VOV4.Êđê - Aguah 8/9, ƀuôn prŏng Hồ Chí Minh mphŭn pŏk knăm rang mdah Hiu čhưn quốc tế ƀuôn prŏng Hồ Chí Minh 2022 (ITE HCMC 2022). K’iăng Khua Knŭk kna Vũ Đức Đam nao hlăn knăm mphŭn pŏk, hŏng êbeh 1.500 čô bi ala kơ dŭm anôk bruă kriê dlăng, phung thơ̆ng kơ bruă hiu čhưn ênguê, dŭm anôk bruă hiu čhưn ênguê mơ̆ng 45 čar, ƀuôn prŏng hlăm ala čar leh anăn 28 ala čar, krĭng lăn, Hŏng akŏ “Hrăm mbĭt ngă bruă hrăm mbĭt đi kyar”, knăm rang mdah tal anei čang hmăng pŏk êbeh 6000 klei bi mnia blei phung blei hŏng anôk bruă rang mdah.

Hlăm knăm rang mdah mâo lu klei bi kƀĭn prŏng msĕ si: klei rang mdah hiu čhưn ênguê gưl dlông “Hdră msir kơrŭ wĭt leh anăn mđĭ kyar hiu čhưn ênguê lu ala čar hơĭt kjăp”, klei bi kƀĭn “Mđĭ kyar tuê hiu čhưn hlăm anôk hiu čhưn ênguê phŭn leh anăn mâo klei găl ti Việt Nam”, “Bi mlih mrô hlăm bruă hiu čhưn ênguê” leh anăn hdră hâo hưn kơ anôk truh. Hlăm 3 hruê mkŏ mjing Knăm rang mdah mơ̆ng 8/9 truh 10/9, mnuih ƀuôn sang leh anăn tuê hiu čhưn dưi ksiêm dlăng kơ lu tuor hiu čhưn, mnơ̆ng dhơ̆ng hiu čhưn ênguê hlăm ala čar leh anăn ala tač êngao hŏng lu klei đru jăk snăk./.

H’ Zawut  pô mblang