Dôk ti anăp sang dlăng kơ mnuôr êa prŏng knŏng dŭm knhuang êbat, amai H’Uôt Niê, ti ƀuôn Kla, să Krông Ƀŭk, kdriêk Krông Pač mđing uêñ êdi kơ klei êđăp ênang mơ̆ng mnuih hlăm gŏ sang hlăk mnuôr êa anei êlam ƀiădah knŏng mâo dŭm ƀĕ giê điêt dlông tăp k’ŭt pioh gang. Phung mduôn, hđeh, tơdah amâo myun lĕ hlăm mnuôr êa msĕ si ƀăng êa anei huĭ hyưt êdi, huĭ srăng êka kjham, đa huĭ srăng truh kơ djiê, ngă kơ dŭm gŏ sang djiêu gah huĭ lehanăn mđing uêñ.

 “Huĭ hyưt kơ mnuih ƀuôn sang, boh nik phung hđeh điêt, mâo mnuih êbuh joh kngan, joh jơ̆ng leh. Huĭ hyưt ƀiădah amâo thâo bĭt mjing, diñu ngă snăn leh. Čang hmăng srăng lŏ mkra wĭt, čiăng kơ mnuih ƀuôn sang dôk hdĭp h’ĭt ênang, bi gŏ sang kâo tinei mâo phung mduôn, mâo phung hđeh, kâo ƀuh amâo h’ĭt ôh”.

Y-Grik Mlô, Khua bruă Đảng ƀuôn Kla, să Krông Ƀŭk kdriêk Krông Pač brei thâo, mơ̆ng leh pŏk hdră duh bi liê mkra mnuôr êa D3 găn alŭ, ƀuôn, mnuih ƀuôn sang amâo ư ai ôh hŏng hdră ngă mơ̆ng bruă sang čư̆ êa alŭ wăl kdriêk lehanăn să. Mnuih ƀuôn sang mâo lu blư̆ hưn lač kơ klei dleh, klei liê ti mang lehanăn dŭm klei huĭ hyưt anei truh kơ bruă sang čư̆ êa, ƀiădah truh kơ ară anei ka dưi msir mghaih mơh:

 “Mơ̆ng leh ngă snăn mnuôr êa anei amâo ba yua ôh. Knŭk kna duh bi liê luič lu prăk kăk, ƀiădah amâo ba yua snăn ngă luič liê ngăn prăk knŭk kna lu êdi. Luič liê ti mang, lehanăn hmăi truh kơ mnuih ƀuôn sang, kyua klei klưh lăn kreh mâo hlăm yan hjan. Sang djiêu gah anei huĭ snăk. Bi kƀĭn ƀuôn, bi tuôm hŏng mnuih ƀuôn sang, mâo leh klei blŭ hưn mdah mơ̆ng ênuk anăn truh kơ ară anei”.

Nguyễn Tiến Văn, K’iăng khua Anôk bruă sang čư̆ êa să Krông ƀŭk, kdriêk Krông Pač brei thâo, mnuôr êa D3 dưi rŭ mdơ̆ng leh thŭn 2015 ƀiădah knŏng dưi ba yua 1 thŭn lehanăn lui êruh. Mta phŭn, kyua anei mnuôr kƀiêng ƀiădah mkra prŏng hĭn lehanăn nah gŭ ƀô̆ lŏ. Hluê si Văn, mnuôr êa anei ară anei săr dơr gŭ lăn, amâo dưi ba yua ôh.

 “Mnuôr êa Đ3 anei ba yua thŭn 2015, ba yua 1 thŭn amâo lŏ yua ôh. Ară anei kpăk đuôm leh, lŭ lăn dơr jih. Kdriêk ăt ksiêm dlăng lehanăn mâo hdră mkra mđĭ ƀiădah amâo ƀuh klei tŭ dưn, tơdah ară anei lŏ mkra liê lu prăk anăn lui snăn”.

