Knhal jih mlan 8, phung nai Sang hră gưl 2 leh anăn sang hră gưl 3 Lê Hữu Trác nao čuă hŏng gŏ sang dua amai adei sa amĭ Thị Chúc, Thị Yêm, djuê ana M’Nông (alŭ Tân Bình, să Dak Ngo, kdriêk Tuy Đức, čar Dak Nông). Dua amai adei dôk đru gŏ sang jik rơ̆k, knŏng mâo ama jing mnuih mă bruă, amĭ êbuh đih, ayŏng êdeh drăm. Adei Thị Chúc mgei ai tiê tơdah phung nao čhưn, mđĭ ai.

 “Gŏ sang kâo dleh dlan, phung nai, amĭ ama mđĭ ai čiăng kâo nao hriăm. Thŭn hriăm mrâo kâo mprăp leh hdruôm hră djăp ênŭm leh. Kâo srăng gĭr hriăm hră kyua amĭ ama.”

Điểu Thắng, ama Thị Chúc leh anăn Thị Yêm brei thâo, dua anak mniê 15 thŭn leh dơ̆ng jing mnuih mă bruă phŭn, ƀiădah ñu ăt mđĭ ai phung anak nao sang hră čiăng klei hdĭp êdei anăp amâo dleh dlan. Kyua mâo dŭm hdră êlan đru mơ̆ng Đảng, Knŭk kna anăn phung anak ñu amâo kbiă sang hră ôh.

 “Gŏ sang kâo dleh dlan snăk, kbưi hŏng sang hră, ăt kyua mâo klei mđing dlăng mơ̆ng Đảng, Knŭk kna, sang hră, đru kơ phung hđeh prăk huă ƀơ̆ng, sang dôk, êrô êbat. Pô ăt gĭr mđĭ ai phung anak hriăm hră čiăng thâo boh hră, thâo tĭng yap čiăng kơ klei hdĭp êdei anăo dưi ƀiă dleh dlan.”

Nguyễn Thế Hiệt, Khua sang hră gưl 2, gưl 3 Lê Hữu Trác, să Dak Ngo, kdriêk Tuy Đức, čar Dak Nông brei thâo, ti krĭng dleh dlan, lu hđeh sang hră jing mnuih mă bruă phŭn hlăk mâo 15-16 thŭn. Čiăng mđĭ lar ênoh hđeh sang hră, khua sang hră hŏng phung nai khăng wĭt ti ƀuôn sang mtrŭt mjhar phung hđeh nao sang hră. Hdră mtrŭt mjhar phung nai hâo hưn kơ hdră êlan mơ̆ng Đảng, Knŭk kna kơ phung hđeh krĭng taih kbưi, krĭng mnuih djuê ƀiă, đru kơ amĭ ama, hđeh sang hră thâo kơ hnơ̆ng yuôm bhăn bruă hriăm hră mơar hŏng klei hdĭp.

 “Khua sang hră hŏng nai dlăng adŭ, mguôp hŏng dŭm alŭ ƀuôn, bruă sang čư̆ êa alŭ wăl nao mtrŭt mjhar phung hđeh. Kơ hdră êlan snăn să krĭng 3, krĭng dleh dlan anăn mâo 2 hdră êlan hlue si Hdră mtrŭn 81 đru prăk kơ hđeh nao sang hră leh anăn Hdră mtrŭn 116 đru braih, prăk huă, prăk dôk kơ phung hđeh, jăk snăk”

Phan Thanh Hải, Khua Knơ̆ng bruă sang hră mtô bi hriăm čar Dak Nông brei thâo, čar mđing kơ phung hđeh sang hră krĭng taih kbưi, krĭng mnuih djuê ƀiă. Mprăp kơ thŭn hriăm mrâo, bruă sang hră bi hgŭm hŏng bruă kđi čar wĭt ti grăp boh ƀuôn sang čiăng thâo boh klei leh anăn mtrŭt mjhar hđeh sang hră. Hŏng phung hđeh mâo klei hdĭp dleh dlan anôk bruă srăng duah hdră đru. Klei mĭn bruă sang hră čar jing amâo brei ôh hđeh sang hră kbiă sang hră kyua klei hdĭp dleh dlan.

Ară anei dŭm hdră êlan đru kơ phung hđeh krĭng taih kbưi, krĭng dleh dlan, krĭng mnuih djuê ƀiă hlue si Hdră mtrŭn mrô 116 thŭn 2016 leh anăn Hdră mtrŭn 81 thŭn 2021 mơ̆ng Knŭk kna dôk mđĭ lar boh tŭ jăk ti čar Dak Nông. Hlăm dŭm thŭn hriăm 2022-2023 leh anăn 2023-2024 mâo leh êbeh 14 êbâo čô hđeh sang hră hlăm čar dưi đru prăk huă, prăk dôk, đru hriăm hră hŏng ênoh giăm 21 êklai prăk. Phan Thanh Hải brei thâo:

 “Hlăm dŭm thŭn êgao, dŭm klei dưi dưn hdră êlan Gưl dlông leh anăn alŭ wăl mđing dlăng kơ phung ti krĭng taih kbưi, krĭng mnuih djuê ƀiă. Boh nik mâo 2 Hdră mtrŭn năng mđing hlăm boh sĭt jing Hdră mtrŭn 116 leh anăn Hdră mtrŭn 81 mơ̆ng Knŭk kna.  Bruă đru anei nao hlăm boh sĭt, đru mđĭ ai phung hđeh krĭng taih kbưi, boh nik phung hđeh krĭng mnuih djuê ƀiă mâo klei găl nao sang hră jăk hĭn, bi hrŏ ênoh hđeh sang hră kbiă sang hră hlăm dŭm thŭn êgao.”

Dŭm hruê anei, hđeh sang hră ti krĭng taih kbưi, krĭng mnuih djuê ƀiă ti Dak Nông, Lăn Dap Kngư dôk hur har lŏ nao sang hră. Mbĭt hŏng klei gĭr mơ̆ng bruă sang hră, phung nai mtô giăm ƀuôn sang, hdră êlan mơ̆ng Đảng, Knŭk kna dôk đru kơ phung hđeh găn klei dleh dlan mđing kơ êdei anăp jăk siam./.