VOV4.Êđê- Tlam mbruê 23/9, ti Hà Nội, Phŭn bruă klei mrâo leh anăn haqao hưn bi mguôp hŏng Sang mđung asăp blŭ Việt Nam, Sang mđung rup Việt Nam mkŏ mjing klei kƀĭn trông “Mtrŭt mđĭ tur knơ̆ng mđung asăp blŭ mrô, tur knơ̆ng mđung rup mrô ala čar”. Kluôm ala ară anei mâo 72 anôk bruă mđung asăp blŭ hlăm dŭm sang mđung rup. Hluê si phung bi ala, mđung asăp blŭ leh anăn mđung rup jing klei bi mguôp mơ̆ng mta phŭn leh anăn klei ngă bruă. Hlăm wưng klei mrâo mrang mrô, mlih mrô msĕ ară anei jing klei kdlưn hĭn kơ klei mrâo mrang, mâo klei hmăi kơ djăp mta bruă duh mkra – ala ƀuôn, hlăm anăn mâo bruă klei mrâo, mđung asăp blŭ, mđung rup.

Klei mrâo mrang mrô srăng bi mlih dŭm sang mđung asăp blŭ, mđung rup leh anăn đru kơ dŭm anôk bruă anăn ngă bruă klam pô jăk hĭn tơdah hmao mlih ktang leh anăn dưi kpăt mă klei găl. Tur knơ̆ng mđung asăp mrô đru kơ drei dưi hmư̆, wĭt hmư̆ dŭm klei mđung asăp blŭ ti Việt Nam hlăm grăp mmông, grăp anôk, wăt hŏng ƀĭng dôk hmư̆, mnuih Việt Nam ti ala tač êngao. Sang mđung asăp blŭ Việt Nam dôk mkŏ mjing hdră mkăp tur knơ̆ng mrô mđung asăp blŭ ala čar leh anăn mĭn tĭng akŏ wưng tlâo mlan tal 3 thŭn 2023 srăng klă klơ̆ng ngă bruă.

Pô mblang: Y-Ƀel Êban