Gŏ sang Lê Thị Phi Yến, ti alŭ mrô 7, wăl krah Krông Kmar, kdriêk Krông Bông dŭm thŭn êlâo jing gŏ sang ƀun. Thŭn 2019, anak êkei Lê Đăng Khoa nao mă bruă ti ala čar Japon, klei hdĭp gŏ sang ñu mâo leh klei bi mlih. Yến brei thâo, grăp mlan, leh tĭng jih prăk bi liê, ayŏng Khoa m’ĭt nanao kơ gŏ sang êbeh 20 êklăk prăk. Mơ̆ng anăn, leh sa thŭn, mơ̆ng prăk anak m’ĭt, Yến dưi tla jih nư êlâo anăn, dưi mâo prăk mkra war rông êmô, ŭn lehanăn klei ênao êa rông kan mđĭ kyar bruă duh mkra:

 “Leh anak nao mă bruă 3 thŭn tinăn, klei hdĭp h’ĭt kjăp ƀiă leh, mâo prăk m’ĭt wĭt, dưi mkra pưk sang, anak pô ăt dưi dưn dhar kreh klei hdĭp jăk tinăn, ƀuh ñu dưi ngă bruă jăk kơ ala ƀuôn kâo m’ak mơh. Tinei mâo lu mnuih snăn amâo djŏ knŏng gŏ sang kâo pô, dưi m’ĭt prăk kơ amĭ ama, ƀuh h’ĭt kjăp mơh”.

Gŏ sang mâo lu anak čô, jih thŭn mlan mă bruă suaĭ êmăn, ƀiădah klei hdĭp gŏ sang Y-Hai Niê, ti ƀuôn Hluk, să Êa Tiêu, kdriêk Čư̆ Kuiñ ăt dleh dlan. Thâo klei hưn kơ hdră nao mă bruă ti ala tač êngao, gŏ sang ñu čan prăk čiăng kơ anak mniê H’Hằng B.Krông nao mă bruă ti Japon. Hŏng bruă bi mdoh pưk sang, anôk mdei săn, H’Hằng mâo tla 4 êklăk prăk/hruê. Leh 1 thŭn mă bruă, ñu dưi tla jih nư čan. Ară anei, dua ung mô̆ H’Hằng dôk mă bruă ti Japon, grăp mlan m’ĭt nanao prăk kơ amĭ ama. Y-Hai Niê brei thâo:

 “Anak kâo nao mă bruă ti ala tač êngao đru leh kơ klei hdĭp gŏ sang dul ƀiă klei dleh dlan. Ară anei klei hdĭp jăk leh, čang hmăng kơ phung anak mă bruă jăk čiăng kơ êdei anei đĭ kyar ƀrư̆ ƀrư̆ hŏng klei kjăp”.

Hluê si mrô mơ̆ng Knơ̆ng bruă Mnuih ngă bruă, kahan êka êkeh lehanăn yang ƀuôn čar Dak Lak, wưng thŭn 2019 truh mlan 10/2023, kluôm čar mâo 5.763 čô nao mă bruă ti ala tač êngao, lu jing ti Japon, Taiwan, Dhŭng Korea…, hŏng dŭm mta bruă msĕ si: Mkra maĭ mŏk, rŭ mdơ̆ng, mkŏ dưm kdrăp điện tử, bruă lŏ hma… Hnư hrui wĭt kah knar mơ̆ng mnuih mă bruă ti ala tač êngao mơ̆ng 20 êklăk prăk/čô/mlan. Hluê Đặng Thị Huyền Trang, K’iăng khua Adŭ bruă mnuih ngă bruă kahan êka êkeh lehanăn yang ƀuôn kdriêk Čư̆ Kuiñ, dŭm thŭn êgao, hdră atăt mnuih mă bruă ti ala tač êngao hluê klei kuôl kă mâo dŭm gưl mđing, đru, ƀiădah boh sĭt ênoh mnuih nao mă bruă ti ala tač êngao hluê klei kuôl kă adôk ƀiă mkă hŏng ênoh mnuih mă bruă dôk mâo mơ̆ng čar. Hnơ̆ng thâo kơ bruă, klei thâo blŭ klei ala tač êngao, knhuah mă bruă dôk êdu kƀah. Kyua anăn, čiăng kơ mnuih mă bruă ti ala tač êngao dưi mâo djăp hnơ̆ng čuăn, hdră mtô mblang, ruah lehanăn tă hdră ruah bruă, ruah ala čar nao jing klei čiăng êdi.

