VOV4.Êđê- Hlăm bruă bi mguôp hŏng ƀĭng ngă lŏ hma mkŏ mjing dŭm mta mnơ̆ng dhơ̆ng tŭ jăk mơ̆ng klei mkra mjing, ƀrư̆ hruê ƀrư̆ mâo lu hđeh êdam êra ti čar Dak Nông kčưm leh klei ngă bruă knuă, gĭr ktưn dưi mdrŏng sah kơ pô leh anăn yang ƀuôn.

 Hlăm dŭm hruê Tết, dŭm sang čhĭ kphê Enjoy ti ƀuôn prŏng Gia Nghiã, čar Dak Nông mơ̆ng pô mnia blei mda asei Lê Văn Hoàng mâo lu nanao phung blei. Êlâo anăn, hlăm wưng bi ktlah ala ƀuôn kyua Covid-119 bluh mâo, knơ̆ng bruă bi leh hdră dŭ mdiăng hluê hdră mrô, ba čhĭ lu ti anôk mrâo hlăm internet, ksiêm hriăm mđĭ kyar mnơ̆ng dhơ̆ng mrâo msĕ si Ca cao, sôcôlô, bơr ca cao, mac ca. Klei tŭ jing anei đru leh ayŏng Lê Văn Hoàng, Khua Knơ̆ng bruă kphê Bazan Dak Nông dưi bi mni hlăm Top 10 “Phung mnia blei mda asei êdah kdlưn thŭn 2021” hlăm kluôm ala.

Mphŭn čô̆ kơ bruă mơ̆ng sa sang čhĭ phê điêt ti Gia Nghiã bi mguôp mkra mjing kphê kpŭng, ară anei ayŏng Lê Văn Hoàng mđiư kyar leh 10 sang čhĭ kphê mâo anăn knăl Enjoy Coffee, bi mguôp hŏng mnuih ƀuôn sang alŭ wăl mjing krĭng kphê dŭm êtuh ha kphê doh.

“Pô bi mklă nanao hlei pô jing, hŏng ai tiê gĭr, leh pô dưi mă ai ƀĭng ngă lŏ hma snăn brei thâo săng pô ka djăp klei dưi ôh, snăn pô wĭt ngă. Leh mă bruă leh anăn mâo anôk ba čhĭ, dưi mđĭ kyar snăn pô srăng dưi mă ai diñu. Grăp mnĭt mmông brei pô mâo ai tiê anăn, wăt msĕ si klei hmei mâo mnơ̆ng dhơ̆ng mrâo msĕ mơh. Năng ai thŭn anei amâo dưi mâo ôh mnơ̆ng dhơ̆ng mrâo, ƀiădah pô pioh leh mơ̆ng tur knơ̆ng thâo săng kơ mnơ̆ng dhơ̆ng. Jing tuôm dleh dlan snăn pô srăng amâo mdei tăp năn ôh, ƀiădah brei duah sa hdră ngă mrâo čiăng ngă bruă ênưih hĭn.”

 Ayŏng Lê Văn Hoàng hlăm knăm mđup brei anăn knăl Top 10 “Anôk bruă duh mkra mda asei êdah kdlưn thŭn 2021” (Pô dôk tal 3 mơ̆ng điâo nao kơ hnuă)

 Mklăk hŏng ai êwa kdrăm kơah mơ̆ng sang čhĭ kphê, anôk bruă mkra mjing čê boh kmĭl Anna Food mơ̆ng amai Lê Thị Ly Na êđăp ênang ti krah đang kyâo, ênao êa ti jơ̆ng čư̆ êngao ƀuôn prŏng Gia Nghĩa. Hŏng klei găl jing mta mnơ̆ng dhơ̆ng sa anăn ti Lăn Dap Kngư, čê boh kmĭl Anna ƀrư̆ dưi ba čhĭ hlăm kluôm ala leh anăn mphŭn ba čhĭ dlông rŏng lăn. Knhal jih thŭn 2021, amai Le Thị Ly Na, khua anôk bruă mkra mjing čê boh kmĭl Anna Food ktưn hưn jing sa hlăm phung êdam êra krĭng ƀuôn sang êdah kdlưn kluôm ala dưi mâo klei Pah ni Lương Định Cuả tal XVI mơ̆ng Êpul êdam êra cộng sản Hồ Chí Minh mđup brei. Klei tŭ jing hŏng čê boh kmĭl, ñu lŏ dơ̆ng mđĭ kyar dŭm mnơ̆ng dhơ̆ng kdô čê kar, kpŭng boh kmĭl, êa boh kmĭl mđam; leh anăn pŏk anôk mkra mjing ƀung krô mơ̆ng braih Ƀuôn Čuah, boh kroh, djam tam Dak Song. Amai Lê Thị Ly Na brei thâo dŭm mta mnơ̆ng dhơ̆ng anei mâo phŭn agha mơ̆ng mnơ̆ng dhơ̆ng lŏ hma pla mjing doh ti alŭ wăl.

