V0V4.Êđê- Siă suôr hŏng bruă mtô bi hriăm ti sa boh sang hră ti kdriêk krĭng taih kbưi Krông Bông, čar Dak Lak, nai Nguyễn Viết Lân lui leh lu hruê mmông tui ksiêm kơ klei hdĭp lehanăn hdră mă bruă mơ̆ng Khua gĭt gai Hồ Chí Minh. Hŏng ñu, tui ksiêm kơ Awa amâo djŏ čiăng mđĭ klei thâo săng kơ pô ƀiădah lŏ đru ñu mjuăt bi hriăm, gĭr ktưn hluê ngă msĕ Awa hlăm dŭm bruă ngă grăp hruê.

Leh dŭm mmông nao mtô ti adŭ hriăm, nai Nguyễn Viết Lân, jing nai mtô tin học ti sang hră gưl 3 Krông Bông, kdriêk Krông Bông, čar Dak Lak lŏ pioh leh lu mmông ti adŭ dlăng hră hlăm sang hră amâodah mŭt hlăm mbah internet čiăng ksiêm hriăm kơ Awa Hồ. Ayŏng Lân yăl dliê, khădah ayŏng mtô tin học, ƀiădah mâo klei khăp čiăng ksiêm hriăm kơ hƀuê ênuk. Mơ̆ng hlăk ñu dôk điêt, dŭm klei yăl dliê kơ Awa Hồ mâo amĭ ama, nai mtô yăl dliê kơ ñu bi mâo leh hlăm ñu klei kčŭt ai tiê. Kyua dŭm klei yăl dliê mtô mjuăt mơ̆ng Awa Hồ kuč leh hlăm ayŏng klei khăp kơ bruă mtô mjuăt ti krĭng lăn ƀuôn phŭn bruă krŭ kdơ̆ng Krông Bông jing ƀuôn sang tal 2 ayŏng bi mguôp ngă bruă hlăm giăm 10 thŭn êgao.

Kâo kreh ksiêm hriăm dŭm hƀuê ênuk kơ Awa Hồ, dŭm mta hƀuê ênuk djŏ tuôm hŏng Awa Hồ kâo mâo klei khăp čiăng sơăi. Mâo dŭm mta phŭn čiăng ba hlăm klei mtô pô jing lu jơr leh anăn ngă kơ hđeh sang hră mâo klei mđing hĭn. Bi kơ bruă hđeh êdam êra, hlăm mmông ngă bruă, si srăng ngă dưi ba dŭm mta phŭn anăn jing klă klơ̆ng, ngă kơ phung hđeh sang hră mđing hĭn, mơ̆ng anăn dưi iêo mthưr phung hđeh sang hră, mơ̆ng phung hđeh sang hră êmĭng nao hlăm dŭm klei bi lông êpul, mơ̆ng anăn phung hđeh sang hră mâo klei bi mguôp hĭn.

Nai Nguyễn Viết Lân mă klei pah mni êdam êra êdah kdlưn hlue ngă asăp Awa thŭn 2022

Ruê̆ klei hriăm gưl prŏng mơ̆ng Sang hruă gưl prŏng mtô mjuăt bi hriăm Huế, thŭn 2014, nai Lân wĭt mtô ti sang hră Krông Bông. Khăp kơ phung hđeh sang hră krĭng dleh dlan dôk mâo lu klei kƀah, klei dleh dlan, ayŏng ba jih klei khăp, klei thâo pô čiăng mtô kơ phung hđeh sang hră. Ayŏng čŏng mŭt hlăm internet leh anăn tui duah dŭm klei hriăm jăk. Grăp mmông hriăm, ayŏng gĭr blŭ hrăm hŏng phung hđeh sang hră, mkŏ mjing kơ diñu ai tiê êđăp ênang, mđĭ klei thâo čŏng hriăm, mbruă leh anăn đru kơ diñu thâo ƀuh klei yâo mơak, klei khăp kơ grăp klei hriăm. Adei Hoàng Thị Kim Ngân, hđeh sang hră adŭ 11A7, sang hră gưl tlâo krông Bông yăl dliê

Kâo ƀuh nai Lân jing sa čô jih ai tiê hlăm bruă mtô bi hriăm, hur har, čŏng pô blŭ hrăm hŏng phung hđeh sang hră čiăng mtô mjuăt kơ hmei. Ñu mâo klei gĭr mtô êmưt čiăng kơ hmei thâo săng jih. Ñu mđĭng hmư̆ nanao dŭm klei blŭ mơ̆ng phung hđeh sang hră. Leh wưng kâo dưi hriăm dŭm klei hriăm mơ̆ng nai lân leh anăn hmư̆ ñu mtô kâo lŏ mâo dŭm klei hriăm mrâo kơ pô leh anăn gĭr ktưn bi kluôm ênŭm asei pô.

