VOV4.Êđê - Tlam anei 9/8, ti Sang bruă kƀĭn ala, Mphŭn pŏk klei bi kƀĭn tal 14 mơ̆ng Dhar bruă kƀĭn ala. Hlăm klei bi kƀĭn anei, Dhar bruă gĭt gai bruă kƀĭn ala brei klei blŭ kơ hdră mĭn tĭng duh bi liê knŭk kna man dưn prăk knŭk kna gưl dlông wưng 2021-2025 kơ anăn hdră bruă dưi bi leh hră mơar duh bi liê leh anăn mbŏ, mkra mđĭ hdră kčah duh bi liê man dưn prăk knŭk kna gưl dlông wưng 2021-2025 mơ̆ng dŭm phŭn, anôk bruă gưl dlông leh anăn alŭ wăl (gưl 3).  Brei klei blŭ tal êlâo kơ hră čih klei tŭ ktuê dlăng akŏ “Bruă hlue ngă hdră êlan, hdră bhiăn kơ klei hlue ngă mkiêt mkriêm, bi kdơ̆ng luič liê mang wưng 2016-2021” leh anăn dŭm boh phŭn yuôm bhăn mkăn. Klei năng mđing hlăm klei bi kƀĭn anei, Dhar bruă gĭt gai bruă kƀĭn ala srăng mkŏ mjing bruă êmuh leh anăn wĭt lač klei êmuh. Êpul bruă tal sa mâo Dhar bruă gĭt gai bruă kƀĭn ala êmuh hlăm bruă mơ̆ng Phŭn bruă kahan ksiêm. Bruă klam wĭt lač phŭn jing Khua phŭn bruă kahan ksiêm Tô Lâm. Êpul bruă tal dua hlăm bruă dhar kreh, mjuăt asei mlei leh anăn hiu čhưn ênguê. Bruă klam wĭt lač phŭn jing Khua phŭn bruă Nguyễn Văn Hùng. Hlăm klei êmuh, phung K’iăng Khua knŭk kna leh anăn phung Khua phŭn bruă hrăm mbĭt wĭt lač klei êmuh, hlak mblang kơ dŭm bruă djŏ tuôm kơ 2 mta bruă mrâo lač./.

H’ Zawut pô mblang