“Kâo ƀuh knŏng dưi mkra mjing lu mta snăn kơ dưi mđĭ ênoh mnơ̆ng dhơ̆ng mơ̆ng mnuih ƀuôn sang. Sĭt pô mkra mjing čiăng mđĭ ênoh, snăn pô blei mơ̆ng mnuih ƀuôn sang lu ƀiă, pô rơ̆ng klei tŭ dưn kơ ƀĭng ngă lŏ hma, snăn klă sĭt jing hdră mkra doh mơ̆ng pô diñu srăng hluê ngă”.

 Amai Lê Thị Ly Na leh anăn dŭm mta mnơ̆ng dhơ̆ng anôk bruă Anna Food

Hluê si ayŏng Châu Ngọc Lương, Khua dlăng bruă êdam êra čar Dak Nông, hlăm dŭm thŭn giăm anei, ƀrư̆ hruê ƀrư̆ mâo lu hĭn phung mda asei mphŭn čô̆ kơ bruă tŭ jing mơ̆ng bruă mđĭ lar dŭm mta mnơ̆ng dhơ̆ng mdê hjăn ti alŭ wăl. Đru kơ phung êdam êra, bruă êdam êra čar iêô leh phung thơ̆ng kơ bruă wĭt đru kčĕ, amâodah blŭ hrăm online hŏng phung êdam êra kơ klei mphŭn čô̆ kơ bruă. Hŏng bruă đru hriăm mjuăt klei thâo mkŏ mjing hdră bruă, êpul bruă êdam êra ăt đru kơ phung êdam êra dưi yua prăk čan mă mnga hdjul mơ̆ng Keh prăk ala čar kơ bruă mă, Knơ̆ng prăk đru ba ala ƀuôn… hŏng ênoh can prăk giăm 700 êklai prăk. Hjăn keh prăk đru kơ phung êdam êra mphŭn čô̆ kơ bruă mơ̆ng čar Dak Nông thŭn mrâo êgao mâo êbeh 6 êklai prăk, đru kơ phung hđeh hluê ngă klei mĭn mphŭn čô̆ kơ bruă. Ayŏng Châu Ngọc Lương, brei thâo:

“Phung êdam êra Dak Nông ară anei mâo ai tiê, klei khăp, klei mĭn mphŭn čô̆ kơ bruă snăn mơak snăk. Phung êdam êra jưh kơ hră mơar pô čiăng čih anăn dŭm hdră bruă mphŭn čô̆ kơ bruă leh anăn klei tŭ knhal jih thŭn 2021 brei ƀuh lu mnơ̆ng dhơ̆ng mphŭn čô̆ kơ bruă čar Dak Nông dưi hgŭm bi lông mă klei pah mni phung êdam êra mă bruă duh mkra kyua Gưl dlông pŏk ngă snăn dưi mâo leh dŭm klei pah mni jăk, klă klơ̆ng mâo 4 mta mnơ̆ng. Phung êdam êra ba yua leh jih klei găl kơ yan adiê, klei găl ti čar Dak Nông čiăng mâo mnơ̆ng dhơ̆ng duh mkra djŏ guôp.”

Mđĭ lar ai ktang phung mda asei, pral kdal mbruă ba yua jih klei găl mơ̆ng alŭ wăl, phung êdam êra Dak Nông hlăk gĭr ktưn čiăng kpưn đĭ kơ mdrŏng mơ̆ng gŏ sang leh anăn ƀuôn sang lăn čar./.

Pô mblang: H’Zawut Ƀuôn Yă