VOV4.Êđê- Bruă hluê ngă klei mtrŭt mjhar “Mnuih Việt Nam yua mnơ̆ng Việt Nam” hlăm hruê mmông êgao dưi ba wĭt boh tŭ dưn klă klơ̆ng, msĕ si mkŏ mjing klei bi mguôp mkra mjing, mnia mblei mnơ̆ng dhơ̆ng Việt Nam hŏng klei kjăp, mđĭ hnơ̆ng mnơ̆ng dhơ̆ng Việt Nam hlăm dŭm anôk mkăp brei… Hluê anăn, dưi đru kơ phung blei ba yua dưi mâo lu hĭn mnơ̆ng dhơ̆ng tŭ jăk.

 Hluê ngă Hdră mtrŭt mjhar “Mnuih Việt Nam mđing ba yua mnơ̆ng Việt Nam”, wưng êgao, lu anôk bruă duh mkra hlăm ala čar mâo leh lu hdră pŏk mlar bruă duh mkra pla mjing, blei yua hlăm ala čar, mđĭ ênoh blei mnơ̆ng hlăm ala čar, hưn mthâo mnơ̆ng dhơ̆ng, anăn knăl; pŏk mlar wăl anôk mnia mblei, boh nik ti krĭng taih kbưi. Mơ̆ng anăn bi êdah bruă klam mơ̆ng pô hlăm bruă mkăp mnơ̆ng dhơ̆ng yua phŭn msĕ si: Mnơ̆ng ƀơ̆ng huă, mnơ̆ng yua aguah tlam…

       Hluê si lu mnuih blei yua bi lač, ară anei mnơ̆ng Việt Nam ƀrư̆ hruê ƀrư̆ mâo lu mnuih ruah kyua ênoh čhĭ djŏ guôp. Mbĭt hŏng anăn, hnơ̆ng tŭ jăk, hruh đŭng dưi mkra siam, mâo lu mta… dŭm mta mnơ̆ng mâo lu mnuih ruah blei jing: Mnơ̆ng lŏ hma, čhum ao, mnơ̆ng yua aguah tlam. Chu Quang Hào, Khua knơ̆ng bruă Dăng kông Việt Nam brei thâo, mơ̆ng thŭn 2019, Knơ̆ng bruă duh bi liê lehanăn pŏk anôk mnia mblei điện tử Postmart.vn kñăm mtrŭt mđĭ bruă blei yua dŭm mta mnơ̆ng mkra mjing hlăm ala čar. Knŏng thŭn êlâo, ênoh bi mnia mblei truh 120 êklai prăk, dưi čhĭ êbeh 100 êbâo ton mnơ̆ng lŏ hma kơ mnuih ƀuôn sang ti lu čar, ƀuôn prŏng msĕ si: Bắc Giang, Lào Cai, Bến Tre…mbĭt hŏng lu alŭ wăl, ba wĭt boh tŭ dưn hlăm bruă ba čhĭ mnơ̆ng dhơ̆ng kơ ƀĭng ngă lŏ hma lehanăn anôk bruă duh mkra hlăm ala čar:

        Anăn jing dŭm gru kruăk tal êlâo, yuôm bhăn mơ̆ng wăl anôk mnia mblei điện tử Postmart mơ̆ng Anôk bruă Dăng kông Việt Nam dưi ngă hlăm 2 thŭn êgao hlăk klei ruă Covid 19 bluh mâo. Ară anei, hŏng bruă đua klam mâo Knŭk kna, Phŭn bruă Hâo hưn mtô mblang jao anăn jing mkŏ mkra lehanăn pŏk wăl anôk mnia mblei điện tử mơ̆ng Postmart jing wăl anôk mnia mblei mnơ̆ng Việt Nam, čiăng ba mnơ̆ng dhơ̆ng jăk mdê bi krĭng lehanăn dŭm mta mnơ̆ng Made in Việt Nam truh wăl anôk mnia mblei điện tử.

        Hluê K’iăng khua phŭn bruă Tuh tia mnia mblei Đỗ Thắng Hải, ară anei, mnơ̆ng Việt Nam ti anôk mnia mblei prŏng truh 80-90%, mnơ̆ng dhơ̆ng Việt Nam ti anôk mnia mblei Go mơ̆ng êpul group Central Retail truh 94-96%; ti sang mnia mơ̆ng êlâo 60-70%... Snăn, hdră mtrŭn mjhar klă sĭt ba wĭt leh klei tŭ dưn prŏng. K’iăng khua phŭn bruă Đỗ Thắng Hải ăt brei thâo, čiăng lŏ pŏk ngă hdră anei hlăm wưng ti anăp, Phŭn bruă Tuh tia mnia mblei mkŏ mkra lehanăn mâo Khua knŭk kna bi mklă Hdră mđĭ kyar wăl anôk mnia mblei hlăm ala čar mguôp hŏng Hdră mtrŭt mjhar mnuih Việt Nam mđing ba yua mnơ̆ng Việt Nam wưng thŭn 2021-2025. Hdră anei mâo boh tŭ yuôm rơ̆ng klei hdĭp kơ mnuih ƀuôn sang, krơ̆ng kjăp hdră mđĭ kyar bruă duh mkra - ala ƀuôn hlăk dôk mâo lu klei lông dlăng, rŭng răng hlăm hdră duh mkra tar rŏng lăn, klei ñŭ kma lehanăn hmăi mơ̆ng klei ruă tưp Covid 19…

        Hlăm hdră anei mđing truh kơ mta kñăm čiăng đru mđĭ kyar wăl anôk mnia mblei hlăm ala čar, hluê ngă jăk hdră mkăp mnơ̆ng dhơ̆ng. Mơ̆ng anăn, mkŏ mjing hdră mkăp mnơ̆ng dhơ̆ng kluôm, mjing klei bi hgŭm kjăp plah wah pô hgŭm hlăm wăl anôk mnia mblei mơ̆ng mnuih mkra mjing truh kơ mnuih blei yua, mơ̆ng gưl dlông truh kơ alŭ wăl, mơ̆ng anôk bruă duh mkra truh kơ anôk bruă kriê dlăng knŭk kna kñăm ba mnơ̆ng dhơ̆ng tŭ jăk mơ̆ng lu krĭng truh kơ kiê kngan mnuih blei yua ti alŭ wăl, boh nik mđing kơ dŭm mta mnơ̆ng lŏ hma jăk êdi ti dŭm alŭ wăl ba truh kơ krĭng ƀuôn prŏng.

       Čiăng lŏ dơ̆ng mtrŭt mđĭ hdră “Mnuih Việt Nam mđing ba yua mnơ̆ng Việt Nam”, čiăng kơ mnơ̆ng Việt Nam dưi mâo klei đăo knang mơ̆ng mnuih blei yua hlăm ala čar hĭn, dŭm anôk bruă duh mkra brei mtrŭt mđĭ bruă mkŏ mkra anăn knăl, duh bi liê, bi mlih kdrăp yua kreh knhâo, mrâo čiăng bi hrŏ ênoh čhĭ mnơ̆ng dhơ̆ng, mđĭ ai bi ktưn. Mtrŭt mđĭ bruă pŏk mlar hdră mnia mblei, bi hgŭm hlăm hdră duh mkra pla mjing…čiăng dŭm mta mnơ̆ng dhơ̆ng ƀrư̆ hruê ƀrư̆ tŭ jăk hĭn./.

                                                    Pô mblang: H’Nêč Êñuôl