Čar Daklak rŭ mdơ̆ng dŭm boh sang hră knŭk kna čiêm rông mlih gưl ti ƀuôn hgŭm  Ea Bung. Hŏng prăk duh bi liê truh 250 êklai prăk jing prăk mơ̆ng gưl dlông lehanăn alŭ wăl rŭ mdơ̆ng hlăm ênhă 6 ha ti alŭ mrô 1. Leh ruĕ rŭ mdơ̆ng sang hră anei srăng mâo anôk kơ êbeh 1.300 čô hđeh hriăm hră jing mnuih djuê ƀiă hlăm knông lăn. Ƀuôn hgŭm Ea Bung mâo mkŏ mjing leh dưi bi mŭt mbĭt mơ̆ng Ea Bung lehanăn Ya Tờ Mốt (hđăp), alŭ wăl jing prŏng mnuih dôk rưng, klei phung hđeh êrô nao sang hră kbưi, dleh dlan boh nik hlăm yan hjan, tuôm hŏng lu klei dleh dlan. Bruă rŭ mdơ̆ng sang hră knŭk kna čiêm rông mjing leh klei čang hmăng mâo klei bi mlih prŏng hlăm bruă mjuăt bi hriăm hlăm krĭng knông lăn./.

Čar Lâm Đồng mkŏ mjing hdră rŭ mdơ̆ng 3 boh sang hră mlir gưl ti dŭm să knông lăn Tuy Đức, Thuận Hạnh lehanăn Đắk Wil. 3 sang hră maoa ênoh duh 674 êklai prăk. Sang hră rŭ mdơ̆ng hluê gưl III, dlông mơ̆ng 1 truh 3 tal. Wwng rŭ mdơ̆ng mơ̆ng mlan 3/2026 truh mlan 8/2027. Leh mdơ̆ng, sang hră srăng drông 4 êbâo čô hđeh mơ̆ng gưl sa truh gưl dua jing anak aneh mnuih djuê ƀiă hlăm krĭng./.

Čar Quảng Ngãi mkŏ mjing leh knăm mphŭn rŭ mdơ̆ng sang hră knŭk kna čiêm rông mlir gưl ti 5 boh ƀuôn hgŭm knông lăn mâo: Bờ Y, Ia Tơi, Ia Đal, Đăk Long lehanăn Đăk Plô. Ênoh bi liê jih jang 5 boh sang hră anăn jing êbeh 1.100 êklai prăk. Grăp boh sang hră mâo mdơ̆ng hlăm ênhă 5 héc ta, pioh kơ 700 truh 1.600 čô hđeh dưi hriăm, djŏ guôp hŏng mdê bi alŭ wăl. Bruă rŭ mdơ̆ng sang hră anei nao mđrĭng hŏng bruă rŭ mdơ̆ng mđĭ kyar bruă sang hră mơar.

Hlăm kluôm čar Quảng Ngãi mâo rŭ mdơ̆ng truh 9 boh sang hră knŭk kna čiêm rông ti dŭm boh ƀuôn hgŭm knông lăn. Wưng tal êlâo, čar mdơ̆ng 4 boh sang hră ti dŭm boh ƀuôn hgŭm  Rờ Kơi, Mô Rai, Sa Loong lehanăn Dục Nông, srăng bi leh hlăm mlan 7/2026. Jih 5 boh sang hră srăng mdơ̆ng hlăm gưl tal dua, srăng bi leh hlăm mlan 8/2027./.