Mâo 76 thŭn leh, ƀŭk jih kô̆, ƀiădah Ksor Chuel ti ƀuôn Rưng Ama Nhiu, ƀuôn Ia Rbol ăt dôk suaih pral. Grăp hrue, ñu ăt dôk khăp kơ klei dlăng hră, ksiêm hriăm kơ hdră êlan mơ̆ng Đảng lehanăn knŭk kna čiăng hâo hưn mtô mblang kơ mnuih ƀuôn sang, ñu lŏ mtô bi hriăm kơ phung hđeh hriăm klei Angle, bi hriăm kơ dhar kreh ala ƀuôn... Ksor Chuel lač:   

  “Kâo jih ai tiê mtrŭt mjhar mnuih ƀuôn sang hlăm ƀuôn mđĭ ai phung hđeh nao sang hră mơar, čiăng thâo hră lehanăn hriăm bruă knuă, duah bruă knuă mă mâo ƀơ̆ng prăl mlan. Hơĭt kơ klei hdĭp, lehanăn đru kơ ƀuôn sang pô mơh.”

 Jing sa čô hlăm lu phung hđeh êdam mnuih Jarai tal êlâo mâo hriăm bruă ngă nai mtô leh hrue lăn čar mâo klei êngiê, dăl hlăm 30 thŭn mă bruă knuă, Ksor Chuel mtô bi hriăm leh kơ dŭm êbâo čô hđeh hlăm dŭm boh ƀuôn. Lu mnuih hlăm anăn, đa đa mnuih  jing leh aê mdrao, kỹ sư, knuă druh mnuih mă bruă. Jih jang ăt hdơr nanao kơ nai pô bŏ hŏng klei khăp, klei thâo mpŭ lehanăn klei hdơr knga. Amai Nay H’bloanh (djuê ana Jarai) mă bruă hlăm adŭ bruă dhar kreh yang ƀuôn ƀuôn hgŭm Ia Rbol, hđeh hriăm hră êlâo dih mơ̆ng nai Ksor Chuel, lač.

 “Nai Ksor Chuel jing pô mtô bi hriăm leh kâo, lehanăn lu phung gưl hmei hlăk anăn hriăm gưl 2. Mơ̆ng klei nai mtô, lehanăn klei thao gĭr mơ̆ng asei mlei pô, kâo tui tiŏ klei hriăm mjuăt, lehanăn ară anei mâo mă bruă kơ yang ƀuôn ti ƀuôn hgŭm Ia Rbol. Kâo mpŭ snăk kơ nai. Kyua mâo nai jing pô mđĭ ai mjing boh kdrŭt kơ kâo gĭr ktĭr hriăm mjuăt mâo klei thâo săng lŏ wĭt mă bruă kơ yang ƀuôn.”

Leh mdei bruă ngă nai mtô, Ksor Chuel lŏ mâo phung mduôn khua lehanăn hđeh êlăkti dŭm boh ƀuôn hlăm ƀuôn hgŭm Ia Rbol dưi thâo kơ ñu jing khua hlăm êpul mtrŭt mjhar hđeh hriăm hră. Amuôn Nay Lê Quốc Duy (14 thŭn, djuê ana Jarai), mbĭt hŏng ƀuôn Rưng Ama Nhiu brei thâo, amĭ ñu mă klei bi hmô mơ̆ng awa Chuel jing klei čiăng bi hriăm ayŏng amai adei hlăm sang. Hmei ăt kreh jêñ jêñ nao čuă sang nai lehanăn mâo klei nai lŏ mđĭ ai.

 “Hlăm dŭm bruă dhar kreh hlăm ƀuôn sang, Ksor Chuel kreh lŏ mjuăt bi hriăm kơ hđeh gưl mrâo brei thâo hdĭp hŏng klei hmăng hmưi, thâo čiăng, brei thâo mjing klei pô mĭn jing klei sĭt, kyuanăn amâo mâo mdei hlăm klei mjuăt bi hriăm. Bi ấei mlei kâo pô hmăng hmưi čiăng dưi jing sa čô nai mtô klei tĭng, snăn kâo tui hriăm čiăng bi lông hriăm sang hră truăn ti čar, lehanăn mgi dih mŭt hriăm sang hră gưl prŏng bruă nai  mtô. Tơdah leh jing nai mtô kâo čiăng lŏ mtô kơ hđeh gưl êdei.”

Ƀuôn hgŭm Ia Rbol mâo 2.236 gŏ sang hŏng 10.220 čô mnuih, hlăm anăn mâo giăm 93% jing djuê ana Jarai sơăi. Dŭm thŭn leh êgao, mnuih ƀuôn sang mâo klei thâo bi mguôp, jih ai tiê mđĭ kyar klei hdĭp mda, ƀrư̆ ƀrư̆ msir klei ư̆ êpa bi hrŏ klei ƀun knap, mbĭt anăn hlue gưt djăp ênŭm hdră êlan mơ̆ng Đảng, hdră bhiăn knŭk kna, lehanăn amâo mâo lĕ hlăm klei phung bi roh mplư mplêč. Hnơ̆ng ênoh phung hđeh truh thŭn nao sang hră mơar djăp ênŭm. Tui si Nguyễn Chí Cường, Khua knơ̆ng bruă sang čư̆ êa ƀuôn hgŭm Ia Rbol, boh tŭ dưn anei, kyua mâo klei mđĭ ai, tă brei êlan mơ̆ng phung khua mduôn, khua ƀuôn lehanăn mnuih mâo k’hưm, hlăm anăn mâo nai Ksor Chuel.

 “Nai Ksor Chuel mâo klei thâo bi hmô nanao hlăm bruă hlue gưt hdră êlan mơ̆ng Đảng, klei bhiăn knŭk kna. Jih ai tiê hâo hưn, mtô mblang kơ mnuih ƀuôn sang hlăm dŭm boh ƀuôn hlăm ƀuôn hgŭm Ia Rbol hlue ngă tŭ dưn hdră êlan mơ̆ng bruă sang čư̆ êa ƀuôn hgŭm. Mbĭt anăn hlue ngă jăk bruă mđĭ kyar klei hdĭp mda, rơ̆ng klei êđăp ênang yang ƀuôn hlăm alŭ wăl.”

Khădah čhuang hlăm thŭn khua asei mduôn awăt leh, ƀuôn dah awa Ksor Chuel ăt jih ai tiê hur har duh myơr kơ ƀuôn sang. Dlăng kơ ñu jih jang ƀuôn sang dưi ƀuh klei hdĭp jăk siam, thŭn leh khua ƀiădah ai tiê ăt dôk kjăp, ăt dôk hur har đru kơ mnuih ƀuôn  hrue knư̆ mdrŏng siam.