Gưl hriê čuă mâo klei yuôm hƀuê êuk, jing bruă bi trông êpul gưl dlông tal êlâo plah wah dua ala čar mơ̆ng hruê mkŏ mjing klei mjĕ giăm 45 thŭn êlâo (1980-2025).  Tlam hruê 12/11, leh knăm tŭ drông, Khua lăn čar Lương Cường blŭ hrăm hŏng mta Jordan. Hlăm ai êwa pŏk mlar, đăo knang leh anăn thâo săng kơ hdơ̆ng pô, dua čô khua gĭt gai bi tŭ ưm mđĭ hĭn klei mjĕ giăm dua tĭng hlăm wưng mrâo. Dua tĭng bi kjăp klei đăo knang hŏng klei bi trông êpul, boh  nik jing êpul gưl dlông.

Mbĭt anăn mtrŭt mđĭ klei bi mguôp hlăm dŭm mta bruă yuôm bhăn mkăn, hlăm anăn mâo bruă lĭng kahan, klei êđăp ênang, kah mbha klei hưn, bi trông phung thơ̆ng kơ bruă…Hlăm bruă duh mkra, dua čô khua gĭt gai bi tŭ ư mkŏ mjing klei găl kơ bruă pŏk mlar anôk mnia mblei kơ dŭm mta mnơ̆ng mâo klei găl, mbĭt anăn mtrŭt mjhar knơ̆ng bruă dua ala čar ksiêm dlăng klei bi mguôp, duh bi liê, boh nik hlăm bruă mkŏ mkra, bruă duh mkra mrô, bruă duh mkra mtah, dăng kông, mkra mjing, boh mnga bruă lŏ hma….Mtao Jordan mñă kơ dua ala čar ksiêm duah hnưm pŏk êlan phiơr kpă. Dua čô khua gĭt gai ăt bi trông kơ dŭm hdră êlan mtrŭt mđĭ klei bi mguôp bruă mdrao mgŭn, jing klei găl mơ̆ng Jordan, boh nik jing klei mkă dlăng, mdrao klei ruă mơ̆ng kbưi, yua kdrăp mrâo mrang hlăm klei mdrao mgŭn.