Mnuôr êa Đ3 dlông êbeh 1,4km, mâo Anôk bruă sang čư̆ êa kdriêk Krông Pač bi mklă duh bi liê thŭn 2013, jing sa hlăm dŭm kdrêč mơ̆ng hdră bruă knơ̆ng kdơ̆ng êa Krông Ƀŭk nah tluôn. Leh dŭm blư̆ mkra mlih hdră anei mâo ênoh duh giăm 15 êklai prăk. Klei năng mđing, êlâo kơ kdriêk Krông Pač rŭ mkra hdră anei, Anôk kriê dlăng hdră duh bi liê lehanăn mkŏ mkra hdră knơ̆ng kdơ̆ng êa mrô 8 hlăm Phŭn bruă Lŏ hma mđĭ kyar krĭng ƀuôn sang mâo leh hră m’ar mrô 513/BLQ-TĐ mtă brei mdei hdră duh bi liê kyua ênoh duh lu (truh 180 êklăk prăk/ha) jing amâo tŭ dưn.

Tŭ mă hră m’ar anei, Anôk bruă sang čư̆ êa kdriêk Krông Pač ăt bi êdah klei gĭr hŏng sa hră lŏ wĭt lač hlăm akŏ mlan 10/2013. Hlăm hră anei, kdriêk lač hdră duh bi liê jing čiăng êdi. Duh kơ mnuôr êa čiăng mkăp kơ hdră krih êa lehanăn êa yua srăng mđĭ klei tŭ dưn lehanăn ba wĭt boh tŭ sui, ƀrư̆ h’ĭt kjăp klei hdĭp mnuih ƀuôn sang hlăm krĭng, đru mtrŭt mđĭ bruă duh mkra – ala ƀuôn krĭng wăl.

Năng mđing hĭn, khădah mnuôr êa D3 amâo lŏ ba yua, thŭn 2019, Anôk bruă sang čư̆ êa kdriêk Krông Pač lŏ duh 850 êklăk prăk čiăng mkra mđĭ. Boh tŭ, mlan 8/2023, Anôk bruă ksiêm dlăng čar Dak Lak bi mklă, hdră mkra mđĭ mâo ênoh 850 êklăk prăk amâo ba wĭt klei tŭ dưn, ngă kơ mnuôr êa lŏ klưh hroh, săr dơr hlăm lŭ lăn hĭn.

Trần Hồng Tiến, Khua bruă Đảng kdriêk, Khua anôk bruă sang čư̆ êa kdriêk Krông Pač brei thâo, hluê boh tŭ ksiêm dlăng mơ̆ng Anôk bruă ksiêm dlăng čar, bruă Đảng čar, Êpul gơ̆ng bruă ƀuôn sang dôk brei Anôk bruă sang čư̆ êa kdriêk hưn mthâo dŭm mta klei djŏ tuôm kơ mnuôr êa D3 čiăng mâo hdră msir mghaih. Đăm lui boh klei mnuôr êa anei amâo lŏ ba yua ƀiădah lŏ duh prăk čiăng mkra mđĭ.

 “Anôk kriê dlăng bruă Đảng kdriêk, Êpul gơ̆ng bruă ƀuôn sang mâo leh dŭm êpul nao ksiêm dlăng. Leh ksiêm dlăng, mâo leh hră m’ar brei Anôk bruă sang čư̆ êa kdriêk hưn mthâo kluôm klei dôk mâo mơ̆ng mnuôr êa D3 anei. Anôk bruă sang čư̆ êa ăt hưn mthâo lehanăn bi trông hŏng Knơ̆ng bruă Lŏ hma mđĭ kyar krĭng ƀuôn sang mbĭt hŏng dŭm anôk bruă djŏ tuôm, nao ksiêm dlăng wĭt. Mâo leh klei dleh kpăk lehanăn ti anôk bi tuôm hŏng mnuih ƀuôn sang, hŏng bruă klam Khua kiă kriê Êpul hgŭm ăt mâo lu klei akâo, klei ba mdah brei tĭng dlăng kluôm ênŭm. Đăm lui mâo boh klei, gơ̆ jhat rai leh čiăng lŏ duh prăk mkra mđĭ amâo djŏ hdră snăn ăt lŏ jhat rai mơh”.