Mă bruă hŏng êpul khua bruă Đảng čar Khánh Hoà, Khua hlăm phŭn bruă kđi čar, Khua hlăm bruă Đảng gưl dlông, khua kiă kriê dhar bruă ksiêm dlăng gưl dlông Trần Sỹ Thanh mñă ktang, bruă hluê ngă hdră mtrŭn klei kƀĭn prŏng bruă Đảng čar Khánh Hoà srăng nao mbĭt hŏng hdră mtrŭn klei kƀĭn prŏng kluôm ala tal 14 mơ̆ng Đảng, Khánh Hòa amâo djŏ knŏng mdei hlăm klei hluê ngă ƀiădah čiăng čŏng pô, mbruă, duah hdră ngă mrâo, gru hmô tŭ dưn čiăng kơ gưl dlông bi kƀĭn, pŏk mlar. Hlăm klei ksiêm dlăng, ktuê dlăng amâo djŏ ksiêm klei soh ƀiădah srăng hrăm mbĭt, hmao msir klei dleh dlan, msir dŭm hdră êmưt, klei kpăk, mkŏ mjing boh kdrŭt kơ klei đĭ kyar. Khua kiă kriê dhar bruă ksiêm dlăng gưl dlông Trần Sỹ Thanh mñă klă, mta kñăm đĭ kyar 2 ênoh mrô amâo djŏ knŏng klei pia ƀiădah srăng mâo hdră êlan klă klơ̆ng, klă pô, klă bruă, djŏ hdră kčah, mđĭ hĭn klei ksiêm dlăng nao mbĭt hŏng bi klă  boh tŭ dưn đru mguôp hlăm klei đĭ kyar. Mbĭt anăn, mtrŭt mđĭ klei mlih mrâo hră mơar knŭk kna, bi lar ai tiê hdră mtrŭn truh kơ grăp čô knuă druh, đảng viên leh anăn kluôm yang ƀuôn, mkŏ mjing klei mlih sĭt hlăm klei ngă bruă. Trần Sỹ Thanh  lač:

 “Hlăm klei hưn mdah ksiêm dlăng srăng bi klă leh anăn tĭng mkă klei đru mguôp hlăm klei đĭ kyar mơ̆ng čar Khánh Hòa mâo dŭm %, hmăng hmưi anăn jing jăk hĭn. Amâo djŏ ôh knŏng ktrâo, ktrâo ăt čiăng ngă jăk hĭn. Mơ̆ng anăn hrăm mbĭt duah êlan nao leh anăn hdră msir dŭm boh klei mâo, hưn mdah dŭm hdră êlan klă klơ̆ng čiăng mâo mta kñăm đĭ kyar 10%. Msir boh klei ya ngă?  Ya čar ngă? Gưl dlông ya ngă? Hlei ksiêm dlăng klei ngă bruă leh anăn hlăm wưng dŭm hruê? Amâo dưi lač khă bi mâo ôh, srăng mâo hruê mmông, jao bruă klă”.

 Nghiêm Xuân Thành, Khua bruă Đảng čar Khánh Hoà brei thâo, alŭ wăl hyuă kjăp, hluê ngă hdră mtrŭn klei kƀĭn prŏng tal 14 leh anăn dŭm hdră ngă bruă, rơ̆ng kơ klei sa anăn, hrăm mbĭt mơ̆ng čar truh kơ nah gŭ. Alŭ wăl gĭr ngă mta kñăm đĭ kyar 2 ênoh mrô, ngă klei hmăng hmưi mkŏ mjiing čar jing ƀuôn prŏng gưl dlông hluê si hdră mtrŭn mrô 09-NQ/TW mơ̆ng phŭn bruă kđi čar.

