Aguah 26/12, ti Hà Nội, Klei bi kƀĭn phung bi ala kluôm ala Êpul hgŭm ƀĭng lŏ hma Việt Nam tal VIII, wưng 2023-2028 mphŭn pŏk kdrưh kơăm ti Anôk bi kƀĭn ala čar Mỹ Đình. Khua gĭt gai Nguyễn Phú Trọng nao leh anăn mâo klei blŭ hrăm gĭt gai yuôm bhăn hlăm Klei bi kƀĭn. Hŏng akŏ “Bi hgŭm - êngiê - mbruă- bi hgŭm- mđĭ kyar” Klei bi kƀĭn ƀĭng ngă lŏ hma Việt Nam tal VIII mâo klei đru mguôp mơ̆ng giăm 1 êbâo čô bi ala klă sĭt, bi ala kơ êbeh 10 êklăk čô hgŭm hlăm êpul hgŭm ƀĭng lŏ hma kluôm ala.  Phung bi ala bi trông, brei klei blŭ mguôp hlăm hră čih dŭm hră mơar yuôm bhăn, mâo: Klei hưn mdah kđi čar mơ̆ng Êpul hgŭm ƀĭng lŏ hma Việt Namj gưl VII; Hră čih hưn mdah ksiêm dlăng mơ̆ng Anôk dlăng bruă Đảng gưl dlông Êpul hgŭm ƀĭng lŏ hma gưl VII; hră čih klei bhiăn Êpul hgŭm ƀĭng lŏ hma Việt Nam (mbŏ, mkra mlih). Klei bi kƀĭn ăt bi trông bi mklă hdră êlan, hdră kñăm, bruă klam kơ jih wưng păn bruă; ruah Anôk bruă gĭt gai wưng 2023-2028. Hlăm jar Klei bi kƀĭn ăt srăng mkŏ mjing 10 klei bi trông mâo akŏ kñăm kčĕ klei mĭn mbruă msir mgaih bruă prŏng kčah hŏng bruă ngă mơ̆ng Êpul hgŭm ƀĭng lŏ hma Việt Nam, mă klei blŭ mguôp, kčĕ čiăng bi klin, tŭ mă hlăm hră mơar Klei bi kƀĭn.

 Blŭ hrăm gĭt gai hlăm klei bi kƀĭn, Khua gĭt gai Nguyễn Phú Trọng mtă, dŭm gưl Êpul hgŭm ƀĭng lŏ hma kluôm ala brei lŏ dơ̆ng mlih mrâo ktang hĭn boh phŭn, hdră ngă, mđĭ hnơ̆ng jăk, boh tŭ ngă bruă mơ̆ng êpul hgŭm; mkŏ mjing Êpul hgŭm ƀĭng lŏ hma ƀrư̆ kjăp ktang, klă sĭt jing êpul bi ala kơ klei dưi, boh tŭ djŏ hdră bhiăn, klă sĭt mơ̆ng ƀĭng lŏ hma; mđĭ lar bi jăk bruă klam jing anôk phŭn kơ hdră bruă ƀĭng lŏ hma, jing kban mkŏ plah wah ƀĭng lŏ hma hŏng Đảng, Knŭk kna; jing mta jăk hlăm êpul bi hgŭm djuê ana, êpul hgŭm “Phung mă bruă - ƀĭng lŏ hma- phung hriăm lu”./.