Akŏ thŭn 2017, êlan dar nah Dhŭng ƀuôn prŏng Bảo Lộc, čar Lâm Đồng kčưm dưi rŭ mjing, mnuih ƀuôn sang ti alŭ wăl hơ̆k mơak êdi. Êlan anei dưi rŭ mjing amâo djŏ knŏng bi hrŏ klei kpăk đuôm hlăm êlan klông ti êlan dơ̆ng mrô 20 găn Bảo Lộc, ƀiădah lŏ mjing klei găl mđĭ kyar bruă duh mkra leh anăn klei hdĭp mnuih ƀuôn sang hlăm alŭ wăl. Phạm Minh Thuận, ti ƀuôn hgŭm Lộc Sơn, ƀuôn prŏng Bảo Lộc brei thâo, mnuih ƀuôn sang tinei čang guôn grăp hruê dưi êrô êbat ti êlan mrâo, ƀiădah amâo thâo ya ngă êjai dôk ngă êlan ƀiădah mdei hĕ jih. Klei mdei ngă bruă ngă kơ lu anôk klưh rai, êlan kđang jih… ngă bi luč liê mang prăk knŭk kna.

 “Êlan anei msĕ si êlan phŭn mơ̆ng Bảo Lộc, mnuih ƀuôn sang dôk tinei mơ̆ng sui leh, mơ̆ng thŭn 1954 truh kơ ară anei, pŏk êlan klông prŏng srăng mđĭ kyar mbĭt hŏng ƀuôn prŏng. Ăt hmăng hmưi bruă sang čư̆ êa alŭ wăl mâo klei hưn mdah hŏng Bruă Kƀĭn Ala čiăng bi leh êlan anei, ti krah ƀuôn prŏng hlei leh lui hĕ êlan msĕ sơnăn, luč liê êdi yơh”.

            Bruă mdei hĕ klei ngă bruă, ngă ka leh lŏ jing phŭn agha ngă truh lu klei truh tơl hlăm êlan klông, djiê mnuih ti êlan dơ̆ng anei. Mlan 3/2023, sa čô êkei 54 thŭn đĭ êdeh ôtô mdiăng čô 4 knŏng mrâo 4 thŭn, êjai đĭ ti dlông kban amâo mâo msei gang ti êlan anei, găn să Lộc Nga, ƀuôn prŏng Bảo Lộc hlŏng lĕ ngă kơ 2 čô djiê. Lŏ dơ̆ng kơnăn, ti knhal jih thŭn 2023, sa čô êkei êdam ăt djiê êjai đĭ êdeh p’phut lĕ ti ƀang ƀlŭng êlam krah êlan, anôk êlan dlưh kđang. Hluê si Hoàng Xuân Hậu, ti alŭ 3, să Đại Lào, ƀuôn prŏng Bảo Lộc, khădah bruă sang čư êa alŭ wăl pơ̆ng leh mdhă hưn brei răng, ƀiădah klei arưp aram mâo nanao, boh nik jing phung hriê mơ̆ng anôk mkăn.

        “Mnuih ƀuôn sang êrô êbat lu ƀiădah êlan jhat rai, klưh kđang msĕ sơnei, dlăng kbưi pô amâo mâo ƀuh ôh, mĭn dah dôk jăk, ƀiădah êlan dlưh truh 3 – 4 met, sĭt hjan êa khăt si pô thâo. Ƀuh phung hriê mơ̆ng anôk mkăn hmei ăt lač kơ diñu, đĭ êdeh ôtô knŏng brei wĭt kơ tluôn yơh kyuadah hŭi hyưt êdi. Hmăng hmưi knŭk kna, gưl bruă mâo klei dưi uêñ mĭn kơ êlan dơ̆ng anei”.

Hluê si Trần Đình Văn, k’iăng khua bruă Đảng čar, khua êpul bi ala Bruă Kƀĭn Ala čar Lâm Đồng, klei ngă bruă tah blah leh anăn lui hĕ hlăm lu thŭn êgao ngă kơ êlan dar nah Dhŭng ƀuôn prŏng Bảo Lộc klưh rai kjham, ngă truh klei luč liê mang leh anăn mâo lu klei amâo mâo jăk mâo leh lu phung bi ala hưn mdah. Êpul bi ala Bruă Kƀĭn Ala čar Lâm Đồng ăt hưn mdah hŏng knŭk kna leh anăn tŭ ư srăng lŏ mkăp 320 êklai prăk čiăng ngă bi leh êlan dơ̆ng anei hlăm wưng kơ anăp.

           “Êlan dar Bảo Lộc anei mâo êpul bi Bruă Kƀĭn Ala ăt hưn mdah lu blư̆ leh. Êlan dơ̆ng anei tuôm mâo lu klei, leh anăn klei êrô êbat dleh dlan, čhŏ djhan wăl hdĭp mda ti alŭ wăl… Mrâo êgao, K’iăng Khua knŭk kna Lê Minh Khái ăt mâo leh klei bi êdah kơ boh klei anei. Klă sĭt srăng mkăp brei êbeh 320 êklai prăk mơ̆ng ênoh duh bi liê mơ̆ng knŭk kna čiăng bi leh êlan anei”.

Bruă rŭ mjing êlan dar nah Dhŭng Ƀuôn prŏng Bảo Lộc jing hdră bi mbŏ hlăm hdră mkra wĭt, mđĭ hnơ̆ng êlan dơ̆ng mrô 20 găn 2 čar Đồng Nai leh anăn Lâm Đồng hluê si hdră BT (rŭ mjing – ba jao). Hdră anei mơ̆ng Phŭn bruă êlan klông leh anăn dŭ mdiăng jing anôk bruă bi klă duh bi liê leh anăn knơ̆ng bruă BT20 – Cửa Long jih pô duh bi liê ngă hdră. Êlan anei mâo boh taih 15km hŏng ênoh duh bi liê dưi mkra mlih jing êbeh 702 êklai prăk. Ti knhal jih thŭn 2020, êjai ngă bruă mâo leh 70% mdei hĕ kyua kƀah ngăn prăk./.