 Nai Lân hŏng phung êdam êra nao čhưn leh anăn mđup brei mnơ̆ng kơ Amĭ Việt Nam jhŏng ktang

Amâo mâo djŏ knŏng jing sa čô nai hur har, nai êkei mda asei Nguyễn Viết Lân lŏ jing sa čô knuă druh bruă hđeh êdam êra. Ară anei ñu dôk păn ngă khua kiă kriê êpul bruă đoàn phung nai, khua hlăm êpul bruă đoàn sang hră leh anăn jing khua kiă kriê êpul hgŭm phung hđeh êdam êra sang hră gưl tlâo Krông Bông.

Dương Kim Thạch, Khua kiă kriê sang hră gưl tlâo Krông Bông brei thâo, khădah dôk thŭn mda, klei hdĭp dôk dleh dlan leh anăn ară anei dôk hlăm sang êpul, anak điêt, mô̆ mă bruă kbưi, ƀiădah nai Lân dăp nanao bruă pô čiăng bi leh jăk dŭm bruă klam mbĭt. Ñu mâo lu klei kčĕ mrâo hlăm klei mtô bi hriăm, đru kơ phung nai mkăn kơ klei hâo hưn mrâo mrang, boh nik hlăm wưng sang hră mkŏ mjing klei mtô bi hriăm êlan online čiăng gang mkhư̆ klei ruă tưp Covid-19. Dương Kim Thạch lŏ brei thâo:

Nai Lân jing sa čô nai mda asei hur har thâo mbruă leh anăn jih ai tiê hlăm djăp mta bruă, hdră kơ hđeh êđam êra, jing sa čô mâo bruă klam. Ñu nao mtrŭt mjhar phung mâo ai tiê kmah, phung hđeh sang hră dŭm adŭ hriăm, phung ƀĭng găp, mah djiăng čiăng bi mkrum mnơ̆ng yua, prăk kăk mkŏ mjing dŭm gưl nao hlăm ƀuôn sang đru brei ao mđao kơ phung hđeh ti yan êăt. Bi ala kơ êpul bruă hđeh êđam êra ti sang hră nao čuă, mđup brei hnư mnơ̆ng kơ phung amĭ Việt Nam jhŏng ktang. Boh nik msĕ hŏng thŭn mrâo anei, ñu ăt mkăp hruê mmông kơ hdră nao bi lông ksiêm hriăm kơ klei mĭn, knhuah hdĭp Hồ Chí Minh leh anăn mâo klei pah mni mrô 2 hlăm kluôm ala.

 Nai Nguyễn Viết Lân mkŏ mjing klei đru mguôp kơ hdră đru kơ hđeh knap mñai ti sang hră

Khăp čiăng bruă ksiêm hriăm kơ klei hdĭp leh anăn bruă ngă mơ̆ng khua gĭt gai Hồ Chí Minh, nai êkei mda asei Nguyễn Viết Lân čŏng mâo mkuôm pioh leh kơ pô dŭm hră mơar yuôm bhăn kơ Awa Hồ. Mơ̆ng anăn đru kơ ñu mâo lu boh tŭ yuôm bhăn msĕ si klei pah mni mrô 1 hlăm klei bi lông ksiêm hriăm 110 thŭn hruê Awa Hồ duah êlan mtlaih ala čar mơ̆ng bruă đoàn čar Dak Lak mkŏ mjing hlăk thŭn 2021, 2 thŭn dơ̆ng mâo klei pah mni hlăm klei bi lông “Hlăk thŭn mda tui hriăm leh anăn hluê ngă, klei mĭn, knhuah mngač Hồ Chí Minh” mơ̆ng phŭn bruă mtô mjuăt bi hriăm hlăk thŭn 2020 – 2021. Ayŏng jing sa hlăm 45 čô hđeh êdam êra mâo klei pah mni kơ gru mngač hđeh êdam êra mrâo mrang hluê ngă asăp Awa Hồ čar Dak Lak thŭn 2022. Ayŏng Lân brei thâo, hlăm bruă nao hlăm dŭm klei bi lông, đru kơ ñu mâo mmông găl ksiêm hriăm kơ Awa Hồ, mơ̆ng anăn mđĭ hĭn bruă klam pô, gĭr ktưn hriăm mơ̆ng Awa Hồ dŭm mta bruă điêt hlăm klei hdĭp.

Pô mblang: Y-Ƀel Êban