 “Hlăm wưng ti anăp, Adŭ bruă Mnuih ngă bruă kahan êka êkeh lehanăn yang ƀuôn srăng mđĭ hdră mtô mblang kơ dŭm hdră êlan mtrŭn mơ̆ng Đảng, hdră bhiăn mơ̆ng knŭk kna lehanăn mơ̆ng čar kơ hdră atăt mnuih nao mă bruă ti ala tač êngao đru kơ mnuih ƀuôn sang thâo săng klă wăl anôk mă bruă ala tač êngao, mtrŭt mđĭ hdră bi hgŭm mơ̆ng gưl să, dŭm anôk bruă duh mkra lehanăn mnuih mă bruă; mkŏ mjing gưl hưn mthâo bruă mă, mđing kơ hdră ruah mnuih mă bruă mâo hnơ̆ng thâo lehanăn đru kčĕ hŏng Anôk bruă sang čư̆ êa kdriêk kơ hdră čan prăk čiăng nao mă bruă ti ala tač êngao”.

Hdră mtrŭn Klei bi kƀĭn bruă Đảng čar Dak Lak tal XVII mâo mta kñăm wưng thŭn 2021-2025, Dak Lak gĭr msir mghaih bruă mă kơ 150.000 čô, atăt ba 7.000-7.500 mnuih nao mă bruă mâo wưng kčah ti ala tač êngao. Truh ară anei, ênoh mnuih nao mă bruă ti ala tač êngao hluê klei kuôl kă mâo 3.480 čô, bi knar 50% hdră kčah. Kơ dŭm hdră msir čiăng ngă mta kñăm anei, Nguyễn Quang Thuân, K’iăng khua knơ̆ng bruă Mnuih ngă bruă kahan êka êkeh lehanăn yang ƀuôn čar Dak Lak brei thâo:

 “Ară anei, Knơ̆ng bruă čih mkra leh Hdră đru kčĕ kơ bruă Đảng čar, Anôk bruă sang čư̆ êa čar ba mdah Hdră atăt ba mnuih Việt Nam nao mă bruă ti ala tač êngao mâo wưng kčah hluê si klei kuôl kă lehanăn srăng pŏk mlar wăl anôk, boh nik ti krĭng Ơrôp čiăng kơ mnuih mă bruă lŏ mâo lu klei hrŏng ruah, mâo lu mnuih nao mă bruă hĭn. Mbĭt anăn, hmei čiăng mâo klei hgŭm mơ̆ng anôk bruă kđi čar, boh nik bruă Đảng, bruă sang čư̆ êa alŭ wăl lehanăn mđing kơ 2 kdriêk ƀun lehanăn mnuih ƀun ti alŭ wăl čar čiăng atăt ba diñu nao mă bruă ti ala tač êngao mđĭ hnư hrui wĭt, sa kdrêč mkăn jing mă klei hriăm, klei thâo čiăng mprăp kơ êpul mnuih mă bruă hlăm ênuk tuh tia mkra mjing, bi mrâo mrang ala čar, hlăk čar dôk mđing ieue mtrŭt lu anôk bruă duh mkra hriê duh bi liê ti Dak Lak”.

Hdră atăt ba mnuih nao mă bruă kơ ala tač êngao jing sa hdră msir mghaih bruă mă tŭ dưn, grăp thŭn ba wĭt ênoh prăk lu kơ alŭ wăl, đru mjuăt bi hriăm bruă, msir klei ư̆ êpa, bi hrŏ klei ƀun knap, mkra mđĭ klei hdĭp kơ mnuih mă bruă. Klei hdĭp mơ̆ng lu mnuihƀuôn sang mâo leh klei bi mlih lu kbiă hriê mơ̆ng hdră nao mă bruă ti ala tač êngao./.