VOV4.Êđê- Giăm 9 êbâo čô êdam êra ti 5 čar Lăn Dap Kngư nao mŭt kahan, ngă bruă răng mgang čar kwar. Wăt tơdah mkŏ mjing hlăm boh klei ruă Covid-19 ăt adôk dleh ktuê dlăng, ƀiădah knăm jao mŭt kahan thŭn anei mkŏ mjing rơ̆ng êđăp ênang, kdrưh kơăm, klă sĭt jing knăm mơak nao mŭt kahan mơ̆ng phung êdam êra.

Hlăm gưl iêo mŭt kahan thŭn anei, kluôm čar Daklak mâo truh 2 êbâo 500 čô hđeh êdam êra nao ngă bruă čuăn lĭng kahan, 427 čô nao ngă kahan ksiêm. Phung êdam êra nao mŭt kahan gưl anei djăp sơăi ênoh čuăn kơ bruă kđi čar, thŭn mŭt kahan, klei suaih pral, klei thâo hră mơar. Msĕ si, êbeh 70 čô mâo hnơ̆ng hriăm ti gưl prŏng – gưl krah; 8 čô jing đảng viên, ênoh mnuih djuê ƀiă êgao kơ mkrah.

Bi ala Phŭn bruă kahan ksiêm, bruă Đảng čar Dak Lak hŏng dŭm phŭn, dhar bruă mđĭ ai phung êdam êra ti Dak Lak nao mŭt kahan

Hlăm hrue nao mŭt kahan, kahan mrâo Y-Săm Mlô, ti ƀuôn hgŭm Êa Tam, ƀuôn prŏng Ƀuôn Ama Thuôt lač:

“Nao mŭt kahan jing bruă čuăn yuôm bhăn hŏng phung hđeh êdam. Kyuanăn kâo ngă hră akâo nao mŭt kahan. Kâo srăng gĭr hriăm mjuăt bi leh jăk bruă čuăn”.

Hlăm gưl jao kahan thŭn 2022, čar Dak Lak mâo 2.500 čô êdam êra ngă bruă kahan, 427 čô êdam era nao ngă bruă kahan ksiêm

Čar Lâm Đồng thŭn anei mâo 1 êbâo 150 čô hđeh êdam êra nao mŭt kahan. Anei jing phung hđeh êdam tŭ dưn mâo hrŏng ruah mơ̆ng 12 boh kdriêk, ƀuôn prŏng hlăm čar. Knăm jao mŭt kahan mkŏ mjing kdrăm k’ah ti dŭm alŭ wăl, rơ̆ng mâo klei êđăp ênang lehanăn yuôm bhăn.

Thŭn anei čar Daknông mâo êbeh 1 êbâo čô hđeh êdam êra mŭt kahan, hlăm anăn mâo giăm 900 čô nao ngă bruă čuăn lĭng kahan, êbeh 100 čô nao ngă kahan ksiêm. Hlăm ênoh phung hđeh êdam nao mŭt kahan răng mgang lăn čar gưl anei jih jang jing phung đoàn viên, mâo 11 čô hriăm jih gưl krah, gưl prŏng, lehanăn êbeh 50% ênoh mnuih djuê ƀiă.

mtluk mtlak knăm mơak nao mŭt kahan ti Dak Nông

2 êbâo 656 čô hlăk ai mơ̆ng čar Gialai ăt nao mŭt kahan. Hlăm ênoh hđeh êdam êra nao mŭt kahan gưl anei mâo hnơ̆ng hriăm mơ̆ng gưl krah, gưl prŏng êbeh 1,4%, mâo 22 čô jing đảng viên, êbeh 60% jing mnuih djuê ƀiă. Yăl dliê êlâo kơ mmông nao mŭt kahan, kahan mrâo Nguyễn Bá Kiên, ƀuôn hgŭm Thắng Lợi, ƀuôn prŏng Pleiku brei thâo:

“Kâo bŏ hŏng klei mơak, lehanăn pưng myưng êdi jing mnuih lŏ čhuang hlue kru jơ̆ng aê ama pô êlâo nao răng mgang lăn čar. Kâo mâo klei myun mâo mŭt hlăm êpul lĭng kahan Awa Hô, čiăng mđĭ hĭn knhuah gru krŭ kdơ̆ng mơ̆ng găp djuê, lehanăn djuê ana, kuič mngač klei đăo knang kơ kâo. Lehanăn ăt mgei ai tiê mơh, lehanăn ngĭ ngư̆ mơh dơ̆ng nao hdĭp hlăm sa anôk mrâo, lehanăn hŏng klei hdĭp mrâo, kâo srăng gĭr jih ai tiê hlăm klei mjuăt bi hriăm, lehanăn pral dưi juăt mưng hŏng klei anăn, čiăng bi năng hŏng klei phung khua kiă kriê hlăm ƀuôn prŏng mtă mtăn lehanăn klei amĭ ama kčĕ lač”.

Knăm tŭ mă jao kahan rơ̆ng êđăp ênang gang mkhư̆ Covid-19 ti Gia Lai

Ti čar Kontum, bruă ba jao kahan mrâo ăt mâo mkŏ mjing hlăm klei kdrăm k’ah, pral khuăt hlăm aguah hrue 16/2. Thŭn anei mâo 800 čô mnuih nao mŭt kahan, hlăm anăn jing 8 čô mnuih ngă bruă knŭk kna leh; sa čô đảng viên. Kahan mrâo Phạm Hoàng Quốc, ti ƀuôn hgŭm Quyết Thắng, ƀuôn prŏng Kontum, mâo mô̆ leh sa čô anak, asei ñu pô jing mnuih ngă bruă ti sa boh knơ̆ng bruă hdră bhiăn ti ƀuôn prŏng Hồ Chí Minh, nao mŭt kahan gưl anei lač:

“Hrue anei jing hrue nao mŭt kahan, kâo mơak snăk, lehanăn msĕ hŏng lu mnuih mkăn hŏng bruă klammơ̆ng sa čô mnuih kơ sa lăn čar, kâo mâo klei pưng myưng êdi kơ klei anăn. Anôk kâo nao ngă bruă čuăn anei jing ti Trung đoàn 990 lehanăn mta kñăm mơ̆ng kâo jing bi leh jăk bruă čuăn. Khădah jing dleh dlan, knap mñai dưn kâo ăt srăng gĭr hŏng jih ai tiê kâo”.

Hruê mơak nao mŭt kahan ti ƀuôn prŏng Kon Tum

Ngă bruă mdrơ̆ng hŏng klei ruă tưp Covid 19, jih jang phung hđeh êdam êra nao mŭt kahan mơ̆ng 5 boh čar ti Lăn Dap Kngư mâo tlŏ leh ênŭm vaccine gang mkhư̆ klei ruă tưp mơ̆ng 2 truh 3 aruăt leh; êlâo kơ hrue nao mŭt kahan bi nao mkă dlăng kman Sars CoV-2 rơ̆ng kơ jih jang dưi nao mŭt kahan hŏng klei êđăp ênang, amâo mâo djŏ kman Covid 19 ôh. Djăp alŭ wăl mâo anak aneh nao mŭt kahan ngă leh jăk bruă mtrŭt mjhar kñăm čiăng kơ hrue mŭt kahan thŭn anei jing hrue mơak hlăm klei nao mŭt kahan, mjing ai êwa mtluk mtlak mơak mñai, phung hlăk ai hur har nao mŭt kahan răng mgang lăn čar./.

Pô mblang: Y-Khem Niê