VOV4.Êđê- Phŭn bruă kahan ksiêm mkŏ mjing klei bi kƀĭn online hlue ngă hdră ksiêm kluôm jih jang klei êđăp ênang kơ bruă gang mkhư klei pui ƀơ̆ng, lehanăn dŏng đru. Tui si hdră mơ̆ng phŭn bruă kahan ksiêm, gưl ksiêm anei kơ bruă răng mgang kơ klei pui ƀơ̆ng, lehanăn dŏng đru tal anei srăng mkŏ mjing mơ̆ng hrue 15/10 hlŏng truh hrue 15/12/2022. Kahan ksiêm djăp alŭ wăl hlăm êpul êya ngă bruă ksiêm hnơ̆ng êđăp ênang kơ jih jang djăp anôk bruă mâo knŭk kna kiă kriê kơ bruă gang mkhư̆ klei pui ƀơ̆ng.

Hlăm anăn mđing kơ dŭm anôk duh mkra mnia mblei bi mâo djăp kdrăp răng mkhư̆ gang klei pui ƀơ̆ng, boh nik kñăm hlăm dŭm anôk lu mnuih, anôk ênưih lĕ hlăm klei huĭ hyưt klei pui ƀơ̆ng lehanăn klei mtuh msĕ si hlăm sang jưh, sang huă mnăm, anôk kdŏ mmuiñ, anôk dôk lu mnuih, sang dlông tal, sang mnia mblei prŏng, hjiê, anôk duh mkra./.

Pô mblang: Y-Khem Niê