Klei bi lông jih gưl 3 thŭn 2023 ƀuh jing ăt hơĭt msĕ si thŭn 2022 mơh, siămdah hlăm klei bhiăn bi lông lŏ mâo mơh đa đa klei bi mlih, snăn čiăng kơ phung lŏ ksiêm hĕ bi nik. Nai mtô Lê Thị Minh Huế, pô kiă adŭ 12A5, sang hră gưl 3 Mạc Đĩnh Chi, kdriêk Chư Păh, brei thâo:

        “Čiăng đru phung hđeh thâo săng hĭn kơ dŭm mta jing mrâo hlăm klei bhiăn bi lông jih gưl 3 thŭn anei, snăn phung nai kiă adŭ mâo ngă leh hŏng lu hdră, boh nik hlăm klei bi mguôp adŭ 15 mnĭt êlâo kơ hdriăm, amâodah mmông bi mguôp adŭ jih hrue kăm mơ̆ng Zalo lŏ dơ̆ng hưn lehanăn mñă kơ phung hđeh thâo kơ ya mta jing mrâo hlăm klei bi lông čiăng kơ jih jang phung hđeh păn kjăp jih jang klei bhiăn”.

       Adei Nguyễn Thị Anh Thơ – adŭ 12A7, sang hră gưl 3 Mạc Đĩnh Chi, kdriêk Chư Păh lač.

“Tui si kâo ksiêm lehanăn thâo săng, jih jang klei pioh ba yua hlăm adŭ bi lông anăn jing knŏng giê čih, giê karyŏng, giê treh, masin pioh tĭng điêt amâo mâo klei thâo pioh čih hră ôh, điêt đuôt amâo mâo dưi ba ôh hlăm adŭ bi lông mnơ̆ng mă asăp, ma rup, boh nik jing đĭng blŭ djă hiu”.

         Mbĭt hŏng bruă bi lar kơ phung hđeh păn kjăp jih jang klei bhiăn, jih jang dŭm boh sang hră ti Gia Lai ăt mđing lŏ dơ̆ng bi hdơr kơ phung hđeh klei hriăm pioh bi lông. Dŭm êpul truăn mtô kơ dŭm mta klei hriăm bi mkŏ mjing hdră bi hdơr, mbha ksiêk hđeh čiăng mâo hdră bi hdơr jăk hĭn. Nai mtô Đỗ Văn Hiếu, jing nai mtô sang hră gưl 3 Đinh Tiên Hoàng, kdriêk Krông Pa brei thâo:

        “Kơ klei hriăm văn, hmei bi mbha êpul phung hđeh tui si êpul thâo, lehanăn awăt, thâodah dôk hlăm klei dleh dlan snăn mâo hdră êlan đru hĭn, mâo mmông lŏ bi hriăm lu hĭn čiăng lŏ bi hnô ti anôk kplŭt hĕ klei thâo săng, čiăng kơ phung hđeh kjăp ai tiê nao hlăm klei bi lông tinăp”.

        Nai mtô Trịnh Văn Bình, K’iăng khua sang hră gưl 3 Đinh Tiên Hoàng, hưn mthâo hŏng sang hră lŏ mkŏ mjing klei bi hdơr klei hriăm kơ phung hđeh, pŏk bi êdah dŭm akŏ klei bi lông kreh găn, čiăng kơ phung hđeh hơĭt ai tiê nao hlăm klei bi lông:

Knhal jih mlan 5 sang hră srăng lông mkŏ mjing klei bi lông jih gưl ti sang hră, sang hră lŏ bi kjăp, bi mklă leh jang klei bhiăn bi lông kơ phung hđeh, čiăng truh ti mmông phung hđeh mŭt hlăm klei lông ngă klei bi lông jih gưl. Ktư̆n hlăm thŭn anei srăng mâo truh 98,5%. Jih jang bruă bi ktưn srăng mâo sang hră dăp djŏ hŏng klei phung hđeh čiăng”.

   Klei bi lông jih gưl 3 ala čar thŭn anei, kluôm čar Gia Lai mâo êbeh 15.200 čô phung hđeh ngă hră mơar bi lông, hlăm anăn mâo giăm 14.300 čô phung hđeh mơ̆ng sang hră phổ thông, 483 čô phung hđeh mơ̆ng sang hră mjuăt bi hriăm nanao, dŭm adôk jing phung hđeh ngă hră mơar êngiê. Hlăm ênoh jih jang hđeh ngă hră mơar bi lông êbeh 14.000 čô phung hđeh hlŏng ngă hră mơar hrŏng ruah mŭt hriăm gưl prŏng, gưl krah. Čar Gia Lai mkŏ mjing leh anôk bi lông truh 41 bĭt anôk.

Wưng leh êgao, phŭn bruă sang hră mơar mâo leh hră mtrŭn lktrâo atăt kơ dŭm knơ̆ng bruă sang hră mơar, phŭn bruă lĭng kahan kơ hdră mkŏ mjing klei bi lông jih gưl 3 thŭn 2023, hlăm anăn dăp ƀhĭ ênŭm hrue mmông bi lông.

        Snăn, klei bi lông jih gưl 3 thŭn 2023 mâo mkŏ mjing hlăm dŭm hrue 27, 28, 29 lehanăn 30/6/2023, hlăm anăn phung hđeh mprăp kơ jih jang bruă nao hlăm klei bi lông jing hlăm tlam hrue 27/6, ngă klei bi lông hlăm dua hrue jing hrue 28; 29/6 lehanăn hrue 30/6 jing hrue mkăp huĭ dah lŏ mâo klei amâo mâo kjăk hlăm klei bi lông. Klei bi lông tui si mmông kơ grăp mta klei bi lông mâo dăp klă ênŭm snei:   28/6, aguah ngă klei bi lông Ngữ văn, tlam ngă klei bi lông Toán; hrue 29/6, aguah srăng bi lông 2 klei hriăm Khoa học tự nhiên lehanăn Khoa học xã hội; tlam bi lông klei hriăm Ngoại ngữ.

        Kơ hdră prăp êmiêt, mkŏ mjing klei bi lông jih gưl 3 thŭn 2023, Phŭn bruă sang hră mơar mtă leh kơ dŭm knơ̆ng bruă sang hră mơar kiă kriê bruă lŏ ksiêm wĭt jih jang bruă hŏng phung hđeh adŭ 12 tui si ênoh leh mbha lehanăn dăp kñăm păn kjăp jih jang djăp mta klei mơ̆ng phung hđeh nao bi lông, lehanăn kăp hưn boh tŭ dưn mơ̆ng klei bi lông kơ phung hđeh.

        Tui si phŭn bruă sang hră mơar, truh 8h hrue 18/7, dŭm knơ̆ng bruă sang hră mơar, dŭm anôk ngă hră mơar klei bi lông srăng hưn mdah boh tŭ dưn klei bi lông jih gưl 3 thŭn 2023 lehanăn jih jang sang hră phổ thông brei bi leh yơh brei puăng, mkă tĭng čih yap jih gưl 3 hlăm hrue 20/7. Êmưt êdi jing ti hrue 24/7, phung hđeh dưi tŭ mă tŭ yap jing jai, hră čih yap boh tŭ dưn klei hriăm, lehanăn djăp mta hră mơar tŭ yap djŏ tuôm./.