Hluê si klei ksiêm duah phŭn, ti knhal jih mlan 10/2023, adŭ bruă răng mgang êlan mạng leh anăn gang mkhư̆ phung ngă soh yua kdrăp mrâo mrang kahan ksiêm čar Dak Lak lŏ dơ̆ng mă hdră kčŭt hưn mơ̆ng sa čô ti să Ea Tu, ƀuôn prŏng Ƀuôn Ama Thuôt, hŏng mta jing phung mâo sa čô mplư čhĭ boh mnga lay ơn hlăm mạng leh anăn hlŏng plah mă 10 êklăk prăk. Hŏng klei ngă bruă, kahan ksiêm bi klă pô ngă klei mplư anei jing Nguyễn Văn Khởi, dôk hdĭp ti Sóc Trăng. Mă bruă hŏng kahan ksiêm, mphŭn kčưm Khởi tŭ ư, tuôm nao sang mnă kyua klei soh “Mplư plah mă mngă dŏ”, ka dưi lăm gru klei soh.

Ti knhal jih thŭn 2022,  pô anei kbiă mơ̆ng sang mnă leh anăn lŏ mâo klei mĭn hiu mplư plah mmiă ngăn dŏ mă prăk yua. Čiăng kơ bruă anăn, Khởi mkra account Facebook mâo anăn “Hoa Tươi Đà Lạt”, nao hlăm lu êpul čhĭ mnia mnga mjeh leh anăn boh kroh ti Facebook.

Êjai mâo pô blŭ grăm čiăng blei, Khởi brei mơĭt ĭt prăk mgrơ̆ng leh anăn gang jih klei blŭ hrăm, plah mmiă ngăn dŏ. Hŏng mnêč anei, mơ̆ng knhal jih thŭn 2022 truh kơ ară anei, Khởi mplư leh giăm 100 čô ti lu čar, ƀuôn prŏng hlăm lăn čar, mplư mă êbeh 500 êklăk prăk./.