 “Kâo hŏng amai kâo mơĭt ƀiă mnơ̆ng kơ mnuih ƀuôn sang ti angĭn êbŭ ngăm ăt hmăng hmưi phung nao ba wăt kơ êlan kbưi ƀiădah srăng truh kơ mnuih ƀuôn sang. Ăt hmăng hmưi grăp čô srăng đru kơ mnuih ƀuôn sang ti dŭm krĭng dôk tŭ klei hmăi.”

Bi lar ai tiê “Hla hrông luôm hla tĭ”, lu mnuih ti čar Gia Lai ăt iêo mthưr gŏ sang, găp djuê, mah jiăng bi mkrum mguôp mnơ̆ng ƀơ̆ng, êa mnăm leh anăn êa drao gŭn čiăng mơĭt kơ mnuih ƀuôn sang krĭng êa lip dŭm čar kwar Dưr. Ayŏng Võ Phi Hổ, pô sang êdeh Phi Hổ, êran êlan Gia Lai – Đà Nẵng brei thâo, leh mâo klei iêo mthưr, hlăm tlam hruê 11/9, mâo lu phung mâo ai tiê kmah hriê na mnơ̆ng kƀĭn tinei, kah mbha, bi đru mdul klei dleh dlan mâo mnuih ƀuôn sang kwar Dưr dôk găn.

 “Kâo jing pô iêo mthưr čiăng kơ mnuih ƀuôn sang Gia Lai hrăm mbĭt ba mnơ̆ng đru mguôp, ba klei khăp mơ̆ng mnuih ƀuôn sang Gia Lai truh hŏng mnuih ƀuôn sang kwar Dưr. Mbĭt anăn kâo ăt akâo kơ bruă sang čư êa alŭ wăl mañ anôk ksiêm hră mŭt War mnga Đồng Xanh jing anôk bi kƀĭn mnơ̆ng đru mguôp kyua anôk anei prŏng leh anăn amâo mâo kăm êdeh prŏng.”

Ăt hlăm hruê 11/9, Êpul khua bruă Đảng čar Gia Lai mâo hră mtrŭn mjêč mñă kơ dŭm gưl bruă Đảng nah gŭ, anôk bruă, alŭ wăl hlăm čar mjêč ngă klei mtrŭt mjhar iêo mthưr klei bi đru, bi mguôp kơ mnuih ƀuôn sang mâo klei hmăi. Mmông mtrŭt mjhar truh kơ jih hruê 13/9/2024. Mơ̆ng ênoh prăk mơ̆ng dŭm anôk bruă, dhar bruă mặt trận čar Gia Lai ăt jao 400 êklăk prăk mơĭt kơ mnuih ƀuôn sang dŭm čar kwar Dưr.

Ti Dak Lak, hŏng dŭm bruă ngă klă klơ̆ng, mnuih ƀuôn sang dŭm djuê ana ti čar Dak Lak mâo dŭm bruă đu bi mdul klei dleh dlan hŏng mnuih ƀuôn sang Kwar Dưr mâo klei hmăi mơ̆ng angĭn êbŭ, bi êdah ai tiê thâo khăp, thâo pap, klei bi mguôp mơ̆ng djuê ana Việt Nam. Ti kdriêk Lak, sa hlăm dŭm kdriêk dleh dlan mơ̆ng čar Dak Lak, anôk mâo 66% jing mnuih djuê ƀiă hdĭp mda, mnuih ƀuôn sang tinei ăt dôk bri hriăm mbĭt đru mguôp hruê ai, ngăn dŏ čiăng mkra “Klŏ êtak msăm klei khăp” mơĭt kơ mnuih ƀuôn sang kwar Dưr dôk hlăm klei dleh dlan. Mnuih ƀuôn sang amâo mâo uêñ kơ klei dleh dlan gui ba êtač lăn pla mơ̆ng sang ba bi kƀĭn ti sang yơng Quảng Trạch, să Dak Liêng, kdriêk Lak čiăng bi mguôp.

Ti čar Kon Tum, Êpul khua bruă Đảng čar Kon Tum iêo mthưr dŭm gưl bruă mbĭt hŏng êbeh 33.000 đoàn viên, phung êdam êra hlăm čar bi mkrum mguôp đru kơ mnuih ƀuôn sang mgaih msir boh jhat mơ̆ng angĭn êbŭ. Gưl đru mguôp anei mâo bruă Đoàn čar Kon Tum ngă hlăm 5 hruê, mơ̆ng tlam hruê 11/9 truh kơ jih hruê 15/9. Leh knăm mtrŭt mjhar hŏng klei tiê kmah mơ̆ng jih jang phung knuă druh, phung mă bruă anôk bruă đoàn čar Kon Tum bi sa ai mkrum mguôp đru kơ mnuih ƀuôn sang krĭng êa lip lêč kwar Dưr. Nguyễn Văn Mạnh, k’iăng khua bruă đoàn čar Kon Tum brei thâo:

 “Êpul khua bruă đoàn čar ăt hưn truh kơ jih jang dŭm anôk bruă đoàn dŭm kdriêk, ƀuôn prŏng. Êngao kơnăn ăt jing sa anôk mkŏ phung mâo ai tiê kmah. Dŭm êpul bruă đoàn kdriêk, ƀuôn prŏng mâo dŭm anôk bi kƀĭn mnơ̆ng dhơ̆ng. Jih jang mnơ̆ng đru mguôp mơ̆ng ƀuôn prŏng leh anăn dŭm kdriêk bi kƀĭn ti wăl tač. Mơ̆ng anăn êpul khua bruă đoàn čar lŏ mkŏ hŏng dŭm anôk bruă dŭ mdiăng ba mnơ̆ng dhơ̆ng truh kơ mnuih ƀuôn sang kwar Dưr čiăng đru kơ digơ̆ găn hgao klei dleh dlan anei.