Mă bruă hŏng Êpul khua bruă Đảng čar Gia Lai, Khua hlăm phŭn bruă kđi čar, khua Phŭn bruă hŏng tač êngao Lê Hoài Trung mñă ktang, bruă kiêm dlăng čiăng rơ̆ng kơ dŭm hdră mtrŭn, asăp mtrŭn mơ̆ng gưl dlông dưi hluê ngă jăk, hrăm mbĭt, tŭ dưn, djŏ hdră tă. Hlăm wưng dŭm gưl bruă Đảng dôk kñăm hluê ngă hdră mtrŭn klei kƀĭn prŏng 14 leh anăn mprăp kw klei mplĕ hră, bruă klam anei mâo knhuah klei mrâo, čiăng êdi. Čar Gia Lai čiăng kñăm kơ bruă hluê ngă mta kñăm đĭ kyar 2 ênoh mrô, hluê ngă hdră êlan mkŏ mjing bruă knŭk kna dua gưl, mbĭt hŏng dŭm hdră mrrŭn đĭ kyar hlăm dŭm bruă kñăm hluê si klei gĭt gai mơ̆ng gưl dlông leh anăn gưl bruă Đảng alŭ wăl. Khua êpul ksiêm dlăng mñă kơ čar Gia Lai mbha bruă kơ dŭm anôk bruă phŭn, bi mguôp kjăp hŏng dŭm êpul bruă, ngă klei hưn mdah djŏ, klă mngač, bi êdah klă klei dleh dlan, kpăk gun leh anăn akâo hdră êlan klă klơ̆ng.

Mă bruă hŏng êpul khua bruă Đảng čar Dak Lak, Nguyễn Thanh Nghị, khua hlăm phŭn bruă kđi čar, khua hlăm ƀruă Đảng gưl dlông, Khua êpul hdră êlan gưl dlông, khua êpul brei thâo, ksiêm dlăng, ktuê dlăng jing bruă jêñ jêñ čiăng bi klă djŏ, klă boh sĭt, thâo kral klei jăk, hdră ngă jăk, mbruă čiăng lŏ dơ̆ng bi lar, ktrâo klă klei êdu kƀah, klei dôk mâo čiăng hmao mâo hdră êlan msir, mbĭt anăn bi êdah klei dleh dlan, kpăk gun hlăm bruă mkŏ mjing hluê ngă dŭm hdră êlan mơ̆ng Đảng.

“Kâo mñă brei drei mjêč gĭt gai čiăng mkŏ mjing dŭm klei hưn mdah ksiêm dlăng hluê si hră mơar leh anăn mbĭt anăn jing ba mdah dŭm hră mơar leh anăn gĭt gai dŭm êpul bruă grăp čô djŏ tuôm čiăng bi mguôp kjăp hŏng êpul. Hŏng klei hưn mdah ksiêm dlăng srăng rơ̆ng klei kluôm dhuôm, klă klơ̆ng, mâo hră mơar bi hmô, amâo mâo khă bi mâo, mbĭt anăn bi klă dŭm klei jăk, klei awăt, phŭn agha ăt msĕ mơh bi êdah dŭm hdră êlan. Ya mâo klei kpăk gun srăng hưn mdah mtam kơ êpul čiăng kơ êpul bi kƀĭn leh anăn hưn mdah kơ Phŭn bruă kđi čar ksiêm dlăng.”

Êpul ksiêm dlăng đa đa mta phŭn msĕ si: bruă mkŏ mjing leh anăn klei ngă bruă mơ̆ng dŭm anôk bruă, knơ̆ng bruă ti alŭ wăl leh ngă bruă knŭk kna alŭ wăl 2 gưl, bruă bruă klam, hdră êlan rơ̆ng ngă djŏ mta kñăm đĭ kyar mnơ̆ng dhơ̆ng kah knar hlăm wưng 2026 – 2030 mơ̆ng 10% kơ dlông hluê si hdră mtrŭn klei kƀĭn prŏng tal 14 mơ̆ng Đảng, bruă gĭt gai, ktrâo lač, hluê ngă Hdră mtrŭn mrô 57 mơ̆ng Phŭn bruă kđi čar kơ mđĭ kyar klei kreh knhâo mrâo mrang, mlih mrâo mbruă, bi mlih mrô ala čar.

Hlăm klei ksiêm dlăng, dŭm êpul ngă bruă mơ̆ng phŭn bruă kđi čar, Êpul khua bruă Đảng čiăng bi klă bruă hluê ngă dŭm hdră mtrŭn, asăp mtrŭn mơ̆ng gưl dlông ti čar leh anăn Lăn Dap Kngư, Dhŭng kwar krah, hmao ƀuh dŭm hdră ngă bruă tŭ dưn čiăng pŏk mlar, mbĭt anăn ruh mgaih klei dleh dlan, kpăk gun, rơ̆ng kơ dŭm hdră êlan prŏng mơ̆ng Đảng dưi hluê ngă hrăm mbĭt, ktang phĭt, đru mđĭ kyar bruă duh mkra ala ƀuôn leh anăn bi leh dŭm mta kñăm đĭ kyar hluê si hdră mtrŭn Klei kƀĭn prŏng tal 14 mơ̆ng Đảng.