Mmông hriăm klei Ăngle adŭ 11A4 mơ̆ng nai Phan Mạnh Tiến bŏ hŏng hur har, klei bi trông, mđăo mơak snăk… Adei Trần Tú Tài, adŭ 11A4 brei thâo, mơ̆ng leh hriăm sang hră gưl 3 Thực hành Cao Nguyên, ñu dưi hriăm mmông hriăm klei Ăngle jăk msĕ snei, đru mâo klei thâo hŏng klei ênưih leh anăn jĕ giăm.

“Kdrêč hriăm nah mbha klă klơ̆ng tui si akŏ leh anăn hlue si klei thơ̆ng čiăng kơ hmei mâo klei thâo hlăm kdrêč. Leh anăn nai mâo klei hriăm dleh hĭn, đru kơ kâo mâo klei thâo mđĭ klei hriăm pô leh anăn mâo nanao nai đru, ksiêm dlăng leh anăn mkra klei hriăm kơ kâo hlăm grăp hruê”.

Hlăk êjai hđeh sang hră gưl tlâo hơ̆k mơak hŏng klei mkŏ mjing mmông hriăm klei Ăngle mơ̆ng nai mtô mda asei Phan Mạnh Tiến kyua đru bi hrŏ klei ktrŏ hlăm bruă hriăm, mđĭ klei thâo hdơr, snăn phung hđeh sang hră hriăm gưl prô̆ng Lăn Dap Kngư hruê hriăm mtô tinei, ƀuh leh sa klei mrâo hlăm bruă knuă pô. Phạm Thị Thu Hà, sa čô hriăm gưl prŏng kơ klei blŭ ala tač êngao, Sang hră gưl prŏng Lăn Dap Kngư brei thâo:

“Kâo hriăm thiăm klei thâo mơ̆ng nai čiăng êdei anei dưi yua hlăm klei mtô bi hriăm”

 Hŏng phung hđeh sang hră gưl 3 Thực hành Cao Nguyên, nai Tiến amâo djŏ knŏng nai mtô klei thâo ôh ƀiădah lŏ jing pô mđing hmư̆, đru mđĭ ai. Lu phung hđeh sang hră duah ñu msĕ si sa čô ayŏng khua čiăng yăl dliê, tă hdră êlan hlăm wưng ai tiê klei mĭn mâo klei bi mlih. Adei Lê Sỹ Trọng, adŭ 11A5 lŏ hdơr kơ klei tuôm  hriăm leh hlăm klei bi lông mphŭn čô̆ kơ bruă:

“Nai Tiến jing sa čô hrăm mbĭt hŏng hmei, đru kơ hmei jih ai tiê hlăm hdră bruă rông mnŭ hŏng ana êa drao, Nai jih ai tiê hlăm djăp bruă, nai mtô hmei ksiêm hriăm, mjing klei mđĭ ai kơ grăp čô mnuih. Leh sa wưng hlue ngă si klei nai mtô leh anăn tŭ jing leh, gưl tal êlâo pô dưi ngă klei anăn snăn mơak snăk, dưi ngă leh klei pô kñăm kâo mơak êdi”.

Mbĭt hŏng klei mtô bi hriăm, nai Phan Mạnh Tiến lŏ ngă Khua dlăng bruă êdam êra jih ai tiê, pral kdal. Êbeh 10 thŭn mă bruă ti sang hră, ñu pŏk ngă leh lu bruă jăk hlăm sang hră leh anăn êngao sang hră. Msĕ si ênuk Covid-19 ngă kơ bruă hriăm online jing dleh dlan, ñu kčĕ mkŏ mjing klei bi lông  hră klei mrâo online hŏng klei Ăngle “Knăm mơak hla krei kñĭ”, iêô jak phung nai hlăm sang hră leh anăn ala tač êngao hgŭm. Lu hdră čŏng ngă bruă kyua ñu pŏk ngă msĕ si “Tết klei khăp”, “Đru ai yan bi lông”, “Kuč  pui dian hdơr knga”, “Hdră wĭt kơ anôk hrah”, bruă đru kơ knông lăn… mđup brei leh dŭm hnư prăk đru hriăm hră, đru kơ phung  hđeh sang hră mâo klei dleh dlan leh anăn hưn mthâo lu phung êdam êra êdah êdi kơ Đảng. Nguyễn Tiến Chương,  K’iăng Khua sang hră gưl 3 Thực hành Cao Nguyên lač:

 “Nai Tiến jing sa čô nai mda asei pral kdal kơ jih 2 mta  bruă mkŏ mjing leh anăn bruă thơ̆ng, ba hdră êpul êdam êra leh anăn hdră phung êdam êra, hđeh sang hră,  phung hriăm gưl prŏng jăk snăk. Ñu ăt mđĭ klei ba yua AI hlăm klei mtô; mđĭ lar êpul hriăm klei Ăngle, mkŏ mjing klei bi lông êyuh tiêng liêng mah hlăm sang hră, ba hdră mtô klei Ăngle mrâo, hriăm mbĭt hŏng bruă ngă, đru  kơ phung hđeh klei thâo hriăm klei Ăngle.”

Dŭm klei gĭr nanao mơ̆ng nai mtô mda asei Phan Mạnh Tiến mâo čih yap năng djŏ. Thŭn 2023, ñu mâo klei pah mni mrô Dua nai mtô mbruă gưl čar. Thŭn 2024 ñu mâo Bruă êdam êra gưl dlông bi mni jing nai mtô êdah êdi kluôm ala leh anăn jing sa hlăm phung ba klei khăp hriăm hlăm Klei bi kƀĭn “Phung êdam êra êdah êdi hlue ngă klei Awa mtă” gưl tal VIII thŭn 2025. Klei mĭn bruă “mđĭ boh blŭ klei Ăngle hŏng AI” mâo klei pah mni A gưl sang hră leh anăn klei pah mni C gưl Knơ̆ng bruă, dưi lač jing gru hmô mtô bi hriăm djŏ guôp hŏng klei găl mlih mrô hlăm klei mtô bi hriăm. Kah mbha kơ klei tă hdră kơ añăp, nai Phan Mạnh Tiến brei thâo: 

“Pô mlih klei ngă mrâo, si ngă čiăng kơ bruă ngă  đru kơ phung hđeh ngă hŏng jih ai tiê leh anăn mâo klei tŭ dưn. Tui hriăm gru hmô čiăng mâo bruă ngă phung hđeh mđing dlăng, khăp snăn ăt pŏl ngă lar ƀar. Gĭr mkŏ mjing êpul hlăm kluôm sang hră, mđĭ kyar thiăm êpul klei Ăngle, êpul mtô klei thâo hdĭp leh anăn êpul hđeh sang hră 3 jăk”.

Hŏng bruă ngă điêt ƀiădah kjăp, nai mtô mda asei Phan Mạnh Tiến dôk đru mguôp bi hriăm sa ênuk hđeh sang hră thâo khăp, mâo bruă klam leh anăn čang hmăng mđĭ kyar pô. Mơ̆ng mmông hriăm jăk leh anăn êdah êdi, ñu ba leh klei khăp hriăm kơ phung hđeh kriăng leh anăn hriăm klei blŭ tač êngao jăk hĭn./.