Mĭn tĭng klei kƀĭn srăng mkŏ mjing mơ̆ng hruê 5 – 7/7, bi klă 2 hdră mtrŭn kơ mnuih mă bruă leh anăn ksiêm dlăng, bi klă 22 hdră mtrŭn djŏ tuôm hŏng klei duh bi liê bruă knŭk kna, bruă duh mkra ala ƀuôn ti alŭ wăl. Bi kơ boh klei mnuih mă bruă, bi ala bruă sang čư êa čar Gia Lai, Trương Hải Long- khua bruă sang čư êa čar Gia Lai bi êdah hră hưn mdah kơ bruă ruah mdưm Phạm Minh Trung, khua kiă kriê knơ̆ng bruă hdră êlan leh anăn duh bi liê păn ngă khua hlăm bruă sang čư êa čar. Boh tŭ klei ruah mdưm leh kơnăn, Phạm Minh Trung mâo mă 62/63 pŏk hră mplĕ. Mĭn tĭng, hlăm gưl kƀĭn anei, Êpul gơ̆ng bruă ƀuôn sang čar Gia Lai srăng ksiêm dlăng 22 hdră mtrŭn mơ̆ng bruă sang čư êa čar Gia Lai. Hlăm anăn mâo lu hdră mkăp yuôm bhăn msĕ si: Mkra mlih hdră êlan duh bi liê bruă knŭk kna thŭn 2023 mơ̆ng ngăn prăk alŭ wăl, mkra mlih hdră êlan duh bi liê wưng man dưn, mlih mta kñăm yua lăn dliê čiăng mkra êlan mlir să ti kdriêk Kông Chro.

 Ti ƀuôn prŏng Kon Tum, Êpul gơ̆ng bruă ƀuôn sang čar Kon Tum mphŭn pŏk klei bi kƀĭn tal 5, gưl XII, wưng 2021-2026.  Hlăm klei bi kƀĭn, Êpul gơ̆ng bruă ƀuôn sang čar Kon Tum srăng ksiêm dlăng, ktuê dlăng boh tŭ hlue ngă bruă klam mơ̆ng dŭm anôk bruă hlue si hdră kčah, bi trông, ksiêm dlăng boh klei duh mkra- ala ƀuôn 6 mlan akŏ thŭn, bi mklă hdră êlan, bruă klam phŭn 6 mlan knhal jih thŭn 2023 leh anăn bi mklă dŭm mta phŭn hlăm klei dưi.

Mkŏ mjing mơ̆ng ară anei truh jih hruê 7/7, Klei bi kƀĭn tal 5, Êpul gơ̆ng bruă ƀuôn sang čar Kon Tum gưl XII, wưng 2021-2026 srăng ksiêm dlăng bi mklă hŏng 32 boh phŭn Knơ̆ng bruă sang čư̆ êa čar hưn mdah hlăm klei bi kƀĭn, hlăm anăn mâo dŭm hdră êlan yuôm bhăn,msĕ si hnơ̆ng đru čiăng hlue ngă Hdră dăp mnuih ƀuôn sang dŭm krĭng yan adiê ngă, dleh dlan, knông lăn, phung čŏng hiu dôk, wăl dliê hrông ti čar; mbha prăk đru mđĭ kyar êpul hgŭm bruă; mkra mlih hdră kčah hlue ngă dŭm hdră kñăm ala čar thŭn 2022, 2023 leh anăn mĭn tĭng hdră msir mbha hdră kčah  bi liê thŭn 2024./.